قازىر وتە كۇردەلى جاعدايدى باستان كەشىپ جاتىرمىز. قارعىن سۋدىڭ قارقىنى قاتتى بولىپ جاتىر. ەلىمىزدىڭ بىرنەشە ايماقتارىن سۋ باستى. بۇل – تابيعي اپات. اپاتتىڭ ايتىپ كەلمەيتىنى بەلگىلى. سوندىقتان وسىنداي سىندارلى ساتتە كۇش بىرىكتىرىپ, جۇمىلا ارەكەت ەتۋ – ەلىمىز ءۇشىن اسا ماڭىزدى.
الايدا «كورشىسىنىڭ ءۇيى ورتەنگەندە باس ءۇيىتىپ الاتىن» قاراقان باسىن ويلاعان جاندار دا جوق ەمەس ەكەن. حالىققا بارىنشا قولۇشىن سوزۋدىڭ ورنىنا كولىكتىڭ, ازىق-ت ۇلىكتىڭ, قالا بەردى سۋدى بوگەيتىن قۇم قاپشىقتارىنىڭ باعاسىن كوتەرىپ ساتۋ – ادامشىلىققا جاتپايتىن ارەكەت. مۇندايدان اۋلاق بولساڭىزدار ەكەن! «كەمەدەگىنىڭ جانى ءبىر» دەگەن قازاق. قىسىلتاياڭ ۋاقىتتا قيناپ العان تەڭگەنىڭ ەش بەرەكەسى بولمايدى.
وسى تۇستا ەل ىشىنە جىك سالىپ, جار استىنان جاۋ شاقىراتىن بلوگەرلەر مىڭداعان وقىرماندارىنىڭ الدىنداعى جاۋاپكەرشىلىگىن سەزىنۋى كەرەك. ءدۇدامال حابار تاراتىپ, دۇربەلەڭ سالۋعا بولمايدى. وسىنداي جەكەلەگەن جانداردىڭ كەسىرىنەن, ەتىگىمەن سۋ كەشىپ حالىققا كومەك كورسەتەتىن جانكەشتى ازاماتتاردىڭ ەڭبەگى ەلەۋسىز قالىپ قويادى. سوندىقتان ءبارىمىز ەلدىڭ بىرلىگىن باستى ورىنعا قويۋىمىز كەرەك. ەڭ باستىسى – جان شىعىنىنا جول بەرمەۋ.
«الپىس كۇن تاسقان داريا التى كۇندە قايتادى» دەيدى دانا حالقىمىز. بۇل كۇن دە وتەر. اتقارۋشى ورگانداردىڭ ولقىلىقتارىن تۇزەپ, اپاتتىڭ قايتادان قايتالانباۋىنا نازار سالۋىمىز كەرەك. ال بوگەتتەرگە بولىنگەن قاراجاتتى ورنىنا جۇمساماعان بيلىك وكىلدەرى حالىق الدىندا جاۋاپقا تارتىلادى دەگەن ويدامىن.
ءوزىم جۇمىس ىستەيتىن تەاتر ۇجىمى دا ءۇنسىز قالمايدى. بۇعان دەيىن دە ۇجىمىمىز اپاتتى وڭىرلەرگە قارجىلاي كومەك كورسەتىپ وتىرعان. قازىرگى جاعدايدا دا تەاتر باسشىلىعى كومەك كورسەتۋ مەن قولداۋ ءبىلدىرۋ جۇمىستارىنىڭ جوسپارىن قىزۋ تالقىلاپ جاتىر.
تىلەكتەس مەيراموۆ,
قازاقستاننىڭ حالىق ءارتىسى, ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ اكتەرى