بۇل تۋرالى مەملەكەت باسشىسى قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا سويلەگەن سوزىندە ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ء«بىز الداعى ۋاقىتتا ازاماتتاردىڭ مۇلكىن ساقتاندىرۋ جۇيەسىن ودان ءارى جەتىلدىرۋ جولدارىن قاراستىرۋىمىز قاجەت. دامىعان ەلدەردە الاپات اپاتتان كەلگەن شىعىننىڭ باسىم بولىگىن ساقتاندىرۋ كومپانيالارى ءوز موينىنا الادى. ارينە, ول ءۇشىن ەكونوميكا مەن قارجى جۇيەسىن ودان ءارى دامىتىپ, قوعامدا ءتيىستى مادەنيەت قالىپتاستىرۋ كەرەك», دەدى مەملەكەت باسشىسى.
پرەزيدەنتتىڭ ايتۋىنشا, حالىقتىڭ ءال-اۋقاتىن ارتتىرۋ مەملەكەتتىڭ باستى مىندەتى بولىپ قالا بەرەدى. ادىلەتتى قازاقستاندى قۇرۋ تۇجىرىمداماسى – قۇر ءسوز ەمەس, ناقتى جۇزەگە اسىرىلىپ جاتقان شارۋا. ول ءۇشىن ناقتى شارالار قابىلدانىپ, جاڭا مۇمكىندىكتەرگە ۇدايى جول اشىلىپ جاتىر.
«مىسالى, مەنىڭ ۇلتتىق قۇرىلتايدىڭ ءۇشىنشى وتىرىسىنداعى 4 ينفراقۇرىلىمدىق باستامامنىڭ اياسىندا 1 مامىردان باستاپ «ناۋرىز» اتتى جاڭا يپوتەكا باعدارلاماسى ىسكە قوسىلادى. ونى ىسكە اسىرۋعا 8 جىل ىشىندە 1,7 تريلليون تەڭگە جۇمسالادى. سونىڭ ناتيجەسىندە 70 مىڭعا جۋىق وتباسى باسپانالى بولادى», دەدى قاسىم-جومارت توقاەۆ.
سونداي-اق مەملەكەت باسشىسى قازىرگى كۇردەلى كەزەڭدە ەلدىڭ بىرلىگى مەن ىنتىماعىن ساقتاۋ – ەڭ باستى مىندەت ەكەنىن ايتتى. ء«بىز قوعامعا ىرىتكى سالاتىن ءاربىر ارەكەتكە توسقاۋىل قويامىز», دەدى ول.
«مەن بۇرىن دا ايتقانمىن, قازاقتىڭ مەملەكەتتىگىنە قارسى كەيبىر تەرىس پيعىلدى ادامدار قاراپ وتىرمايدى. «اتىڭ شىقپاسا, جەر ورتە» دەگەن. ولار قوعام ىشىنە ىرىتكى سالۋ ءۇشىن الەۋمەتتىك جەلىدە ءتۇرلى قيتۇرقى ارەكەتتەرگە باراتىنى انىق. ءبىر سوزبەن ايتساق, حالىق اراسىندا جالعان مالىمەت تاراتادى. سوندىقتان ءبارىمىز كەز كەلگەن اقپاراتقا سىن كوزبەن قاراپ, تەك رەسمي مالىمەتتەرگە سۇيەنۋىمىز قاجەت», دەدى پرەزيدەنت.
مەملەكەت باسشىسىنىڭ ايتۋىنشا جۇرتىمىز ەل تاعدىرى سىنعا تۇسكەن ساتتە قايسارلىق تانىتىپ, ىنتىماعىن ساقتاي بىلگەن. جاناشىرلىق, تىلەۋلەستىك سياقتى ادامي قاسيەتتەردى بارىنەن بيىك قويعان. ءبىز تاريحتىڭ تاعى ءبىر سىناعىنان ءوتىپ جاتىرمىز. بىرنەشە اپتا بويى حالقىمىزدىڭ بىرلىگى مەن تاباندىلىعى جانە تەڭدەسسىز تابيعات اپاتىن ابىرويمەن ەڭسەرۋ قابىلەتى سىنعا ءتۇسىپ جاتىر.
«كەز كەلگەن داعدارىس ءبىز ءۇشىن سىناق قانا ەمەس. ول ارقايسىمىزدىڭ بويىمىزدا بۇعىپ جاتقان كۇش-قۋاتىمىز بەن قارىم-قابىلەتىمىزدى اشىپ, تىڭ مۇمكىندىكتەر بەرەدى. ەلىمىزدىڭ وركەندەۋىنە كەدەرگى كەلتىرەتىن نارسەنىڭ ءبارى, ەرتە مە, كەش پە, تاريح قويناۋىنا ەنىپ, كەلمەسكە كەتەدى. ەندەشە, قازىرگى تابيعات اپاتى بايبالامعا سالىپ, ومىردەن تۇڭىلەتىندەي نارسە ەمەس. ءوسىپ-وركەندەۋ جولىندا ءتۇرلى كەدەرگى كەزدەسەدى. بىراق ونىڭ ارتىنان جاقسىلىق كەلەدى. بۇل الاپات تاسقىن ءبىز ءۇشىن جالعان جەتىستىككە الدانىپ, «زايا كەتكەن كەزەڭنەن» اجىرايتىن جولايرىق بولۋعا ءتيىس», دەدى پرەزيدەنت.