اينالانى تازا ۇستاۋ تابيعاتتى ايالاۋ – پاراساتتىلىق ۇلگىسى. قورشاعان ورتاعا قامقورلىق قوعامدى قاشاننان بەرى ىلگەرى باستايتىن ىزگى امالدىڭ ءبىرى بولىپ كەلەدى. تابيعات ادامزاتقا بەرىلگەن امانات بولعاندىقتان, بۇعان قيانات قىلماي, بارىنشا قامقور بولۋ جاعىنا باسىمدىق بەرۋ كەرەك ەكەنى انىق. وسىنداي جاناشىر نيەتتەن تۋعان باستامانىڭ ءبىرى – «تازا قازاقستان» ەكولوگيالىق اكتسياسى.
ەل كولەمىندە 8 ساۋىردەن باستالعان تازالىق ناۋقانى 5 اپتاعا سوزىلادى. ءار اپتانىڭ ءوز تاقىرىبى مەن ماقساتى دا بەلگىلەنگەن. وسى اپتادا «جاسىل ايماق» اپتالىعى قورىتىندىلانىپ جاتىر. 20-27 ءساۋىر ارالىعىن قامتىعان بۇل كەزەڭدە كوشەتتەر ەگىلىپ, اعاشتاردى اقتاۋعا دەن قويىلدى. ال بۇعان دەيىن اينالامىزدى, اۋلالاردى تازالاۋعا شاقىرعان «تازا ولكە» جانە تاريحي-مادەني ەسكەرتكىشتەر اۋماعىن اباتتاندىرۋدى ماقسات تۇتقان «كيەلى مەكەن» اپتالىقتارى ءوتتى.
ەكولوگيالىق اكتسياعا ەلىمىزدىڭ بارلىق ءوڭىرىنىڭ تۇرعىندارى بەلسەندى اتسالىسىپ جاتىر. بۇل رەتتە كەيبىر وڭىرلەردە ازاماتتاردى ىنتالاندىرۋ ماقساتىندا قوسىمشا ءىس-شارالار دا قولعا الىنعان.