سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وتىرىس بارىسىندا سەناتورلار «قر-نىڭ مەملەكەتتىك ناگرادالارى تۋرالى» زاڭىنا وزگەرىستەر مەن تولىقتىرۋ ەنگىزۋ تۋرالى» زاڭدى قاراپ, ماقۇلدادى. اتالعان زاڭ مەملەكەت باسشىسىنىڭ تاپسىرماسىن ورىنداۋ اياسىندا پارلامەنت دەپۋتاتتارىنىڭ باستاماشى بولۋىمەن ازىرلەندى, دەپ حابارلايدى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
جاڭا نورمالارعا سايكەس «ايبىن» وردەنىنىڭ ءتۇرلى دارەجەسىنە ساعادات نۇرماعامبەتوۆ, باۋىرجان مومىش ۇلى, راحىمجان قوشقارباەۆتىڭ ەسىمدەرىن بەرۋ قاراستىرىلعان.
«ماقۇلدانعان زاڭ پرەزيدەنتىمىز قاسىم-جومارت توقاەۆتىڭ تىكەلەي تاپسىرماسى بويىنشا ازىرلەندى. مەملەكەت باسشىسى «ايبىن» وردەنىنىڭ ءتۇرلى دارەجەسىنە حالقىمىزدىڭ داڭقتى باتىرلارىنىڭ ەسىمدەرىن بەرۋدى ۇسىنعان ەدى. مۇنداي شەشىم كورنەكتى تاريحي تۇلعالارىمىزدى دارىپتەۋگە جانە جاستاردىڭ اسكەري-پاتريوتتىق رۋحىن كوتەرىپ, ولاردى وتانشىلدىققا تاربيەلەۋگە ىقپال ەتەرى انىق», دەدى پالاتا سپيكەرى.
سونداي-اق سەنات دەپۋتاتتارى «قازاقستان رەسپۋبليكاسى مەن وزبەكستان رەسپۋبليكاسى اراسىنداعى وداقتاستىق قاتىناستار تۋرالى شارتتى راتيفيكاتسيالاۋ تۋرالى» زاڭدى قاراپ, ماقۇلدادى. شارت نەگىزگى باعىتتار بويىنشا ىنتىماقتاستىقتى كەڭەيتۋگە ارنالعان.
ماۋلەن اشىمباەۆ اتاپ وتكەندەي, قازاقستان مەن وزبەكستاننىڭ وداقتاستىق قارىم-قاتىناسى تاريحي باۋىرلاستىققا, ءوزارا سەنىمگە جانە ورتاق قۇندىلىقتارعا تابان تىرەيدى. قۇجاتتىڭ ەرەجەلەرى بويىنشا تاراپتار ەكى مەملەكەتتىڭ پارلامەنتتەرى, ساياسي پارتيالارى جانە قوعامدىق ۇيىمدارى اراسىنداعى بايلانىستى نىعايتۋعا ىقپال ەتەدى.
بۇدان بولەك, شارتتىڭ 4-بابىنا سايكەس قازاقستان مەن وزبەكستان مەملەكەت باسشىلارى باسقاراتىن جوعارى مەملەكەتارالىق كەڭەس قۇرادى. ول كەڭەستىڭ قىزمەتىن ۇيلەستىرۋ سىرتقى ىستەر مينيسترلەرىنىڭ كەڭەسىنە جۇكتەلەدى.
«وزبەكستان – قازاقستاننىڭ سەنىمدى وداقتاسى ءارى ماڭىزدى سەرىكتەسى. ەكى ەل باسشىلارىنىڭ ءوزارا مەملەكەتتىك ساپارلارى مەن كەلىسىمدەرى ەكىجاقتى قارىم-قاتىناستارعا ۇنەمى تىڭ سەرپىن بەرەدى. بۇگىن قارالعان زاڭ – ءوزارا سەنىمگە نەگىزدەلگەن وسىنداي ديالوگتىڭ ناتيجەسى. بۇل قۇجات مەملەكەتتەرىمىز اراسىنداعى ىقپالداستىق ماسەلەلەرىنىڭ كەڭ اۋقىمىن قامتيدى جانە كوپتەگەن سالاداعى ستراتەگيالىق ىنتىماقتاستىقتى نىعايتا تۇسەدى. الداعى ۋاقىتتا شارت باۋىرلاس قازاق-وزبەك قارىم-قاتىناسىن ساپالى جاڭا دەڭگەيگە شىعارۋعا ىقپال ەتەدى دەپ سەنەمىز», دەدى ماۋلەن اشىمباەۆ.
سونىمەن قاتار وتىرىس بارىسىندا «تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ قوعامدىق دەنساۋلىق ساقتاۋ سالاسىنداعى سانيتاريالىق-ەپيدەميولوگيالىق سيپاتتاعى توتەنشە جاعدايلاردىڭ الدىن الۋ جانە ولارعا دەن قويۋ جونىندەگى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى» جانە «زياتكەرلىك مەنشىك قۇقىقتارىنىڭ ساۋدا اسپەكتىلەرى جونىندەگى كەلىسىمگە تولىقتىرۋ ەنگىزۋ تۋرالى حاتتامانى راتيفيكاتسيالاۋ تۋرالى» زاڭدار قارالىپ, ماقۇلداندى. كەلىسىمدە تمد ەلدەرىندە سانيتاريالىق-ەپيدەميولوگيالىق سيپاتتاعى توتەنشە جاعدايلارمەن ءتيىمدى كۇرەسۋ ءۇشىن ءتيىستى شارالار قاراستىرىلعان. ال, حاتتاما مۇقتاج ەلدەردىڭ دارىلىك زاتتارعا قولجەتىمىدىلىگىن قامتاماسىز ەتۋدى كوزدەيدى. اتالعان قۇجات دۇنيەجۇزىلىك ساۋدا ۇيىمىنا مۇشە ەلدەرگە پاتەنتتەلگەن دارىلىك زاتتاردىڭ اۆتورلىق قۇقىق يەسىنىڭ رۇقساتىنسىز دارىلىك زاتتاردى ءارى قاراي ەكسپورتقا مىندەتتى ليتسەنزيالار بويىنشا وندىرۋگە قۇقىق بەرەدى. الايدا, ءدارى-دارمەك ءوندىرىسى دەنساۋلىق ساقتاۋ ماقساتىمەن عانا جۇرگىزىلۋى كەرەك.
پالاتا وتىرىسىندا سەناتورلار ارمان وتەعۇلوۆ, نۇرتورە ءجۇسىپ, دارحان قىدىرالى, تالعات ءجۇنىسوۆ وزدەرىنىڭ دەپۋتاتتىق ساۋالدارىن جولدادى.