مەملەكەتتىك كەڭەسشى ەرلان قارين مەن قىرعىزستاننىڭ مەملەكەتتىك حاتشىسى سۋيۋنبەك كاسمامبەتوۆ قىرعىز رەسپۋبليكاسىنىڭ پرەزيدەنتى سادىر جاپاروۆتىڭ قازاقستان رەسپۋبليكاسىنا رەسمي ساپارى اياسىندا استانا قالاسىندا ۇيىمداستىرىلعان قازاق-قىرعىز زيالىلارى مەن شىعارماشىلىق وكىلدەرىنىڭ فورۋمىنا قاتىستى.
مەملەكەتتىك كەڭەسشى ەرلان قارين اتالعان فورۋم ەكى ەلدىڭ زيالى قاۋىمى مەن شىعارماشىلىق سالا وكىلدەرىنىڭ ءبىر-بىرىمەن تىكەلەي قارىم-قاتىناس جاساۋىنا, سونداي-اق ادەبيەت, ونەر جانە مادەنيەتارالىق ىقپالداستىقتىڭ باسقا باعىتتارى بويىنشا زاماناۋي ءارى سۇرانىسقا يە جوبالاردى قولداۋعا تاماشا مۇمكىندىك بەرەتىنىن اتاپ ءوتتى.
سونىمەن قاتار ءىس-شارادا قىرعىزستاننىڭ مەملەكەتتىك حاتشىسى سۋيۋنبەك كاسمامبەتوۆ, قازاقستان پارلامەنتى ءماجىلىسىنىڭ دەپۋتاتى, قازاقستاننىڭ ەڭبەك ەرى باقتىقوجا ىزمۇحامبەتوۆ, قىرعىز رەسپۋبليكاسى پرەزيدەنتىنىڭ جانىنداعى مەملەكەتتىك ءتىل جانە ءتىل ساياساتى جونىندەگى ۇلتتىق كوميسسيانىڭ توراعاسى مەليس مۋراتاليەۆ, قازاقتىڭ تۇڭعىش عارىشكەرى, حالىق قاھارمانى توقتار اۋباكىروۆ, قىرعىز رەسپۋبليكاسى ۇلتتىق عىلىم اكادەمياسىنىڭ اكادەميگى ابدىلداجان اكماتاليەۆ, قازاقستان جازۋشىلار وداعىنىڭ توراعاسى مەرەكە قۇلكەنوۆ, «مۋراس» قىرعىزستان حالقىنىڭ تاريحي جانە مادەني مۇراسى قورىنىڭ توراعاسى كىياس مولدوكاسىموۆ ءسوز سويلەپ, وي-پىكىرلەرىن ورتاعا سالدى.
فورۋمدا شىعارماشىلىقتى شىڭداۋ, ۇرپاقتار ساباقتاستىعى جانە ەكى ەلدىڭ رۋحاني-مادەني مۇراسىن ساقتاۋعا قاتىستى وزەكتى ماسەلەلەر تالقىلاندى. سونىمەن قاتار ادەبيەت پەن ونەر سالاسىنداعى تىڭ باستامالار, ىنتىماقتاستىقتىڭ بۇگىنگى جانە كەلەشەكتەگى باعىتتارى تالقىلاندى.