سىرتقى ىستەر مينيسترلىگىندە ەۋروپا كەڭەسى (ەك) مەن ەۋروپالىق وداقتىڭ (ەو) قولداۋىمەن مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى ءۇشىن «ايەلدەر قۇقىعىن قورعاۋ: حالىقارالىق جانە ەۋروپالىق تاسىلدەر» اتتى ەكى كۇندىك سەمينار ۇيىمداستىرىلدى.
باس پروكۋراتۋرانىڭ, ىشكى ىستەر, ادىلەت, مادەنيەت جانە اقپارات جانە وقۋ-اعارتۋ مينيسترلىكتەرىنىڭ, ادام قۇقىقتارىن قورعاۋ سالاسىنداعى ۇەۇ, سونداي-اق بىرقاتار جوعارى وقۋ ورنىنىڭ وكىلدەرىنىڭ الدىندا سىرتقى ىستەر ءمينيسترىنىڭ ورىنباسارى رومان ۆاسيلەنكو, ادام قۇقىقتارى جونىندەگى ۋاكىل ارتۋر لاستاەۆ, ەۋروپالىق وداقتىڭ قازاقستانداعى وكىلدىگىنىڭ باسشىسى ەلشى كەستۋتيس يانكاۋسكاس جانە ەۋروپا كەڭەسىنىڭ ىنتىماقتاستىق باعدارلامالارى باسقارماسىنىڭ جوبالار ۇيلەستىرۋشىسى كريستينا حوحلوۆا ءسوز سويلەدى.
رومان ۆاسيلەنكو بيىلعى جىلدىڭ ماۋسىم ايىندا ەۋروپا كەڭەسىنىڭ باس حاتشىسى ماريا پەيچينوۆيچ-ءبۋريچتىڭ استاناعا ساپارى, ونىڭ بارىسىندا ەل باسشىلىعىمەن كەزدەسۋى جانە استانا حالىقارالىق فورۋمىنىڭ جۇمىسىنا قاتىسۋى جوسپارلانىپ وتىرعانىن حابارلادى. فورۋم اياسىندا جاڭا «ەك-نىڭ قازاقستانمەن تاتۋ كورشىلىك ىنتىماقتاستىعىنىڭ 2024-2027 جىلدارعا ارنالعان باسىمدىقتارى» رەسمي تۇردە ىسكە قوسىلادى. ء«بىز ءۇش جىل وتكەن سوڭ بارلىق مۇددەلى تاراپتىڭ ورتاق ماقساتى – ادام قۇقىقتارى, دەموكراتيا جانە زاڭ ۇستەمدىگىن نىعايتۋ جولىنداعى تابىستى ءوزارا ءىس-قيمىلىنىڭ جەمىسىن كورە الاتىنىمىزعا سەنىمدىمىز», دەپ مالىمدەدى ر.ۆاسيلەنكو.
ەلىمىزدىڭ ادام قۇقىقتارىن قورعاۋ سالاسىنداعى ساياساتىنا قاتىستى مينيستر ورىنباسارى قازاقستان باسشىلىعى گەندەرلىك تەڭدىكتى ساقتاۋدى جانە ايەلدەر قۇقىعىن قورعاۋدى قامتاماسىز ەتۋگە باستى ءمان بەرەتىنىن اتاپ ءوتتى. وسى تۇرعىدا 2023 جىلعى جەلتوقساندا پرەزيدەنت قاسىم-جومارت توقاەۆ بەكىتكەن ادام قۇقىقتارى مەن زاڭ ۇستەمدىگى سالاسىنداعى جاڭا ءىس-قيمىل جوسپارى, سونداي-اق پارلامەنتتە قارالىپ جاتقان ايەلدەر قۇقىعى مەن بالالار قاۋىپسىزدىگىن قامتاماسىز ەتۋ ماسەلەلەرى بويىنشا زاڭنامالىق تۇزەتۋلەر جوباسى ەرەكشە اتالىپ ءوتتى.
ادام قۇقىقتارى جونىندەگى ۋاكىلى ا.لاستاەۆ ەلىمىزدە گەندەرلىك تەڭدىككە قول جەتكىزۋ جانە تۇرمىستىق زورلىق-زومبىلىققا قارسى ءىس-قيمىل باعىتىندا جۇرگىزىلىپ جاتقان رەفورمالار جونىندە جانە وسى تاقىرىپ بويىنشا ارنايى بايانداما ازىرلەنگەنى تۋرالى اقپارات بەرىپ, قوردالانعان پروبلەمالاردى اتاپ ءوتتى. «وكىنىشكە قاراي, ايەلدەرگە قاتىستى زورلىق-زومبىلىق دەڭگەيى ءالى دە جوعارى, بۇل – گەندەرلىك تەڭدىك ءۇشىن ەلەۋلى كەدەرگى», دەپ ايتتى ومبۋدسمەن.
ءوز كەزەگىندە ەو جانە ەۋروپا كەڭەسىنىڭ وكىلدەرى سەمينار تاقىرىبىنىڭ وزەكتىلىگىن ايتىپ بەردى.
«گەندەرلىك تەڭدىك – ءاربىر ەر ادام مەن ايەلدىڭ قوعامنىڭ ەكونوميكالىق جانە الەۋمەتتىك ومىرىنە ءادىل ۇلەس قوسۋىنا مۇمكىندىك. وتباسىلىق زورلىق-زومبىلىققا جانە ايەلدەر مەن قىزدارعا قاتىستى كۇش قولدانۋعا ءادىل قوعامدا ورىن جوق», دەدى ك. يانكاۋسكاس.
تۇراقتى تاجىريبە الماسۋدىڭ جانە ادام قۇقىعى مەن باسقا دا سالالارداعى زاڭنامانى جەتىلدىرۋدىڭ ماڭىزدىلىعىنا نازار اۋدارىپ, ق.حوحلوۆا «ەۋروپا كەڭەسى ازىرلەگەن كونۆەنتسيالار – ادام قۇقىعىن, دەموكراتيانى جانە قۇقىق ۇستەمدىگىن قامتاماسىز ەتۋدىڭ حالىقارالىق دەڭگەيدە مويىندالعان نەگىزگى ستاندارتتارى», دەپ اتاپ ءوتتى.
سەمينار قورىتىندىسى بويىنشا قاتىسۋشىلار ءىس-شارا ايەلدەر قۇقىعىن قورعاۋدى قامتاماسىز ەتۋ جانە تۇرمىستىق زورلىق-زومبىلىقپەن كۇرەس ماسەلەلەرىنىڭ نەگىزگى اسپەكتىلەرى تۋرالى پىكىر الماسۋ جانە اقپاراتتاندىرۋدى ارتتىرۋ ءۇشىن ءتيىمدى الاڭ ۇسىنعانى تۋرالى ورتاق پىكىر ءبىلدىردى.