بۇل – تاميل نادۋداعى مادراس ۋنيۆەرسيتەتىندە تۇندە وقيتىن ءۇندى ستۋدەنتى. 1905 جىل. ستۋدەنتتەر تۇندە ساباق وقىپ وتىرعاندا ۇيىقتاپ قالماس ءۇشىن شاشىن قابىرعاداعى شەگەگە بايلاپ قوياتىن بولعان. جالپى, بۇل ءداستۇرلى ءادىس ەكەن. قىتاي حالقى ونى ەكى مىڭ جىل بويى قولدانىپ كەلەدى. بۇل ءادىس تۋرالى ەڭ العاش I عاسىردا حان شەجىرە كىتابىندا جازىلعان.
الەمدە تالاي قىزىق بار دەگەن وسى ەمەس پە؟ ايتپەسە قالعىپ-مۇلگىپ وتىرعان ادامنىڭ ميىنا وقۋ كىرە مە دەۋىڭىز مۇمكىن.
ءيا, اتالعان قىزىقتى ءادىستىڭ تۇپكى ءارى جاناما ماعىناسى – ءوزىڭدى وتىرعىزۋ. ياعني سول ىسكە ۋاقىتىڭدى ارناۋ, جان-تانىڭمەن, ساناڭمەن بەرىلۋ, ەڭبەك ەتۋ, قاجىر-قايراتىڭدى جۇمساۋ. ومىردە ءبىر انىق ەرەجە بولسا, ول – ءبارى ەڭبەكپەن كەلەدى. كەز كەلگەن ىسكە بارىڭدى سالماساڭ, ۇلكەن ناتيجەگە جەتۋ قيىن. دەسەك تە كۇندىز-ءتۇنى جازۋمەن وتىرىپ, توم-توم ەڭبەك قالدىرسا دا ءبىر دە ءبىر ماراپات, اتاعى جوق ەلەۋسىز تۇلعالار بار. ادىلەتسىزدىك دەگەن دە ءومىردىڭ ءبىر انىق ەرەجەسى بولىپ تۇرعانى عوي. بۇل ەندى بولەك اڭگىمە.
جالپى, شىعارماشىلىق ادامدارىنا جالقاۋلىق ورتاق. قانشاما تالانتتى جاندار جازۋ ۇستەلىنە كوپ وتىرماعاندىعىنىڭ كەسىرىنەن كەڭ سارىندى دۇنيەلەر جازا الماي كەتتى. قازاق ادەبيەتىندە دە مىسالى جەتەرلىك. قاراپايىم وزىمىزدە دە ماقالا جازۋعا ەرىنەتىن, باستاعان دۇنيەنى اياعىنا جەتكەنشە سوزىپ, كومپيۋتەرگە ءجۇز وتىرىپ, ءجۇز تۇراتىن كەزدەر بولادى. وسىندايدا شاشىن بايلاپ قويىپ, جازۋ ۇستەلىنەن تىرپ ەتىپ تۇرا المايتىن الگى ءادىستىڭ يگىلىگىن ەرىكسىز مويىندايسىڭ. وسى ورايدا ءبىر عالىمنىڭ: «جازۋ ءۇشىن جامباس كەرەك» دەگەنى ەسىمە ءتۇسىپ وتىر.