استانانىڭ جاسىل قۇرىلىس يندۋسترياسىندا ايتۋلى وقيعا بولدى. «Lake House» قۇرىلىس كومپانياسى ەلىمىزدىڭ جاسىل قۇرىلىس كەڭەسىمەن (KazGBC) بىرلەسىپ «Aruna City» تۇرعىن ءۇي كەشەنىندە جاسىل عيمارات «ماركەرىنىڭ» سالتاناتتى كورسەتىلىمىن وتكىزدى.
ايتىلعان تۇرعىن ءۇي كەشەنى KazGBC ازىرلەگەن ءومىر عيماراتتارىن ەكولوگيالىق باعالاۋدىڭ وتاندىق جۇيەسى بويىنشا قورىتىندى اتتەستاتسيادان ءساتتى ءوتىپ, ءومىر التىن سەرتيفيكاتىنا يە بولدى. مۇنداي جوعارى كورسەتكىش نازاردان تىس قالماۋى كەرەك ەدى. سوندىقتان وسى كەشەننىڭ ساۋدا كەڭسەسىندە ءتيىستى ءومىر ماركەرىن (بەلگىسىن) ورناتۋ ارقىلى نىساننىڭ ەكولوگيالىق تازالىعىن دالەلدەدى.
راسىندا, Aruna City تۇرعىن ءۇي كەشەنىنىڭ عيماراتى ەلىمىزدەگى مۇنداي تاڭبالاۋى بار ءبىرىنشى نىسان بولدى. بۇل شىن مانىندە قازاقستاننىڭ قۇرىلىس جانە ەكولوگيا سالاسىنداعى ۇلكەن وقيعا. جاسىل قۇرىلىستى دامىتۋدا جانە ونى حالىق اراسىندا كەڭىنەن ناسيحاتتاۋدا عيماراتتاردى جاسىلمەن تاڭبالاۋدىڭ ماڭىزى زور.
عيماراتتىڭ قاسبەتىنە نەمەسە ىشىنە ورناتىلعان سايكەس ەكولوگيالىق تازا ماركەر نىساننىڭ مارتەبەسىن بىلدىرەدى جانە ونىڭ جاقسى ورنالاسۋىنا ىقپال ەتەدى. سوندىقتان ەلىمىزدە جاسىل سەرتيفيكاتتاۋ ناتيجەلەرىن جاقسى قىرىنان كورسەتىپ, جاسىلمەن تاڭبالاۋ تاجىريبەسىن دامىتۋ ەرەكشە ماڭىزدى.
بۇل جاسىل عيماراتتاردى ەرەكشەلەۋگە جانە قوعام مەن ازىرلەۋشى كومپانيالاردىڭ نازارىن جاسىل قۇرىلىس تاقىرىبىنا اۋدارۋعا كومەكتەسەدى. مۇنداي ءىس-شارالار ەلىمىزدەگى قۇرىلىس سالاسىنىڭ تالاپقا ساي تۇراقتى دامۋ ماقساتىنا قول جەتكىزۋ ءۇشىن قاجەت.