اسسامبلەيانىڭ قايىرىمدىلىق قۇندىلىقتارىن ىلگەرىلەتۋدەگى ءرولى وراسان - ساراپشى

حالىقتار اراسىنداعى اجىراماس ىنتىماق ءجىبىن جالعاپ جاتقان كەرەمەت كەلبەت – قايىرىمدىلىق. ۇلى مەكەندە ۇرپاعىمەن ءوسىپ-ءونىپ وتىرعان وزگە ەتنوس وكىلدەرى ەرلەر ەتىگىمەن سۋ كەشكەن تاسقىنعا توسقاۋىل ىسىندە دە ءبىر ەكەندىگىن بايقاتتى. بۇل تۋرالى كۇنى كەشە وتكەن قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا مەملەكەت باسشىسى قاسىم-جومارت توقاەۆ ايرىقشا اتاپ ءوتتى.

«تاسقىن باستالعاننان بەرى قازاقستان حالقى اسسامبلەياسى بەلسەندى ءارى ۇيلەسىمدى جۇمىس ىستەپ جاتىر. وعان بۇكىل ەل كۋا. جۇرتقا جان-جاقتى كومەك بەرۋ ءۇشىن دەرەۋ اسسامبلەيانىڭ رەسپۋبليكالىق جانە ايماقتىق شتابتارى قۇرىلدى. «جۇرەكتەن جۇرەككە» دەگەن اۋقىمدى اكتسيا جۇرگىزىلىپ جاتىر. ...ولار قايىرىمدىلىق جانە گۋمانيتارلىق كومەك جيناۋعا جۇمىلدى. سونداي-اق جۇرتتى قاتەردەن حاباردار ەتۋگە جانە قاۋىپسىز جەرگە كوشىرۋگە اتسالىستى. مۇنىڭ ءبارى – ءوزارا جاناشىر جانە تىلەۋلەس بولۋدىڭ ايقىن كورىنىسى», دەدى پرەزيدەنت.

اسىلىندا دا اسسامبلەيا وتە اۋقىمدى قايىرىمدىلىق شارالارىن دەر كەزىندە جانە جەدەل ۇيىمداستىرىپ كەلەدى. جۇدىرىقتاي جۇمىلىپ اتقارىلعان ەڭبەكتىڭ ارقاسىندا كەلگەن ناتيجەلەر تۋرالى «قازاقستاندىق قوعامدىق دامۋ ينستيتۋتىنىڭ» ساراپشىسى باۋىرجان سەرىكباەۆ پىكىر ءبىلدىردى.

«قايىرىمدىلىق - اتا-بابا جولىمەن بويىمىزعا سىڭگەن ۇلتتىق قۇندىلىقتارىمىزدىڭ ءبىرى. اسارلاتىپ ءۇي سالۋ, ۇلكەن شارۋانى اعايىن-تۋىسپەن بىرلەسە كوتەرۋ, قيىندىق كەلسە ءوزارا كومەككە اسىعۋ - داستۇرىمىزدە بار اسىل قاسيەت. سۋ تاسقىنىنىڭ الدىن الۋ, زارداپ شەككەن ايماقتارعا كومەك قولىن سوزۋ ىسىندە ءبىز قازاقستان حالقىنىڭ مىزعىماس بىرلىگىنىڭ كۋاسى بولدىق. ەلىمىزدىڭ بارلىق ايماعىنان جينالعان گۋمانيتارلىق كومەك زارداپ شەككەن ايماقتارعا تولاسسىز جىبەرىلىپ جاتىر. ون مىڭداعان ەرىكتىلەر اعايىنعا كومەككە اسىقتى. مەملەكەت شۇعىل تۇردە ماسەلەنى قولعا الىپ, 100 مىڭنان استام ەل ازاماتى قاۋىپسىز ايماققا كوشىرىلدى. بۇل - ەل بولىپ جۇمىلا كوتەرگەن بىرلىگىمىز بەن ىنتىماعىمىزدىڭ, بويىمىزعا بابالاردان سىڭگەن قايىرىمدىلىق قاسيەتىمىزدىڭ كورىنىسى. مۇنداي ۇيىمشىلدىق, قايىرىمدىلىق سىندى قاسيەتتەرىمىز حالقىمىزدى بىرىكتىرىپ قانا قويماي, ەل مۇددەسى جولىندا ءوزارا ىنتىماق تانىتىپ, ەڭبەك ەتۋگە باستايتىن قۇندىلىعىمىز. بۇل ىستە اسسامبلەيانىڭ دا اتقارىپ جاتقان ەڭبەگى وراسان», دەدى باۋىرجان سەرىكباەۆ.

ۇلت تۇتاستىعى تۇعىرىن نىعايتۋ جولىندا اسسامبلەيا جۇيەلى شارالار ۇيىمداستىرۋدى ماقسات تۇتقان. ەلدەگى ەتنوس وكىلدەرى جەكەلەي شارالارمەن بىرگە, قازاق حالقىنىڭ ۇلتتىق مەرەكەلەرىن دە تويلاۋعا ىقىلاستى.

«جىل سايىن ءبىز قازاقستان حالىقتارىنىڭ بىرلىگى كۇنى مەيرامىن اتاپ وتەمىز. ودان بولەك ءاز-ناۋرىزىمىز دا ورتاق مەرەكە رەتىندە تويلاناتىن, بارشا حالقىمىزبەن بىرلەسە اتاپ وتەتىن مەيرامىمىزعا اينالىپ كەلەدى. قحا-نىڭ ەلىمىزدىڭ بارشا وڭىرلەرىندە «دوستىق» ۇيلەرى ناتيجەلى, ەلگە پايدالى باعىتتا جۇمىس ىستەپ جاتىر. بۇل حالقىمىزدى بىرىكتىرەتىن, ءبىر مۇددەگە جۇمىلدىراتىن جاقسى ۇردىستەر», دەدى «قازاقستاندىق قوعامدىق دامۋ ينستيتۋتىنىڭ» ساراپشىسى.

ايتا كەتسەك, اسسامبلەيا مۇشەلەرى «قايىرىمدىلىق كەرۋەنى» جوباسى ارقىلى مۇقتاجدىڭ جوعىن تۇگەندەپ, قولداۋ كورسەتۋ ءۇردىسىن قالىپتاستىرعان. كەيىنگى كۇردەلى كەزەڭ - سۋ تاسقىنى سالدارىن جويۋدا دا اسسامبلەيا اتقارىپ جاتقان شارالاردىڭ ماڭىزى زور.

«سۋ تاسقىنى باستالعالى بەرى زارداپ شەككەن ايماقتارعا قازاقستان حالقى اسسامبلەياسىنىڭ باستاماسىمەن 770 ميلليون تەڭگەنىڭ گۋمانيتارلىق كومەگى جىبەرىلدى. رەسپۋبليكا بويىنشا 12 مىڭنان اسا قحا ەرىكتىلەرى اۋىل-اۋىلدى ارالاپ, حالىقپەن بىرگە بولىپ, كومەك قولىن سوزدى. اسسامبلەيانىڭ رەسپۋبليكالىق, وڭىرلىك شتابتارى قۇرىلىپ, بەلسەندى جۇمىس ىستەدى. بۇل وتە جاقسى ءۇردىس. ەلىمىزدىڭ ءبىر ەكەنىن كورسەتەتىن, حالقىمىزدىڭ ىنتىماعىن بىلدىرەتىن ماڭىزدى شارالار. وتانىمىز ءوسىپ-وركەندەۋى ءۇشىن بارشا حالقىمىزدىڭ بىرلىگى مەن ىنتىماعى اسا ماڭىزدى. ەلىمىزدىڭ بىرلىگى مىعىم, حالقىمىزدىڭ ىنتىماعى مىقتى بولسا, كەز كەلگەن قيىندىقتى ەڭسەرىپ وتەمىز», دەپ تۇيىندەدى باۋىرجان سەرىكباەۆ.