كورشى پاتەردەن قاتتى ايعاي ەستىگەن استانا تۇرعىنى پوليتسيا قىزمەتكەرلەرىنە شاعىمدانعان. قۇقىق قورعاۋ ورگاندارى شاقىرتۋ ورنىنا كەلگەنگە دەيىن كورشىلەردىڭ ۇيىندە جانجال باسىلىپ, ونداعى ەرلى-زايىپتىلار تاتۋلاسىپ ۇلگەرگەن. كەيىنىرەك شاعىمدانعان تۇرعىن وزىنە ايىپپۇل سالىنۋى مۇمكىن ەكەنىن ءبىلدى, دەپ حابارلايدى Egemen.kz.
كۋاگەردىڭ ايتۋىنشا, كەشكە قاراي كورشى پاتەردەن ەرلى-زايىپتىلاردىڭ جانجالداسىپ جاتقانى ەستىلگەن.
«وعان قوسا بالالاردىڭ «اكە, جوق, كەرەك ەمەس» دەپ ايقايلاعانى ەستىلدى. مەن پوليتسيا شاقىردىم. ولار تەز ارەكەت ەتتى, بىراق كەلگەنگە دەيىن ۇرىس باسىلىپ قالدى. شاقىرۋعا كەلگەن پوليتسيا قىزمەتكەرلەرى ماعان قايتا قوڭىراۋ شالىپ, ايەلىن ۇرىپ جاتقان ەر ادامنىڭ پاتەردە جوق ەكەنىن ايتتى. پاتەردە تەك بالالارى مەن ايەلى قالعان. پوليتسەيلەردىڭ سۇراقتارىنا جاۋاپ بەرگەن كەلىنشەك ارادا جانجال بولعانىن جوققا شىعاردى. كەيىن پوليتسەيەر ماعان «جالعان قوڭىراۋ» ءۇشىن ايىپپۇل سالىنۋى مۇمكىن ەكەنىن (اقبتك-ءنىڭ 438 بابى 30 اەك - 110 مىڭ تەڭگە) حابارلادى», دەيدى تۇرعىن.
زاڭگەر دانيار بايعاباتوۆ پوليتسيانىڭ شاقىرۋى ارىزعا تەڭ ەكەنىن ءتۇسىندىردى. مۇنى جاساماس بۇرىن دالەل جيناۋ كەرەك.
«پوليتسەيلەر ءوز كەزەگىندە سوتقا دەيىنگى سيپاتتاعى بارلىق ارەكەتتەردى - حاتتاما جاساپ, ساۋالناما جۇرگىزۋى ءتيىس. ەگەر ءسىز كورشىلەردىڭ ۇرسىپ جاتقانىن ەستىسەڭىز, وقيعانى نەمەسە دىبىستاردى بەينەجازباعا ءتۇسىرىپ الۋىڭىز كەرەك. بۇل جازبانى پوليتسياعا تاپسىرۋعا بولادى, سوندا ءسىزدىڭ قوڭىراۋىڭىز جالعان دەپ ەسەپتەلمەيدى», دەپ ءتۇسىندىردى زاڭگەر.