الماتىدا 4 جاسار وگەي ۇلىن ۇرىپ ءولتىردى دەگەن كۇدىككە ىلىنگەن 20 جاسار جىگىت سوت الدىندا كىناسىن مويىندامادى, دەپ جازادى Egemen.kz كتك تەلەارناسىنا سىلتەمە جاساپ.
2023 جىلدىڭ قىركۇيەگىندە 4 جاسار ءبۇلدىرشىن «الما سيتي» تۇرعىن ءۇي كەشەنىندە كوز جۇمدى.
ءبۇلدىرشىننىڭ اناسى بالاسىن وگەي اكەسىمەن بىرگە قالدىرىپ, جۇمىسقا كەتكەنىن ايتتى.
ءىستى تەرگەۋ بارىسىندا سامال وزىنەن التى جاس كىشى جىگىتپەن ەنەرگەتيكا جانە ەلەكتروندى تەحنولوگيالار كوللەدجىندە تانىسقانى انىقتالدى. ءبۇلدىرشىننىڭ اناسى اتالعان كوللەدجدە جۇمىس ىستەسە, ايىپتالۋشى دارحان داۋلەتوۆ سول وقۋ ورنىنىڭ ستۋدەنتى بولعان.
ايىپتالۋشى قايعىلى وقيعا بولعان كۇنگى ارەكەتىن سوت الدىندا بىلاي باياندادى: ء«بىر رەت جامباس تۇسىنان, قۇيرىعىنان الاقانمەن ۇرعانىم بار, ونى راستايمىن جانە سول ۋاقىتتا بالا قولدى-اياققا تۇرماي, بوي بەرمەي, ءۇي كىرەبەرىسىندە ارى-بەرى جۇگىرىپ, بالاباقشاعا بارۋدان باس تارتتى. سول كەزدە مەن ەسىكتى ق ۇلىپتاپ جاتقاندا ول ابايسىزدا باسپالداقتان قۇلاپ كەتكەن. قۇرمەتتى سوت, بالانى ءولتىرۋ مۇلدە ويىمدا بولعان ەمەس, بولمادى, قاتتى كۇش كورسەتكەن ەمەسپىن», دەدى ايىپتالۋشى.
الايدا سوت-مەديتسينالىق ساراپتاما ونىڭ ءسوزىن تەرىسكە شىعاردى. ساراپتاما ناتيجەسى مارقۇم ءبۇلدىرشىننىڭ باۋىرى مەن بۇيرەگى ەزىلىپ, ىشەگى ءۇزىلىپ كەتكەنىن ايعاقتادى. ءبۇلدىرشىن جانساقتاۋ بولىمىندە كوز جۇمعانىن ايتا كەتۋ كەرەك.