سەناتور ساعىندىق لۇقپانوۆ اتىراۋ وبلىسىنداعى ماحامبەت اۋدانىندا ەكىنشى تولقىنمەن كەلۋى ىقتيمال تاسقىن سۋعا دايىندىق بارىسىمەن تانىستى. دەپۋتات ساپار بارىسىندا اۋدان ورتالىعىنداعى بوگەت سالۋ ايماعىندا بولىپ, اسكەري قىزمەتشىلەرمەن جانە ەرىكتىلەرمەن اڭگىمەلەسىپ, كورسەتكەن كومەكتەرى ءۇشىن ولارعا العىسىن ءبىلدىردى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
«قازىر اۋداننىڭ بارلىق اۋىلدارىندا تاسقىن سۋ زاردابىن بولدىرماۋ ءۇشىن دايىندىق جۇمىستارى كۇشەيە ءتۇستى. بوگەت قۇرىلىسى قارقىندى ءجۇرىپ جاتىر. الايدا, جەرگىلىكتى اتقارۋشى ورگاندار احۋال ودان ءارى قيىنداپ كەتپەۋى ءۇشىن اتالعان ماسەلەگە كوبىرەك نازار اۋدارۋى ءتيىس», دەدى سەناتور س.لۇقپانوۆ.
تاسقىن سۋعا قارسى ءىس-قيمىل قاراعاندى وبلىسىندا دا جالعاسىن تاپتى. دەپۋتات سەرىك وتەشەۆ تاسقىن سۋعا ۇشىراعان بىرقاتار اۋدانداردى ارالادى. سۋ تاسقىنى سالدارىنان زارداپ شەككەن ۇيلەردىڭ تۇرعىندارىنا كومەك كورسەتۋ, اۋماقتاردى اباتتاندىرۋ, جارىقتاندىرۋ, جولداردى جوندەۋ جانە گاز جەتكىزۋ ماسەلەلەرى حالىقپەن كەزدەسۋلەردە تالقىلاۋدىڭ باستى تاقىرىبى بولدى.
«قاراعاندى وبلىسىندا اۋقىمدى سۋ باسۋ قاۋپى زور بولدى. سۋ ودان ءارى كەتكەندىكتەن ايتارلىقتاي تاسقىن سۋ بولعان جوق. سۋدىڭ كەلۋىنەن زارداپ شەككەن تۇرعىندار قاجەتتى بارلىق زاتتارمەن قامتاماسىز ەتىلۋى ءتيىس. مەملەكەت باسشىسى جاقىندا سويلەگەن سوزىندە زارداپ شەككەن بارلىق ازاماتتارعا كومەك كورسەتىلەتىنىن اتاپ ءوتتى. بۇعان ۇكىمەت تە, دەپۋتاتتار دا جاردەمدەسەتىن بولادى», دەدى سەناتور س.وتەشەۆ.
سەنات دەپۋتاتى جانبولات جورگەنباەۆ الماتى وبلىسىنداعى ىلە اۋدانىندا سالىنعان سۋ قويماسى بوگەتىن قالپىنا كەلتىرۋ بارىسىمەن تانىستى. بوگەت بۇزىلعان كەزدە ءتيىستى شارالار قابىلدانعانى اتاپ ءوتىلدى. دەگەنمەن, اتالعان ماسەلە قايتادان تۋىنداۋى ىقتيمال. ويتكەنى, سۋ بوگەتى قۇرىلىسى 1910 جىلى سالىنعان جانە قازىر قايتا جاڭعىرتۋدى قاجەت ەتەدى. وسى ماسەلەنى شەشۋدىڭ تەتىكتەرى, سونداي-اق ەلدى مەكەندەردەگى سۋ بۇرۋدى مۇقيات زەردەلەۋ جانە جۇيەلەۋگە بايلانىستى ماسەلەلەر تالقىلاندى.
«قازىرگى ۋاقىتتا رەسپۋبليكالىق دەڭگەيدە شۇعىل نازار اۋدارۋدى تالاپ ەتەتىن بىرقاتار ماڭىزدى ماسەلەلەر بار. سەناتورلار وڭىرلەردە بولعان كەزدە توتەنشە جاعدايدىڭ زاردابىمەن كۇرەستە بارىنشا كومەك كورسەتەدى. سەناتورلار ءوز كەزەگىندە بولاشاقتا مۇنداي توتەنشە جاعدايدىڭ الدىن الۋ ءۇشىن زاڭنامالىق دەڭگەيدە اتسالىسۋعا دايىن», دەدى سەناتور.