تۇرسىنجان شاپايدىڭ «ماقتانعا ماداق!» اتتى ماقالاسىن وقىپ وتىرىپ, مىنا ءبىر ۇزىندىگە كوڭىلىم اۋدى: «جاقىندا اكىم اعا تارازي ءبىر جيىندا: «وسى گرۋزيندەر نەگە ۇزاق جاسايدى, بىلەسىڭدەر مە؟» – دەپ سۇرادى. ءبىز قايدان بىلەيىك: بىرەۋمىز – تاۋدىڭ, بىرەۋمىز – سۋدىڭ, ەندى ءبىرىمىز شاراپتىڭ كۇشى دەدىك. لاعىپ كەتىپپىز. مۇنىڭ ءبىرى دە ەمەس ەكەن. سۇراق قويۋشىنىڭ ايتۋىنشا, ونىڭ باستى سەبەبى – گرۋزيندەردىڭ ءبىر-ءبىرىن كەرەمەت ماقتاي بىلەتىندىگىندە كورىنەدى...» قىزىق.
ءبىزدىڭ ادەبي جيىندار دا ماقتاۋسىز وتپەيدى. ماقتانۋ دا كوپ. اۆتوردى دا, شىعارماسىن دا جوسىقسىز ماقتاۋ, شاپالاق ۇرۋ, شاپان جابۋ... بۇگىنگى قازاقتان دا قالماي كەلە جاتىر. گرۋزيندەردىڭ تامسىلىمەن تارقاتساق, اقىن-جازۋشىلار دا, بالكي, ۇزاق ءومىر سۇرگىسى كەلەتىن شىعار. بەلگىلى جاي عوي, كىم-كىم دە بولسىن, قارتايعىسى كەلمەيدى, قارتايسا دا مىنا ءومىردى قيىپ كەتكىسى كەلمەيدى. ءومىر بولعاندا دا, اناۋ-مىناۋ ءومىر ەمەس, اتاق-داڭقى, توم-توم كىتابى ءھام وقىرمانى تاعى بار.
راسىندا, ايتايىن دەگەنىمىز بۇل ەمەس, بىرەۋدىڭ ابىرويىن اسپانداتىپ ماقتاۋ, جىلى سوزبەن شابىسىنا شابىس قوسۋ, تالانتىنا جارىق ءتۇسىرۋ, كوڭىلىنە مەدەت بولۋ, ارينە, جاقسى. ەگەر ول سول ءسوزىڭىزدىڭ سالماعىنا تۇراتىن بولسا عانا. اگاراكي, ماقتاۋىڭىز ءسال-ءپال ونىڭ دەڭگەيىنەن اسىپ كەتسە نەمەسە ماداق ءسوزىڭىزدى اۆتوردىڭ ماقتاۋعا قارسى يممۋنيتەتى تومەن بولىپ, رۋحاني تۇرعىدا كوتەرە الماي, شالىققا ۇرىنىپ, ەندى ەشقاشان ءتاۋىر شىعارما جازا المايتىنداي بولسا, نە كەرەك, وبالى سىزدىكى. ءومىرىنىڭ سوڭىنا دەيىن ءسىز ماقتاعان شىعارماسىن بەتكە ۇستاپ, ءسىز ايتقان سوزدەردى مەدەت تۇتىپ, ءونىمدى ەڭبەك ەتپەيدى, بىراق ۋاقىتتىڭ اعىنىمەن ماقتانشاققا اينالىپ بارا جاتادى.
كەيىن حالتۋرششيككە دە اينالار, كىم بىلەدى... بالكي, ودان تالانتتى قالامگەر شىعار ما ەدى؟ كىم كىنالى: مەزگىلسىز ايتىلعان ماقتاۋ ءسوز كىنالى. پۋشكين: «حۆالۋ ي كلەۆەتۋ پريەملي راۆنودۋشنو» دەسە, ال اباي: «سەنبە جۇرتقا تۇرسا دا قانشا ماقتاپ» دەگەن. ءسوز-اق.