پرەمەر-مينيستر, سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى كەزەڭىنىڭ سالدارىن جويۋ جونىندەگى رەسپۋبليكالىق شتابتىڭ جەتەكشىسى ولجاس بەكتەنوۆ باتىس قازاقستان وبلىسىندا جۇرگىزىلىپ جاتقان جۇمىستاردىڭ بارىسىن جانە مەملەكەت باسشىسىنىڭ تاپسىرمالارىن ورىنداۋ شارالارىن تەكسەردى.
وڭىردە سۋ تاسقىنىنا قاتىستى كۇردەلى جاعداي قالىپتاسىپ وتىر. وسىعان بايلانىستى ۇكىمەت باسشىسى تىكۇشاقپەن ارالاۋ كەزىندە جايىق وزەنى ارناسىنىڭ جاي-كۇيىمەن تانىستى. ۇكىمەت باسشىسى ەلدى مەكەندەرگە كەلەتىن سۋدىڭ كولەمىن ازايتۋ ماقساتىندا سۋ قويمالارى جۇيەسىندە سۋدى بارىنشا جيناقتاۋ جونىندە تاپسىرمالار بەردى.
تۇرعىزىلعان بوگەتتەردى قاراپ شىققاننان كەيىن ولجاس بەكتەنوۆ تۇرعىنداردىڭ ءومىرى مەن دەنساۋلىعىن جانە مۇلكىن بارىنشا قورعاۋ ءۇشىن جۇمىس قارقىنىن باسەڭدەتپەۋدى تاپسىردى.
«قازىرگى ۋاقىتتا اقتوبە, قوستاناي, قۇلسارى قالالارىنداعى جاعداي تۇراقتالىپ كەلەدى. پەتروپاۆلدا سۋ تاسقىنىنىڭ شارىقتاۋ شەگى باستالادى, مۇندا نەگىزىنەن باۋ-باقشا سەرىكتەستىكتەرى سۋ باسۋ ايماعىندا قالماق. جايىق وزەنىندە كۇردەلى جاعداي سەيىلمەدى. اۋقىمدى سۋ كولەمى رەسەي فەدەراتسياسى اۋماعىندا ايتارلىقتاي شىعىن كەلتىرىپ, ورال مەن اتىراۋعا قاراي جىلجىپ كەلەدى. بۇگىندە جايىق وزەنىندەگى سۋ دەڭگەيى 7,2 مەتردى قۇراپ, كۇن سايىن ارتىپ كەلەدى. قاۋىپ بەلگىسى – 8,5 مەتر. سۋدىڭ قاۋىپتى دەڭگەيىن ۇستاپ تۇرۋعا مۇمكىندىك بەرەتىن قورعانىس بوگەتتەرى سالىندى. قازىر باستى مىندەت – ورال مەن اتىراۋدى تاسقىننان ساقتاپ قالۋ. ول ءۇشىن اكىمدىكتەردىڭ, تجم, قورعانىس مينيسترلىگى مەن ۇلتتىق ۇلاننىڭ, ارنايى تەحنيكالىق كۇشتەرى جۇمىلدىرىلدى. ەرىكتىلەر كوپ كومەك كورسەتىپ جاتىر. ازاماتتاردىڭ قاۋىپسىزدىگىن قامتاماسىز ەتۋ ماقساتىندا باتىس قازاقستان جانە اتىراۋ وبلىستارىنىڭ اكىمدەرىنە قاجەت بولعان جاعدايدا سۋ باسۋ ايماعىنداعى ۇيلەرىن تاستاپ شىعۋدان باس تارتقان تۇرعىنداردى ءماجبۇرلى تۇردە ەۆاكۋاتسيالاۋ تاپسىرىلدى. بۇل رەتتە بارلىق بوس ۇيلەر پوليتسيانىڭ تاۋلىك بويى باقىلاۋىندا بولادى», دەپ اتاپ ءوتتى و.بەكتەنوۆ.
سونىمەن قاتار ۇكىمەت باسشىسى تۇرعىنداردىڭ ساۋالدارى نەگىزىندە اكىمدىكتەرگە سۋ تاسقىنىنان كەلتىرىلگەن زالالدى وتەۋ الگوريتمىن ءتۇسىندىرۋ جۇمىستارىن جۇرگىزۋدى تاپسىردى.
«سۋ تاسقىنىنىڭ باستالۋ ۋاقىتى ءار وڭىردە ءارتۇرلى. كەيبىر تۇرعىندار ءوتىنىش بەرۋ مەرزىمىنە قاتىستى الاڭداپ وتىر. ۋاقىت شەكتەۋلەرىنە قاراماستان تۇرعىنداردىڭ وتىنىشتەرىن قابىلداۋ قاجەت. جوعارىدا ايتقانىمداي, بيۋروكراتيالىق ارەكەتتەرگە جول بەرىلمەۋگە ءتيىس», دەپ اتاپ ءوتتى ولجاس بەكتەنوۆ.