جۋىردا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ باسشىلىعى وقۋ ماۋسىمىنىڭ اياقتالۋ كەزىندە ءبىر توپ ستۋدەنتتەردى ۇلكەن قۋانىشقا بولەدى. ياعني, وسى وقۋ ورنىندا الەۋمەتتىك جاعدايى تومەن وتباسىلارىنان شىققان, وقۋ ۇلگەرىمى ۇزدىك دەپ تانىلعان ستۋدەنتتەرگە تەگىن ءبىلىم بەرۋ گرانتتارى مەن ارنايى ستيپەنديالار تاپسىردى.
ءوز ستۋدەنتتەرىنە الەۋمەتتىك تۇرعىدان قولداۋ كورسەتۋ ماقساتىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى كوپتەگەن ءىرى كومپانيالارمەن, كاسىپورىندارمەن ءوزارا ارىپتەستىك ورناتا وتىرىپ, ۇزدىك وقيتىن ستۋدەنتتەرگە ارنايى گرانت ءبولۋ سياقتى ساۋابى مول, وزگەلەرگە ۇلگى بولارلىق ءىس-شارانى وتكىزدى.
ەلىمىزدىڭ ءىرى كاسىپورىندارى مەن ۇيىمدارى بولگەن تەگىن ءبىلىم بەرۋ گرانتتارى ەۋرازيا ۇلتتىق ۋنيۆەرسيتەتىندە الەۋمەتتىك جاعدايى تومەن وتباسىلاردان شىققان, وقۋ ۇلگەرىمى ۇزدىك, قوعامدىق جۇمىستارعا بەلسەنە ارالاساتىن, ءوز قاتارىنىڭ الدى بولىپ جۇرگەن 50 ستۋدەنتكە بەرىلدى. سونداي-اق 20 ستۋدەنتكە اقتوبە وبلىسىنىڭ اكىمى تاعايىنداعان ءبىلىم بەرۋ گرانتتارى تاپسىرىلدى. مۇنداي يگى باستاماعا اقتوبە وبلىسىنىڭ اكىمدىگى, ەۋرازيا ۇلتتىق ۋنيۆەرسيتەتى مەن “نۇر وتان” حدپ قولعا العان ارنايى جوبا اياسىندا جۇزەگە اسىپ وتىرعان جۇمىستار مۇرىندىق بولىپ وتىر.
گرانتتاردى تابىس ەتۋ سالتاناتى اياقتالعاننان كەيىن ستۋدەنتتەرگە جولىعىپ, ولاردىڭ لەبىزدەرىن تىڭداعان ەدىك. “مۇنداي باقىتقا كەنەلگەنىمىزگە وتە قۋانىشتىمىز. ءبىزدىڭ تەگىن وقۋعا قول جەتكىزگەنىمىزدى ەستىپ اتا-انالارىمىز, باۋىر-تۋىستارىمىز قۋانىپ وتىر. مۇنى, ارينە, ەلىمىزدىڭ بىزگە سەنىپ تاپسىرعان ۇكىلى ءۇمىتى دەپ قابىلدايمىز. مەملەكەت تاراپىنان حالىققا, سونىڭ ىشىندە ستۋدەنتتەرگە ەرەكشە جاعدايلار جاسالىنىپ جاتىر. بىزگە مەملەكەت ءوزىنىڭ بەرەرىن بەردى, ەندىگى كەزەك, ءبىز ەلىمىزگە, مەملەكەتىمىزگە, حالقىمىزعا نە بەرەمىز دەگەن سۇراق توڭىرەگىندە ويلانىپ, وسى باعىتتا ەرىنبەي ەڭبەك ەتىپ, ەل بولاشاعىنا ءوز ۇلەستەرىمىزدى قوسۋىمىز شارت. بۇل – ادامدىق تا, ازاماتتىق بورىشىمىز” – دەدى ءىى كۋرس ستۋدەنتى دانارا وسپانوۆا.
اراي ۇيرەنىشبەكقىزى.