بۇگىن سەناتتا عىلىم جانە ءبىلىم بەرۋدى جەتىلدىرۋگە ارنالعان زاڭ قارالعانى ءمالىم. وتىرىس بارىسىندا Scopus بازاسىنا ەنەتىن حالىقارالىق عىلىمي جۋرنالدارعا ماقالا جاريالاۋ تۋرالى تالاپ دوكتورلىق ديسسەرتاتسيا قورعاۋعا كەدەرگى كەلتىرەتىنى جونىندە وتاندىق عالىمداردىڭ پىكىرى نازارعا الىندى. عىلىم جانە جوعارى ءبىلىم ۆيتسە-ءمينيسترى دارحان احمەد-زاكي سول تۇرعىدا جۇمىستار قولعا الىنعانىن اتاپ ءوتتى. وسىعان بايلانىستى پالاتا توراعاسى وتاندىق عالىمدار ءۇشىن شەتەلدىك باسىلىمدارعا ماتەريال جاريالاۋ وڭاي ەمەس ەكەنىن تىلگە تيەك ەتتى. سونداي-اق ول جالپى عىلىمعا قويىلاتىن تالاپتى تومەندەتپەۋ كەرەك ەكەنىن ايتتى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
«عىلىم جان-جاقتى زەرتتەلگەن قادامدى تالاپ ەتەدى. سوندىقتان PhD-ءدى قورعاۋعا ارنالعان كريتەريلەردى تومەندەتۋگە بولمايدى. بولون جۇيەسىنە كوشەردىڭ الدىندا مۇنداي ولقىلىقتىڭ بولعانىن بىلەمىز. سول كەزەڭدە كانديداتتار مەن دوكتورلاردىڭ كوبەيىپ كەتكەنىن جانە ولاردىڭ قالاي قورعالعانىن كوردىك. سول سەبەپتى, وندايعا قايتا ورالماۋ ءۇشىن PhD-ءدى ءوز دەڭگەيىندە ۇستاپ وتىرۋىمىز قاجەت. جەڭىل جولمەن قورعاعان ون PhD-دەن گورى ءبىر-ەكى ناعىز عالىمدى تاربيەلەپ شىقساق, ەلدىڭ عىلىمىنا دا, ەكونوميكاسىنا دا كوبىرەك ۇلەس قوساتىنىمىز انىق. سوندىقتان بۇرىنعى قاتەلىكتەرىمىزدەن ساباق الىپ, ونىڭ قايتالانۋىنا جول بەرمەۋىمىز كەرەك», دەدى ماۋلەن اشىمباەۆ.
سونداي-اق سەنات سپيكەرى عالىمدارىمىز شەتەلدە دە قۇرمەتكە يە بولۋى كەرەك ەكەنىن ايتىپ, مۇنداي دەڭگەي جوعارى تالاپتان باستالاتىنىنا نازار اۋداردى. ونىڭ پايىمىنشا, ءتيىستى مينيسترلىك اتالعان باعىتتاعى جۇمىستاردى جان-جاقتى پىسىقتاپ, الداعى ۋاقىتتا دا جۇيەلى تۇردە جالعاستىرا بەرۋى كەرەك.
ايتا كەتسەك, بۇگىن سەنات وتىرىسىندا «قر-نىڭ كەيبىر زاڭنامالىق اكتىلەرىنە عىلىم جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قارالىپ, ماقۇلداندى. جاڭا نورمالار عالىمداردىڭ الەۋمەتتىك كەپىلدىكتەرىن جاقسارتۋعا جانە عىلىمدا قارجى رەسۋرستارىن پايدالانۋدى وڭتايلاندىرۋعا باعىتتالعان.