الماتى وبلىسى بالقاش اۋدانىندا قامىس پەن قۇرعاق ءشوپ ورتەنىپ, جالىن ۇلكەن اۋماققا تارالىپ جاتىر. ءورت سوندىرۋشىلەر ءتىلسىز جاۋمەن ءتورت كۇننەن بەرى ارپالىسىپ ءجۇر, دەپ جازادى Egemen.kz توتەنشە جاعدايلار مينيسترلىگىنىڭ ءباسپاسوز قىزمەتىنە سىلتەمە جاساپ.
ۆەدومستۆو حابارلاعانداي, ەلدى مەكەندەرگە قاۋىپ ءتونىپ تۇرعان جوق. «قازاۋەقۇتقارۋ» اق-نىڭ تىكۇشاعىمەن ءورت وشاقتارىنا اۋەدەن 65 رەت جالپى كولەمى 195 توننا سۋ توگىلدى.
«شىمتەزەك, جەتۋى قيىن, باتپاقتى جەرلەر مەن ەكپىندى جەل ءورت وشاقتارىن ءسوندىرۋ جۇمىستارىن قيىنداتىپ وتىر. ءورت وشاقتارىن ءسوندىرۋ جۇمىستارى جالعاسىپ جاتىر. وبلىستىق تجد باستىعى اسقار تويشىبەكوۆ وقيعا ورنىندا ءجۇر», دەلىنگەن حابارلامادا.جالىنمەن كۇرەس جۇمىستارىنا توتەنشە جاعدايلار دەپارتامەنتىنىڭ, جەرگىلىكتى اتقارۋشى ورگانداردىڭ كۇشتەرى مەن قۇرالدارى, سونداي-اق جەرگىلىكتى تۇرعىندار جۇمىلدىرىلىپ, ۇشقىشسىز ۇشۋ اپپاراتى قولدانىلىپ جاتىر.