سەنات سپيكەرى ماۋلەن اشىمباەۆ كورنەكتى مەملەكەت جانە قوعام قايراتكەرى, پارلامەنت سەناتىنىڭ تۇڭعىش توراعاسى, «وتان» وردەنىنىڭ يەگەرى, اكادەميك ومىربەك بايگەلدىنى سوڭعى ساپارعا شىعارىپ سالۋ راسىمىنە قاتىستى. استاناداعى بەيبىتشىلىك جانە كەلىسىم سارايىندا وتكەن قوشتاسۋ راسىمىنە مارقۇمنىڭ جاقىن تۋىستارى, دوستارى, ارىپتەستەرى, سەرىكتەستەرى قاتىستى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
پالاتا توراعاسى الدىمەن, مەملەكەت باسشىسى قاسىم-جومارت توقاەۆتىڭ كوڭىل ايتۋ جەدەلحاتىن وقىپ بەردى.
«ومىربەك بايگەلدى ۇلى ەگەمەندىكتىڭ بەرىك ىرگەتاسىن قالاسقان تۇعىرلى تۇلعا, وتانىمىزدىڭ دامۋىنا قاجىرلى ەڭبەك سىڭىرگەن ۇلتجاندى ازامات بولدى. قازاقستان رەسپۋبليكاسى پارلامەنتىنىڭ قالىپتاسۋىنا زور ۇلەس قوستى. عيبراتتى عۇمىر يەسى ءوزىنىڭ ناعىز پاراساتتى تۇلعاعا ءتان قادىر-قاسيەتىمەن بارشا جۇرتتىڭ سىي-قۇرمەتىنە بولەندى. سوڭىنا جارقىن ءىز قالدىرعان ومىربەك بايگەلدى ۇلىنىڭ ەسىمى مەن بەينەسى حالقىمىزدىڭ جادىندا ماڭگى ساقتالادى», دەلىنگەن جەدەلحاتتا.
ءوز سوزىندە ماۋلەن اشىمباەۆ ومىربەك بايگەلدىنىڭ جان-جاقتى جانە ازاماتتىق ۇستانىمى بەرىك تۇلعا بولعانىن اتاپ ءوتتى. ول ۇلتتىق پارلامەنتاريزمنىڭ قالىپتاسۋى مەن دامۋىنا ۇلكەن ۇلەس قوستى. ومىربەك بايگەلدى پارلامەنت سەناتىندا قىزمەت اتقارعان كەزەڭدە قابىلدانعان زاڭدار قازاقستاننىڭ مەملەكەتتىلىگى مەن تاۋەلسىزدىگىن نىعايتۋعا تىكەلەي اسەر ەتكەنى انىق. پالاتا سپيكەرى وسى ءىستىڭ بارىندە قايراتكەر تۇلعا ناعىز وتانشىلدىقتىڭ, ۇلتقا قىزمەت ەتۋدىڭ وزىق ۇلگىسىن كورسەتكەنىن تىلگە تيەك ەتتى.
قارالى جيىنعا پارلامەنت ءماجىلىسىنىڭ توراعاسى ەرلان قوشانوۆ, پرەمەر-ءمينيستردىڭ ورىنباسارى تامارا دۇيسەنوۆا, جامبىل وبلىسىنىڭ اكىمى ەربول قاراشوكەەۆ, پارلامەنت پالاتالارىنىڭ دەپۋتاتتارى, مەملەكەت جانە قوعام قايراتكەرلەرى جانە باق وكىلدەرى قاتىستى.
ايتا كەتسەك, ومىربەك بايگەلدى سەناتتا 16 جىلدان استام ۋاقىت ەڭبەك ەتتى. ول پارلامەنت سەناتىنىڭ ءبىرىنشى, ەكىنشى, ءۇشىنشى, ءتورتىنشى شاقىرىلىمدارىندا دەپۋتات بولدى.
ومىربەك بايگەلدى استانا ماڭىنداعى ۇلتتىق پانتەونعا جەرلەنەدى. اتالعان جەرگە كورنەكتى مەملەكەت قايراتكەرلەرى, عىلىم جانە مادەنيەت وكىلدەرى, قازاقستاننىڭ دامۋىنا ايتارلىقتاي ۇلەس قوسقان تۇلعالار جەرلەنەتىنى بەلگىلى.