كوكشەتاۋدا جالپى قالالىق سەنبىلىك وتكىزىلىپ, وبلىس ورتالىعى جايناپ سالا بەردى. مۇنداي يگى ءىس ەلدى مەكەندەردە دە ۇيىمداستىرىلدى.
كوگەرىپ كوكتەم كەلگەن سوڭ اۋىل ايماقتىڭ ماڭىن تازالاپ اباتتاندىرۋ قولعا الىناتىنى بەلگىلى. وبلىس ورتالىعىنداعى ساتىمەن وتكەن سەنبىلىككە مەملەكەتتىك ورگاندار, كاسىپورىن مەن ۇيىمدار جانە مەكەمەلەردىڭ وكىلدەرى بەلسەنە قاتىستى. ءبىر عانا «تىنىس» اكتسيونەرلىك قوعامى ۇجىمى 300-دەن اسا ادام بولىپ ورتاق ىسكە اتسالىستى. قالانىڭ كەسكىن-كەلبەتى, ءسانى مەن سالتاناتى بارشاعا ورتاق. سوندىقتان اۋىق-اۋىق وسىنداي سەنبىلىكتەر ۇيىمداستىرىلىپ تۇرسا قۇبا-قۇپ.
– قالا كوركىنە اتسالىسىپ جاتىرمىز. ءبىزدىڭ ۇجىمعا ابىلاي حان داڭعىلىنىڭ بويىن تازالاۋ جۇكتەلدى. 70-تەن اسا ادام جۇمىلىپ, ءبىر ادامداي ەڭبەك ەتتىك, – دەيدى «كوكشەتاۋ جىلۋ» كاسىپورنىنىڭ ديرەكتورى رۋسلان ماقىشەۆ.
تازالىق جۇمىسىنا كوممۋنالدىق قىزمەت تە تارتىلعان. ولار مىڭعا جۋىق قاپ پەن 200 كيلو اك دايىنداپتى. 40-تان اسا تەحنيكا جۇمىلدىرىلعان. 21 كونتەينەر الاڭى تازالانىپ, تۇرمىستىق قالدىقتار پوليگونىنا 2,5 مىڭ تەكشە مەتر قوقىس شىعارىلعان. سەنبىلىك بارىسىندا كوشەلەر مەن جاياۋ جۇرگىنشىلەر جولى, ارىقتاردىڭ ءىشى قوقىستان ارىلدى. وسى كۇنى 4 مىڭعا جۋىق قالا تۇرعىنى وزدەرىنىڭ سۇيىكتى قالاسىنىڭ ساۋلەتىنە اتسالىستى.
كوكشەتاۋ