مەملەكەت باسشىسىنىڭ تاپسىرماسىمەن سۋ تاسقىنىنا قارسى كۇرەستى ءتيىمدى ۇيلەستىرۋ ءۇشىن پرەمەر-ءمينيستردىڭ ءبىرىنشى ورىنباسارى رومان سكليار سولتۇستىك قازاقستان وبلىسىنا باردى. ول وڭىردەگى سۋ تاسقىنى جاعدايى بويىنشا جەدەل كەڭەس وتكىزدى, وعان وبلىس اكىمى عاۋەز نۇرمۇحامبەتوۆ پەن مەملەكەتتىك ورگانداردىڭ باسشىلارى قاتىستى.
كەڭەستە سقو توتەنشە جاعدايلار دەپارتامەنتىنىڭ باسشىسى ەرىك سارىباەۆ, «قازگيدرومەت» سقوف ديرەكتورى قىمبات مەرعاليموۆا, «قازاۆتوجول» اق فيليالىنىڭ ديرەكتورى اقىلبەك قابىلدين سۋ تاسقىنىنىڭ جاعدايى تۋرالى باياندادى.
وبلىستا سۋ تاسقىنىنان كۇردەلى جاعداي قالىپتاستى. سۋ دەڭگەيىنىڭ كۇرت كوتەرىلۋى قاۋىپتى دەڭگەيدەن جوعارى بولادى دەگەن بولجام دا بار. ءساۋىردىڭ 5-ىنەن باستاپ سەرگەەۆ سۋ قويماسى تولىپ, ارناسىنان استى. پەتروپاۆل قالاسىنىڭ ماڭىنداعى سۋ دەڭگەيىنىڭ العاشقى كوتەرىلۋى 6 كۇننەن كەيىن باستالىپ, ال سۋ تاسقىنىنىڭ شارىقتاۋ شەگى ءساۋىر ايىنىڭ اياعىندا بولماق.
رومان سكليار سۋ تاسقىنىنىڭ كەلەڭسىز ستسەناريىن بولدىرماۋ ءۇشىن بار كۇش-جىگەردى سالۋ كەرەكتىگىن اتاپ ءوتتى. اتاپ ايتقاندا, سۋ تاسقىنىنان زارداپ شەككەن ازاماتتارعا بارلىق قاجەتتى كومەك كورسەتۋدە كەشەندى شارالاردى قولعا الۋ قاجەت. كومەكتىڭ تەز ارادا جانە قاعازباستىلىقسىز كورسەتىلگەنى ماڭىزدى.
كەڭەس قورىتىندىسىندا پرەمەر-ءمينيستردىڭ ءبىرىنشى ورىنباسارى وبلىس باسشىلىعىنا تۇرعىنداردى ەۆاكۋاتسيالاۋ پۋنكتتەرىن دايىنداۋدى, ازىق-ت ۇلىك جانە ءدارى-دارمەكپەن قامتاماسىز ەتۋدى, تۇرعىندار اراسىندا تاسقىن كەزىندەگى ەرەجەلەر بويىنشا ءتۇسىندىرۋ جۇمىستارىن جالعاستىرۋدى, قاپتاردى ينەرتتى ماتەريالمەن تولتىرۋدى, ەگىستىكتەردە ەرىگەن سۋدىڭ جينالۋىن ۇنەمى باقىلاۋدى, كۇشتەر مەن قۇرالداردىڭ تاۋلىك بويى دايىندىعىن قامتاماسىز ەتۋدى, ىقتيمال سۋ تاسقىنىن جويۋ ءۇشىن سەرگەەۆ, شاعالالى, سىلەتى سۋ قويمالارىنان سۋدىڭ اعۋىنا تاۋلىك بويى مونيتورينگ جۇرگىزۋدى تاپسىردى.
سونىمەن قاتار رومان سكليار ايماق باسشىسى عاۋەز نۇرمۇحامبەتوۆپەن بىرگە تەپليچنوە اۋىلى مەن كوجەۆەننىي كەنتىنىڭ بوگەتتەرىن, «قىزىلجار سۋ» جشس-نىڭ 1 جانە 2-سورعى ستانسالارىن تەكسەردى. تەكسەرۋ بارىسىندا رومان سكليار قازىرگى سۋ تاسقىنى جاعدايىن ەسكەرە وتىرىپ, قولدانىستاعى بوگەتتەردى نىعايتۋ, ولاردى ۇلعايتۋ جۇمىستارىنىڭ جانە ارنايى تەحنيكا مەن توپىراق تولتىرىلعان قاپشىقتارمەن قامتاماسىز ەتۋ ماڭىزىن اتاپ ءوتتى.
قازىر وبلىس ورتالىعىنىڭ تۇرعىندارىن اۋىزسۋمەن قامتاماسىز ەتىپ وتىرعان «قىزىلجار سۋ» جشس-نىڭ سورعى ستانتسسالارىن سۋ تاسقىنىنان قورعاۋ ماقساتىندا ينجەنەرلىك جۇمىستار جۇرگىزىلىپ جاتىر. جۇمىس قارقىنى جوعارى جانە سۋ تاسقىنى جاعدايىنا بايلانىستى رەتتەلىپ وتىر. پەتروپاۆل سۋ تورابىن ارالاۋ بارىسىندا پرەمەر-ءمينيستردىڭ ءبىرىنشى ورىنباسارى سۋدىڭ كەلۋىنە از ۋاقىت قالعانىن اتاپ ءوتتى.
«بۇگىن سۋ باسۋ قاۋپى بار ايماقتاردى ارالاۋ بارىسىندا جەدەل شەشۋدى قاجەت ەتەتىن بىرقاتار ماسەلە قارالدى. بۇل – ەڭ الدىمەن, سۋ تاسقىنىنا قارسى ءىس-شارالاردى جۇرگىزۋ ءۇشىن تەحنيكا سانىن كوبەيتۋ جانە بوگەتتەردى كۇشەيتۋ. ءبىز ينفراقۇرىلىمدى جانە ەلدى مەكەندەردى قورعاۋ تۋرالى ايتىپ وتىرمىز. ۇلكەن سۋدىڭ كەلۋىنە 7-8 كۇن قالدى. قازىر سەرگەەۆ سۋ قويماسىندا 3 مەتردەن استام سۋ تاسىپ جاتىر. تولىپ كەتۋ بويىنشا انتيرەكورد ورناتىلادى دەپ كۇتىلۋدە, ول شامامەن 4 مەتردى قۇراماق. 2017 جىلعا قاراعاندا الدەقايدا كوپ سۋ كەلەدى. سوندىقتان قازىر بارلىق كۇش پەن رەسۋرستى وسى ماسەلەلەردى شەشۋگە باعىتتاۋ قاجەت. وعان قوسا بۇگىندە بارلىق جول-قۇرىلىس كومپانياسى ۋچاسكەلەردەگى جۇمىسىن ۋاقىتشا توقتاتىپ, تۇرعىندارمەن سۋ تاسقىنىنا قارسى ءىس-شارالاردى جۇرگىزەتىن بولامىز», دەدى ر.سكليار.
ەڭ اۋىر جاعداي 13 اۋداننىڭ 8-ىندە تىركەلگەن, قار جامىلعىسى 38-50% ارالىعىندا جانە 262 ەلدى مەكەندە سۋ باسۋ قاۋپى ساقتالىپ وتىر. وبلىس جولدارىندا 48 سۋ شايىپ ءوتۋ تىركەلدى. وبلىستىق جانە رەسپۋبليكالىق ماڭىزى بار جولداردا جول جامىلعىسىنىڭ 7 ۋچاسكەسى قوپارىلدى.
سۋدى تارتۋ جۇمىستارى جۇرگىزىلۋدە, 155 شاقىرىم ارىق تازارتىلدى, 96,6 شاقىرىم كانالدار كەڭەيتىلىپ, تەرەڭدەتىلدى, توپىراق تولتىرىلعان 55 مىڭ قاپ دايىندالىپ, ونىڭ 23 مىڭى توسەلدى. 540 ادام مەن 233 تەحنيكا جۇمىلدىرىلدى, تىرشىلىكتى قامتاماسىز ەتۋ نىساندارى قالىپتى جۇمىس ىستەپ جاتىر.
وڭىردەگى احۋالمەن تانىسقان رومان سكليار جاعدايدىڭ باقىلاۋدا ەكەنىن باسا ايتتى.