ەلىمىزدە سۋ باسقان ايماقتاردا احۋال تۇراقتالىپ, مال شىعىنى وتەلىپ جاتىر. كەلتىرىلگەن زالالدى وتەۋ جانە دەرەكتەردى سالىستىرۋ جونىندەگى كوميسسيالاردىڭ جۇمىسى بارىسىندا تابيعي اپاتتان 8,2 مىڭ باس اۋىل شارۋاشىلىعى جانۋارلارىنىڭ ولگەنى انىقتالدى, دەپ حابارلايدى Egemen.kz.
قر اۋىل شارۋاشىلىعى مينيسترلىگىنىڭ رەسمي وكىلى ولجاس تىلەبالدين وكق الاڭىندا وتكەن بريفينگتە ولگەن جانۋارلاردى ۋتيليزاتسيالاۋ جۇمىستارى ۆەتەريناريالىق قىزمەتتەردىڭ باقىلاۋىندا ەكەنىن اتاپ ءوتتى. سونداي-اق شىعۋ تەگى كۇمان كەلتىرەتىن ەتتى ساتۋ تۋرالى تارالىپ جاتقان اقپاراتتاردىڭ شىندىققا جاناسپايتىنىن ايتتى.
«وڭىرلەردە ولگەن جانۋارلاردىڭ يەلەرىنە وتەماقى تولەنىپ جاتىر. بۇگىندە قوستاناي وبلىسىندا اۋىل شارۋاشىلىعى جانۋارلارىنىڭ 780 باس مالىنا 113,2 ملن تەڭگە, اقتوبە وبلىسىندا اۋىل شارۋاشىلىعى جانۋارلارىنىڭ 753 باس مالىنا 98,3 ملن تەڭگە سوماسىندا وتەماقى تولەندى. قاراعاندى وبلىسىندا اۋىل شارۋاشىلىعى جانۋارلارى بويىنشا زالال تولىعىمەن وتەلدى. باتىس قازاقستان وبلىسىندا وتەماقىعا 187,4 ملن تەڭگە ءبولىندى, وتىنىمدەردى قابىلداۋ ءراسىمى جۇرگىزىلىپ جاتىر. تولەم وسى اپتا سوڭىندا باستالادى. اتىراۋ جانە اقمولا وبلىستارىندا وتەماقى الۋعا وتىنىمدەر قابىلدانىپ جاتقانىن ايتا كەتۋ كەرەك», دەدى ولجاس تىلەبالدين.
رەسپۋبليكالىق شتابتىڭ حاتتاماسىندا ولگەن مالدىڭ شىعىنىن وتەۋ الگوريتمى بەكىتىلدى. ال وتەماقىنى الۋ ءۇشىن ءوتىنىش بەرۋشىلەر جەرگىلىكتى وتەماقى كوميسسياسىنا جۇگىنۋى كەرەك. سونىمەن قاتار اۋىل شارۋاشىلىعى جانۋارلارىنىڭ يەلەرىنە وتەماقى بيۋدجەت قاراجاتى ەسەبىنەن دە, بيۋدجەتتەن تىس كوزدەر ەسەبىنەن دە جۇزەگە اسىرىلادى.
قىرمىزى جۇماعاليقىزى,
ەۇۋ ستۋدەنتى