قوس بالدىرعاننىڭ ءومىرىن ساقتاپ قالعان دارىگەرلەردىڭ بىلىكتىلىگىنە جەتىسۋلىقتار رازى. كوپسالالى وبلىستىق بالالار اۋرۋحاناسىنا ءۇش جاسار ەكى بالا ءارتۇرلى دەنە جاراقاتىمەن تۇسكەن. ءبىرى ءتورتىنشى قاباتتان قۇلاپ, اۋىر جاراقات السا, ەكىنشىسى سەپتيككە ءتۇسىپ كەتكەن. ماماندار شۇعىل ارەكەت ەتىپ, دەر كەزىندە بىرلەسە كومەك كورسەتكەننىڭ ناتيجەسىندە بالالاردى امان الىپ قالدى.
ءولىم اۋزىندا جاتقان كىشكەنتاي ناۋقاستاردى كورگەندە اق جەلەڭدىلەردىڭ ابدىراپ قالعانى راس, ايتكەنمەن دەرەۋ مەديتسينالىق كومەك كورسەتۋگە ۇمتىلادى. ەسىنەن تانىپ, تىنىس الا الماي جاتقان بالالاردى اۋرۋحاناعا ۋاقىتىندا جەتكىزەدى.
ء«تورتىنشى قاباتتان قۇلاعان بالانىڭ ميى شايقالىپ, تومەنگى جاق سۇيەگى سىنعان. سونداي-اق كەۋدە قۋىسى, ءىشى جاراقاتتانعان. بالاعا قاجەتتى كومەك كورسەتىلگەننەن كەيىن جانساقتاۋ بولىمىنە جاتقىزدىق. قازىرگى ۋاقىتتا ناۋقاس حيرۋرگيا بولىمىندە تولىقتاي ەم قابىلداپ, ۇيىنە شىعارىلدى», دەيدى كوپسالالى وبلىستىق بالالار اۋرۋحاناسىنىڭ ديرەكتورى قايرات وسپاگاليەۆ.
سونىمەن قاتار اتالعان اۋرۋحانانىڭ باس دارىگەرى سەپتيككە قۇلاعان بالانى قۇتقارۋ كەزىندە ونىڭ ەس-ءتۇسسىز كۇيدە بولعانىن ايتادى.
«وقيعا ورنىنا دەر كەزىندە جەتكەن توتەنشە جاعداي قىزمەتى مەن جەدەل جاردەم قىزمەتكەرلەرى بالاعا العاشقى مەديتسينالىق كومەك كورسەتىپ, جۇرەك-وكپە رەانيماتسياسىن ءساتتى وتكىزدى. بالا سەپتيكتە 10-15 مينۋتتاي بولعان. اۋرۋحانادا رەانيماتولوگ, تراۆماتولوگ, حيرۋرگ جانە پەدياتر مامانداردىڭ تەكسەرۋىنەن وتكەننەن كەيىن بالا جانساقتاۋ بولىمىندە ەم قابىلدادى. جاعدايى تۇراقتانعاننان كەيىن حيرۋرگيا بولىمىنە اۋىستىرىلدى. بۇگىندە بالا قاناعاتتانارلىق جاعدايدا اۋرۋحانادان شىعارىلدى», دەدى دارىگەر.
مامانداردىڭ ايتۋىنشا, وڭىردە كەيىنگى ءۇش ايدا 1 371 بالا وبلىستىق بالالار اۋرۋحاناسىنا دەنە جاراقاتىمەن تۇسكەن. ونىڭ ىشىندە 14 جاسقا دەيىنگى بالالار سانى 1 029-دى قۇراپ وتىر. سوندىقتان دارىگەرلەر اتا-انالاردى بالالارىن قاراۋسىز قالدىرماۋعا شاقىرادى. ويتكەنى كوپتەگەن كەلەڭسىز جاعداي اتا-اناسىنىڭ قاراۋىنسىز قالعان كەزدە بولادى.
جەتىسۋ وبلىسى