پرەمەر-ءمينيستردىڭ ءبىرىنشى ورىنباسارى رومان سكليار سولتۇستىك قازاقستان وبلىسىنداعى زارەچنىي كەنتى ۋششەۆ كوشەسى مەن پريبرەجنوە اۋىلى بويىنداعى بوگەتتەردى ارالادى, ويقالاداعى سۋ تاسقىنىنا قارسى قورعانىس بەكىنىستەرىنىڭ دايىندىعىن تەكسەردى, ەۆاكۋاتسيالاۋ پۋنكتىنىڭ دايىندىعىن زەردەلەپ, پەتروپاۆل قالاسىنىڭ اكىمى سەرىك مۇحامەديەۆتىڭ بايانداماسىن تىڭدادى.
قالا اكىمى ۇلكەن سۋدىڭ كەنتكە ءۇش كۇندە جەتەتىنىن حابارلادى. ول نىعايتىلعان بوگەت سۋدىڭ ءبىرىنشى اعىنىن عانا ۇستايتىنىن اتاپ ءوتتى. الايدا بولجام بويىنشا ساياجاي اۋماعىنا جان-جاقتان سۋ تاسقىنى كەلەدى جانە 200 ءۇيدىڭ 132-نە قاۋىپ ءتونىپ تۇر. ءبىرىنشى ۆيتسە-پرەمەر تەز ارادا ازاماتتاردى ەۆاكۋاتسيالاۋدى باستاۋدى تاپسىردى.
«ادامدارعا 2017 جىلمەن سالىستىرعاندا, بيىلعى سۋ تاسقىنىنىڭ اۋقىمدى ەكەنىن ءتۇسىندىرۋ كەرەك, ويتكەنى اۋىل ويدا ورنالاسقان جانە ينجەنەرلىك قۇرىلىستار سۋدىڭ كوتەرىلۋىنە شىداماۋى مۇمكىن, تۇرعىنداردى ەۆاكۋاتسيالاۋ ءۇشىن ەكى كۇن بار», دەدى ۆيتسە-پرەمەر.
سونداي-اق رومان سكليار ەۆاكۋاتسيالاۋدان باس تارتقان تۇرعىندارمەن تۇسىندىرمە اڭگىمە جۇرگىزىپ, جازاتايىم وقيعالاردى بولدىرماۋ ءۇشىن ساياجاي ايماعىنان وتباسىلاردى كوشىرۋدى باقىلاۋعا الۋدى تاپسىردى.
«ازاماتتارعا الداعى سۋ تاسقىنىنىڭ اۋىرلىعىن تۇسىندىرىڭىزدەر. سەرگەەۆ سۋ قويماسىنان كوپ سۋ كەلەدى, سوندىقتان اۋماقتى قاتتى سۋ باسادى. بوگەتتى نىعايتۋ جەدەلدەتىلگەن تۇردە اياقتالدى, بىراق ول تەك سۋ از كەزەڭدەرىندە قورعاي الادى. سوندىقتان مۇندا تۇراتىنداردى دەرەۋ ەۆاكۋاتسيالاۋ كەرەك. ەشكىم زارداپ شەكپەۋى قاجەت», دەپ تۇيىندەدى ر.سكليار.
پرەمەر-ءمينيستردىڭ ءبىرىنشى ورىنباسارى سەرگەەۆ سۋ قويماسىنىڭ بۇكىل تاريحىنداعى سۋ تاسقىنىنىڭ ءابسوليۋتتى ماكسيمالدى كەزەڭىنە جەتكەنىن اتاپ ءوتتى. ول بارلىق ەسەپتەۋ جۇرگىزىلگەنىن, 12-14 ءساۋىر ارالىعىندا پەتروپاۆل قالاسىنا ۇلكەن سۋ كەلەتىنىن ءتۇسىندىردى.
رومان سكليار «قىزىلجار سۋ» جشس سورعى ستانساسىنىڭ ستراتەگيالىق ۋچاسكەسىندەگى بوگەتتى نىعايتۋ ءۇشىن سۋ تاسۋ قاۋپىن بارىنشا ازايتۋدى, ارنايى تەحنيكانى جۇمىلدىرۋدى, ينەرتتى ماتەريالدارمەن جانە جۇمىس كۇشىمەن قامتاماسىز ەتۋدى تاپسىردى.
«سورعى ستانساسىنا كەلەتىن بولساق, بۇل – ستراتەگيالىق ماڭىزدى نىسان. ءبىز قىسقا مەرزىمدە قوسىمشا بوگەتتى تۇرعىزدىق. ونىڭ جۇمىسى قامتاماسىز ەتىلەدى. قوسىمشا ديزەل گەنەراتورى ورناتىلدى. قالا كەز كەلگەن جاعدايدا ءۇزىلىسسىز سۋمەن قامتاماسىز ەتىلۋى كەرەك. جوسپارلاعان جۇمىستاردىڭ بارلىعى جالعاسىن تابادى. ودان ءارى وزەننەن تومەن قاراي, قىزىلجار وڭىرىندە جاڭا بوگەتتەردى سالۋدى باستايمىز. مىندەت – ەلدى مەكەندەردى قورعاۋ. ءبىز قازىرگى جاعدايعا سايكەس, بۇرىننان بەلگىلەنگەن جوسپارلار بويىنشا جۇمىس ىستەيتىن بولامىز», دەپ تۇيىندەدى ر.سكليار.
جۇمىس ساپارىنىڭ قورىتىندىسىندا پرەمەر-ءمينيستردىڭ ءبىرىنشى ورىنباسارى جول ينفراقۇرىلىمىنىڭ سۋ تاسقىنىنا دايىندىعىن تەكسەرىپ, «قازاۆتوجول» وبلىستىق فيليالىنىڭ ديرەكتورى ا.قابىلدينگە اينالما جول بويىندا ازاماتتىق كولىكتىڭ قاۋىپسىز قوزعالىسى ءۇشىن تاۋلىك بويى كەزەكشىلىك ۇيىمداستىرۋدى تاپسىردى.