سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ دەپۋتاتتارى جەتىسۋ جانە الماتى وبلىستارىندا اۆتوموبيل جولدارىن دامىتۋ ماسەلەلەرى بويىنشا جۇمىس وتىرىسىن وتكىزدى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
سەناتور جانبولات جورگەنباەۆ ءوز سوزىندە مەملەكەت باسشىسى قاسىم-جومارت توقاەۆ كولىك جانە لوگيستيكا سالاسىن دامىتۋعا ەرەكشە نازار اۋدارىپ وتىرعانىن اتاپ ءوتتى. الايدا, ەلىمىزدەگى جولداردىڭ جاعدايى سىن كوتەرمەيدى.
«2022 جىلى پرەزيدەنت جەتىسۋ وبلىسىنا ساپارى بارىسىندا كەربۇلاق جانە پانفيلوۆ اۋداندارىنداعى اۆتوموبيل جولدارىن جوندەۋگە قاتىستى تاپسىرما بەرگەن ەدى. الايدا, ەكى جىلدان استام ۋاقىتتان كەيىن ەشقانداي وزگەرىس بايقالعان جوق. اۋىل تۇرعىندارى كوتەرەتىن وزەكتى ماسەلەلەردىڭ ءبىرى – وسى. سونىمەن قاتار كەگەن جانە رايىمبەك اۋداندارىنداعى رەسپۋبليكالىق ماڭىزى بار اۆتوموبيل جولدارىنداعى جاعداي جۇرگىزۋشىلەردى الاڭداتىپ وتىر. ول تۋرالى جاقىندا الەۋمەتتىك جەلىلەردە حابارلاندى. سالالىق مەملەكەتتىك ورگاندار بەرگەن اقپاراتقا قاراعاندا, مەردىگەر كومپانيالاردىڭ جاۋاپسىزدىعى بايقالىپ تۇر. وسىنداي سالعىرتتىقتان ءوڭىر تۇرعىندارى زارداپ شەگىپ جاتىر», دەدى سەناتور.
دەپۋتاتتار الدىندا ءسوز العان الماتى وبلىسى اكىمىنىڭ ورىنباسارى الماس باتانوۆ وڭىردەگى احۋال تۋرالى ايتىپ بەردى. ول وسى جىلى 20,8 ملرد تەڭگە سوماسىنا 214 شاقىرىم وبلىستىق ماڭىزى بار جولداردى جوندەۋ جوسپارلانعانىن حابارلادى. ال وبلىس اكىمىنىڭ ورىنباسارى اسەت قاناعاتوۆ سەناتورلارعا وڭىردە 55 ەلدى مەكەندە جولدار مەن ىشكى كوشەلەردى جوندەۋدى كوزدەيتىن 29 جوبانى ىسكە اسىرۋ جوسپارلانىپ وتىرعانىن ايتتى.
وتىرىس بارىسىندا كولىك ءمينيسترىنىڭ ورىنباسارى ءساتجان ابلاليەۆتىڭ, «قازاۆتوجول» باسقارما توراعاسى دارحان يماناشەۆتىڭ جانە باسقا دا مۇددەلى مەكەمەلەر وكىلدەرىنىڭ باياندامالارى تىڭدالدى.