تۇركىستان وبلىسى سايرام اۋدانى قارامۇرت اۋىلىندا 49 جاستاعى ايەل كۇيەۋىن ءولتىردى دەگەن كۇدىكپەن 2 ايعا قاماۋعا الىندى. وتاسقاندارىنا 30 جىل بولعان ەر مەن ايەلدىڭ ءتورت پەرزەنتى بار. ەكى ۇلى مەن ەكى قىزى دا كامەلەت جاسىنا تولعان, دەپ حابارلايدى Egemen.kz.
وقيعا 12 ءساۋىر كۇنى مارقۇم مەن كۇدىكتىنىڭ ۇيىندە بولعان. تۋىستارىنىڭ سوزىنشە, ەر ادام مۇمكىندىگى شەكتەۋلى ۇلىنا قول كوتەرىپ, ايەل وعان اراشا تۇسكەن. ءسويتىپ كۇيەۋىن قىلقىندىرعان ايەلى, اقىرى, ونى ءولتىردى دەگەن كۇدىكپەن قاماۋعا الىندى.
كورشى-قولاڭنىڭ سوزىنشە, بۇل وتباسىنداعى العاشقى جانجال ەمەس. ءتورت بالانىڭ اناسى بۇعان دەيىن دە كۇيەۋىنىڭ جۇدىرىعىنان قاشىپ, كورشىلەردىڭ ۇيىنە تىعىلعان دەسەدى. ال ەر ادامنىڭ ىشىمدىككە تاۋەلدى ەكەنى انىقتالدى.
«سپيرتتىك ىشىمدىككە تويعان اكەمىزدەن ءبىز دە تالاي رەت قاشقانبىز. بىردە ەسىكتەن, بىردە تەرەزەدەن شىعىپ كەتەتىن ەدىك. اكەمىزدىڭ وزبىرلىعىنان قۇتىلۋ ءۇشىن اپكەلەرىم تۇرمىسقا ەرتە شىعىپ كەتتى. مەن دە مەكتەپتى اياقتاي سالا شەتەلگە وقۋعا ءتۇستىم. بىراق انام اكەمىزدى بىردە ارىقتان, بىردە جولدان تاۋىپ العانىن ايتىپ حابارلاسىپ ءجۇردى. وقۋدان دەمالىسقا كەلگەنىم سول ەدى جاعداي تاعى قايتالاندى. مەن ول كەزدە ۇيدە ءان تىڭداپ جاتقانمىن. سويتسەم, دالادا جانجال بولىپ جاتىر ەكەن», دەيدى ۇلى.
ۋچاسكەلىك پوليتسەيدىڭ ايتۋىنشا كۇيەۋىن ءولتىردى دەگەن كۇدىكتى 2019 جىلى قورعاۋعا الىنعان. ودان كەيىن پوليتسياعا شاعىم تۇسپەپتى. الايدا ۇزاق ۇنسىزدىكتىڭ سوڭى قايعىلى جاعدايمەن اياقتالدى.
«مۇنداي قايعىنى ەشكىمنىڭ باسىنا بەرمەسىن. بۇل وتباسىمەن 20 جىلدان بەرى كورشىمىز. ايەلى سونداي جاقسى. جۇمىسىنا تاڭەرتەڭ كەتىپ, كەشكە ءبىر-اق كەلەدى. ال كۇيەۋى كوبىنە ماس بولىپ جۇرەدى. كورگەن سايىن «قوي» دەيتىنمىن. بالالارى كىشكەنتاي كەزىندە ۇرىس-جانجال وتە كوپ بولاتىن. كەيىن سايابىرسىدى. سويتسەك, ايەلى ءبارىن ىشىنە جۇتىپ جۇرگەن ەكەن عوي», دەيدى وتباسىنىڭ كورشىلەرى.
كۇدىكتى ايەلدىڭ ۇستىنەن سوتقا دەيىنگى تەرگەۋ باستالىپ, ەكى ايعا قاماۋعا الىندى. ال العاشىندا «وعان كەشىرىم بەردىك» دەگەن قايىن جۇرتى كەيىن ويىنان اينىپ قالعان. ولار بۇل ىسكە ءۇشىنشى ادامنىڭ قاتىسى بار دەپ ويلايدى.
«بىزدىڭشە, اعامىزدى ايەلى جالعىز ءوزى ولتىرگەن جوق. بۇل جەردە تاعى ءبىر ادام بار. ءبارىن ايتىپ, قىلمىسقا كومەكتەسكەن. ءبىزدىڭ اعامىز قايتىس بولدى. ءيا, جەڭگەم. بىراق اركىم ءوز جازاسىن الۋى كەرەك», دەيدى مارقۇمنىڭ تۋىستارى.
ال كۇدىكتىنىڭ جاقىندارى قۇدالارىنىڭ بۇل ويىمەن كەلىسپەيدى.
ء«سىڭلىم وسى كۇنگە دەيىن كورمەگەندى كوردى. بىراق «ۇيات بولادى» دەپ شىداپ كەلدىك. شىدامنىڭ شەگى جەتكەن سياقتى. ونى اقتامايمىن. بۇل اۋىر جاعداي. بىراق ول ادامدى تەكتەن-تەككە ءولتىردى دەگەنگە سەنبەيمىن. ءوزىن-ءوزى قورعاپ ابايسىزدا جاساعان دەپ توپشىلايمىن. بالا-شاعاسىن ءوسىرىپ, ەندى عانا وزىنە كەلدى مە دەگەندە وتباسىنىڭ وسىلاي ويران بولارىن كىم بىلگەن؟», دەيدى كۇدىكتى ايەلدىڭ اپكەسى.