ارال اۋداندىق ءبىلىم ءبولىمى ماماندارى قازالىداعى تەمىرجول بەكەتىنەن باتىس قازاقستان وبلىسىنان كەلگەن 103 بالانى قارسى الىپ, «قامباش» بالالاردى ساۋىقتىرۋ ورتالىعىنا ورنالاستىردى.
اۋداندىق ءبىلىم ءبولىمىنىڭ باسشىسى سانيرا جاننازاروۆانىڭ ايتۋىنشا, سۋ تاسقىنىنان زارداپ شەككەن وڭىردەن كەلگەن 5-9 سىنىپ وقۋشىلارى 10 كۇن بويى ورتالىقتا ءبىلىم الىپ, دەمالادى. ولاردى اۋداننىڭ تاريحي مادەني ورىندارىمەن تانىستىرۋ دا جوسپارلانىپ وتىر. وقۋشىلاردى 10 جەتەكشى, 1 مەدبيكە باستاپ كەلىپتى.
«بۇل وقۋ-اعارتۋ مينيسترلىگىنىڭ جوباسى اياسىندا جۇزەگە اسىپ, جەرگىلىكتى كاسىپكەرلەر دەمەۋشىلىك تانىتىپ وتىر. بالالار ءۇشىن بارلىق جاعداي جاسالدى. كۇنىنە 5 مەزگىل تاماقتانادى. ون كۇندە وقۋمەن قاتار ولاردىڭ بوس ۋاقىتىندا ءتۇرلى سپورتتىق, شىعارماشىلىق ءىس-شارالار ۇيىمداستىرىلادى», دەيدى ءبىلىم ءبولىمىنىڭ باسشىسى.
ساۋىقتىرۋ ورتالىعى وقۋشىلارعا بىردەن ۇناپتى. ولارعا اۋدان مەكتەپتەرىنەن ارنايى دايىندالعان مۇعالىمدەر ساباق بەرەدى. ال باعانى «كۇندەلىك.كز» پلاتفورماسىنا بالالارمەن بىرگە كەلگەن جەتەكشىلەرى قويادى.
قىزىلوردا