سەناتور گەننادي شيپوۆسكيح سولتۇستىك قازاقستان وبلىسىنداعى گۋمانيتارلىق كومەك قابىلداۋ پۋنكتتەرىن جانە ەۆاكۋاتسيا ورتالىقتارىن ارالادى. دەپۋتات تۇرعىندارمەن كەزدەسۋ بارىسىندا شىعىندى وتەۋ ەرەجەسى تۇرعىسىندا جانە مەملەكەتتىك قولداۋ كورسەتۋ تۋرالى كوپتەگەن سۇراقتارعا جاۋاپ بەردى. ول زارداپ شەككەندەرگە كومەك كورسەتۋگە اتسالىسقان ەرىكتىلەرگە العىسىن ءبىلدىردى. سونداي-اق توتەنشە جاعدايدا ءتيىمدى ارەكەت ەتۋ جانە زارداپ شەككەندەردىڭ ءومىرىن قالپىنا كەلتىرۋگە كومەكتەسۋ ءۇشىن بارلىق تاراپتىڭ كۇش-جىگەرىن بىرىكتىرۋ قاجەتتىگىن اتاپ ءوتتى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
دەپۋتات نۇرلان بەكەنوۆ اقمولا وبلىسىنىڭ شورتاندى اۋدانىنا قاراستى دامسا اۋىلىنداعى تاسقىن سۋعا دايىندىق جۇمىسىنىڭ جاي-جاپسارىمەن تانىستى. ەگەر بوگەت كۇتپەگەن جاعدايدا بۇزىلاتىن بولسا, پايدالانىلاتىن بالاما جانە اينالما جولدار بار. ن.بەكەنوۆ اۋدانداعى احۋالدىڭ تۇراقتىلىعىن جانە سۋ تاسقىنى سالدارىن جويۋ جۇمىستارى ءوز دەڭگەيىندە جۇرگىزىلىپ جاتقانىن اتاپ ءوتتى.
سەناتورلار عالياسقار سارىباەۆ, الىشەر ساتۆالديەۆ جانە بيبىگۇل جەكسەنباي «استانا» ماڭىنداعى قارسى رەتتەۋشى سۋ قويماسىندا بولدى. اتالعان قويما ارقىلى – قالادان تاسقىن سۋ وتكىزىلەدى جانە قالا ىقتيمال تاسقىن سۋدان قورعالادى. سۋ دەڭگەيىنىڭ كوتەرىلۋى جانە تاسقىن سۋدىڭ قالا ينفراقۇرىلىمىنا اسەرىنە بايلانىستى قاۋىپكە وراي استانالىقتاردىڭ ءوتىنىشى ساپارعا سەبەپ بولعان ەدى. نىساندى ارالاۋ بارىسىندا ساراپشىلار قازىرگى ۋاقىتتا ەلوردانى سۋ باسۋ قاۋپى جوق ەكەنىن, احۋال اكىمدىكتىڭ باقىلاۋىندا تۇرعانىن جانە قارسى رەتتەۋشىنىڭ قالىپتى جۇمىس ىستەپ تۇرعانى تۋرالى سەناتورلارعا ايتىپ بەردى. دەپۋتاتتار كەزدەسۋ بارىسىندا توتەنشە جاعدايعا بايلانىستى جەدەل ارەكەت ەتۋ جانە مونيتورينگ جۇيەسىن ودان ءارى جەتىلدىرۋ قاجەتتىگىنە توقتالدى.