الماتىلىق مەكتەپ وقۋشىلارى دەمالىس كۇندەرىن ءتيىمدى پايدالانىپ, قالاداعى ساياباقتاردىڭ بىرىنە مىڭنان اسا قۇس ۇياسىن ورناتتى. بالدىرعاندارعا ايرىقشا جىگەر بەرگەن جوبا «الماتى – ءبىزدىڭ ورتاق ءۇيىمىز» ناۋقانى اياسىندا قانات قاعىپ وتىر.
«Family» ساياباعىنا جينالعان 200-دەن اسا جەتكىنشەك الماتى تۇرعىندارىن ءتانتى ەتتى. ەكولوگيالىق جوباعا ءۇن قوسقان ورەندەر – قالانىڭ اۋەزوۆ اۋدانىنداعى DamuBala شىعارماشىلىق ۇيىرمەلەرىنىڭ شاكىرتتەرى. كوكتەم شىعا شاھاردىڭ ءار مەكتەبىندە «قۇستارعا ۇيا سىيلايىق» چەللەندجى ۇيىمداستىرىلىپ, وعان ءۇن قوسۋشىلار سانى ارتا تۇسكەن. مەكتەپ اۋلالارى مەن باسقا دا ساياباقتاردا پايدا بولعان قۇس ۇيالارى كورگەن جاننىڭ كوڭىلىنە جىلىلىق ۇيالاتادى.
«بۇل اكتسيانىڭ ماقساتى – ەكولوگيالىق بەلسەندىلىكتى ناسيحاتتاۋ جانە وسكەلەڭ ۇرپاقتى قورشاعان ورتانى ايالاۋ مەن قورعاۋعا باۋلۋ. قۇستارعا ۇيا سالىپ, تابيعاتپەن ەتەنە سىرلاسقان بالدىرعاندارعا بەلگىلى ءانشى توقتار سەرىكوۆ كەلىپ, العىس ايتىپ, انمەن شاشۋ شاشتى. وقۋشىلارىمىز ءدان ريزا», دەيدى دەنەشىنىقتىرۋ ءپانىنىڭ مۇعالىمى ايبانۋ قوجابەكوۆا.
وقۋشىلار مىڭداعان قۇس ۇياسىن «تەحنولوگيا» ساباعىندا جاساعان. ايرىقشا باستاما الداعى دەمالىس كۇندەرى دە جالعاسىن تاپپاق.
ەسكە سالساق, ساۋىردەن باستاپ مەگاپوليستە «الماتى – ءبىزدىڭ ورتاق ءۇيىمىز» ناۋقانى تۇساۋىن كەسكەن ەدى. جوباعا سايكەس ءاربىر تۇرعىن قالانى دامىتۋ مەن كوركەيتۋگە ۇلەس قوسا الادى. ماسەلەن, قالانىڭ بەلسەندى جاستارىنىڭ باسقوسۋى ءوتىپ, بىرنەشە ەكولوگيالىق جوبا تانىستىرىلدى. اتاپ ايتقاندا, قالاداعى 11 جوعارى وقۋ ورىندارىنىڭ اتىنان 11 ەكوجوبا ۇسىنىلعان. ولاردىڭ اراسىندا قاتتى قالدىقتاردى قايتا وڭدەۋگە, تاماق قالدىقتارىن بيوتىڭايتقىشقا اينالدىرۋعا, قايتا وڭدەلگەن پلاستيك قالدىقتارىنان تۇرمىستىق زاتتاردى وندىرۋگە, كوشەت وتىرعىزۋ مەن جانۋارلاردى قورعاۋعا قاتىستى جوبالار قولداۋ تاپقان.
ء«بىز اۆتورلىق شامداردى جاساۋدى قامتيتىن «ReCyGlass» جوباسىن تانىستىردىق. شىنى بوتەلكەلەردى قايتا وڭدەپ, ولاردى بىرەگەي ديزاينى بار شامدارعا اينالدىرامىز. جوبا قورشاعان ورتاعا تەرىس اسەردى ازايتۋمەن قاتار, لاستانۋ ماسەلەسىنە جانە تۇراقتى تۇتىنۋ تاجىريبەسىنە كوشۋ قاجەتتىلىگىنە نازار اۋدارادى», دەيدى نارحوز ۋنيۆەرسيتەتى ەكولوگيا فاكۋلتەتىنىڭ 4-كۋرس ستۋدەنتى سايا كۇنشاشەۆا.
الماتى