قارجى نارىعىن رەتتەۋ جانە دامىتۋ اگەنتتىگى قارىز الۋ كەزىندە راسىمدەلەتىن ساقتاندىرۋ شارتتارىنا قاتىستى ەنگىزىلگەن جاڭا زاڭنامالىق وزگەرىستەر تۋرالى ەسكەرتتى. بۇل وزگەرىستەر قارىز الۋشىلاردىڭ قۇقىقتارىن قورعاۋدى كۇشەيتۋگە جانە قارجىلىق جۇكتەمەنى ازايتۋعا باعىتتالعان, دەپ جازادى Egemen.kz.
ەندى بانكتەر مەن ميكروقارجى ۇيىمدارى ساقتاندىرۋ اگەنتتەرىنە تولەنەتىن كوميسسيالىق سىياقىنى ساقتاندىرۋ سىيلىقاقىسىنىڭ 10% دەڭگەيىنەن اسىرمايدى. بۇعان دەيىن بۇل كورسەتكىش كەي جاعدايلاردا 90%-عا دەيىن جەتكەن, بۇل تۇتىنۋشىلار ءۇشىن قوسىمشا شىعىنعا اينالعان.
جاڭا تالاپتارعا سايكەس, بانكتەر مەن مقۇ قارىز بەرۋ كەزىندە ساقتاندىرۋدى مىندەتتەۋگە نەمەسە بەلگىلى ءبىر ساقتاندىرۋ كومپانياسىن تاڭداۋعا ماجبۇرلەۋگە قۇقىلى ەمەس. ساقتاندىرۋ ءراسىمى ەركىن تاڭداۋ نەگىزىندە جۇزەگە اسادى. ەگەر ۇسىنىلعان شارتتار قاناعاتتاندىرماسا, قارىز الۋشى وزگە ساقتاندىرۋ ۇيىمىن تاڭداي الادى.
قارۋ اسىنعانعا – قارىز جوق: ساربازدارعا نەسيە بەرۋگە نەگە تىيىم سالىنباق؟
ماڭىزدى جاڭالىقتاردىڭ ءبىرى – قارىز الۋشىنىڭ ساقتاندىرۋ شارتىن جاسالعان كۇننەن باستاپ 14 كۇن ىشىندە باس تارتۋ قۇقىعىنىڭ ساقتالۋى. مۇنداي جاعدايدا بانكتەر مەن ميكروقارجى ۇيىمدارى قارىز شارتىنداعى سىياقى مولشەرلەمەسىن نەمەسە كوميسسيانى قايتا قاراۋى مۇمكىن.
سونىمەن قاتار قارىز شارتىن جاساۋ كەزىندە ساقتاندىرۋ تالاپ ەتىلمەسە, سىياقى مولشەرلەمەسى نەمەسە كوميسسيا العاش بەكىتىلگەن دەڭگەيدەن اسپاۋى ءتيىس. بۇل نورما تۇتىنۋشىلاردى قوسىمشا شىعىنداردان قورعاۋعا باعىتتالعان.
قارىزىن تولەمەگەن بانكتەرگە بايلانىستى نە وزگەردى؟
تاعى ءبىر ماڭىزدى وزگەرىس – ساقتاندىرۋ شارتىن بۇزۋ كەزىندە تولەنگەن سىيلىقاقىنى قايتارۋ ءتارتىبى ناقتىلاندى. قارىز الۋشى مىندەتتەمەسىن تولىق وتەگەن جاعدايدا, ساقتاندىرۋ ۇيىمى پايدالانىلماعان كەزەڭگە سايكەس قاراجاتتى قايتارۋعا مىندەتتى. بۇل سومادان تەك 10%-دان اسپايتىن شىعىستار عانا شەگەرىلۋى مۇمكىن. قايتارۋ ءوتىنىش بەرىلگەن كۇننەن باستاپ 5 جۇمىس كۇنى ىشىندە جۇزەگە اسادى.
ماماندار ازاماتتارعا ساقتاندىرۋ شارتىن راسىمدەۋ كەزىندە ونىڭ بارلىق تالاپتارىن مۇقيات زەردەلەۋدى, سونىڭ ىشىندە سىياقى مەن اگەنتتىك كوميسسيا مولشەرىنە ەرەكشە نازار اۋدارۋدى ۇسىنادى.
ەنگىزىلگەن وزگەرىستەر ءادىل ءارى باسەكەگە قابىلەتتى ساقتاندىرۋ نارىعىن قالىپتاستىرۋعا, سونداي-اق ازاماتتاردىڭ قارجىلىق ساۋاتتىلىعىن ارتتىرۋعا ىقپال ەتپەك.
قارىزسىز قوعام: قارجى ساۋاتى قاي دەڭگەيدە؟