«بولاشاق» ستيپەندياسىنا قۇجات قابىلداۋ باستالدى

2024 جىلى قۇجات قابىلداۋ ءراسىمى 29 ساۋىردە باستالىپ, 25 قازاندا اياقتالادى. ىرىكتەۋ 10 مامىردان 30 قاراشاعا دەيىن جۇرگىزىلەدى.

«بولاشاق» ستيپەندياسىنا قۇجاتتار eGov.kz. پورتالى ارقىلى قابىلدانادى, ال «500 عالىم» تاعىلىمداماسى بويىنشا وتىنىمدەر العاش رەت bolashak.gov.kz-تەگى «ۇمىتكەردىڭ جەكە كابينەتى» بولىمىندە ونلاين جۇرگىزىلەدى. باسىمدىق ينجەنەرلىك-تەحنيكالىق جانە مەديتسينالىق ماماندىقتارعا بەرىلەدى, - دەپ جازىلعان حابارلامادا.

بيىل «بولاشاق» باعدارلاماسىنا 555 ستيپەنديا ءبولىندى. ونىڭ ىشىندە 395 ستيپەنديا ماگيستراتۋرا جانە رەزيدەنتۋراعا, 50 ستيپەنديا دوكتورانتۋراعا, 110 ستيپەنديا تاعىلىمدامادان وتۋگە ءبولىندى.

باسىم ماماندىقتار تىزبەسى ورتالىق جانە جەرگىلىكتى مەملەكەتتىك ورگانداردىڭ ءوتىنىمى, قىسقا مەرزىمدى جانە ۇزاق مەرزىمدى دامۋ ستراتەگياسى مەن جوسپارى بويىنشا قالىپتاستىرىلدى.

سونداي-اق «500 عالىم» باعدارلاماسى قازاقستاندىق عالىمدارعا الەمنىڭ بەدەلدى ۋنيۆەرسيتەتتەرىندە بىلىكتىلىگىن ارتتىرۋعا مۇمكىندىك بەرەدى. جىل سايىن اتالعان باعدارلاماعا 500 ستيپەنديا بولىنەدى.

ۇمىتكەرلەرگە قويىلاتىن تالاپتاردى, باسىمدىق بەرىلەتىن ماماندىقتار تىزبەسىن, ۋنيۆەرسيتەتتەر مەن عىلىمي ورتالىقتاردىڭ ءتىزىمىن bolashak.gov.kz سايتىنان كورۋگە بولادى.