بيىل استانادا 1085 ينتەرنەت-الاياقتىق دەرەگى تىركەلدى. ازاماتتارعا كەلتىرىلگەن شىعىن 500 ميلليون تەڭگەدەن اسادى. ەلوردانىڭ كوممۋنيكاتسيالار قىزمەتىندە وتكەن بريفينگتە سارىارقا اۋداندىق پب باسشىسىنىڭ ورىنباسارى جاسلان جاقاي الاياقتاردىڭ نەگىزگى سحەمالارى تۋرالى ايتىپ بەردى, دەپ حابارلايدى Egemen.kz قالا اكىمدىگىنىڭ ءباسپاسوز قىزمەتىنە سىلتەمە جاساپ.
قازىرگى ۋاقىتتا جۇرگىزىلگەن پروفيلاكتيكالىق جۇمىستاردىڭ ناتيجەسىندە كيبەرقىلمىستار سانى 11,5%-عا ازايدى.
سپيكەر ءوز سوزىندە الاياقتاردىڭ نەگىزگى جۇمىس سحەمالارىن اتاپ ءوتتى.
1) جاساندى ينتەللەكت ارقىلى بانكتىڭ قاۋىپسىزدىك قىزمەتكەرلەرىنىڭ نەمەسە قۇقىق قورعاۋ ورگاندارىنىڭ اتىنان شاقىرۋلار.
بۇل جاعدايدا الاياقتار جاساندى ينتەللەكتىڭ ءارتۇرلى قوسىمشالارىن پايدالانا وتىرىپ, ولاردىڭ سىرتقى ءتۇرىن, داۋىسىن قولدان جاساپ, سول ارقىلى كۇماندى بانكتىك وپەراتسيالار نەمەسە ارنايى وپەراتسيالار جۇرگىزەدى دەگەن جەلەۋمەن جاڭىلىستىرۋى مۇمكىن.
2) الەۋمەتتىك جەلىلەردە جانە ساۋدا الاڭدارىندا تاۋارلار مەن قىزمەتتەردى ساتۋ.
ينتەرنەتتەگى قىلمىستىڭ بۇل ءتۇرى تاۋارلار مەن قىزمەتتەردى ساتۋدى كوزدەيدى, بۇل جاعدايدا الاياقتار ءارتۇرلى سىلتاۋلارمەن جوق تاۋارعا الدىن الا تولەمدى نەمەسە تولىق تولەمدى سۇرايدى.
3) فيشينگتىك سايتتاردى پايدالانۋ.
الاياقتىقتىڭ بۇل ءتۇرى جەكە دەرەكتەر مەن بانكتىك اقپاراتتى جيناۋعا باعىتتالعان. مۇنداي سايتتار رەسمي سايتتارعا قاتتى ۇقساس بولادى. الاياقتار جالعان ۆەب-سايتتى پايدالانا وتىرىپ, ءسىزدىڭ بانكتىك شوتىڭىزدىڭ تولىق مالىمەتىن الادى, سودان كەيىن شوتتاعى اقشاعا قول جەتكىزۋ ءۇشىن اۋدارىمدار مەن باسقا دا وپەراتسيالار جاسايدى.
4) كريپتوۆاليۋتاعا, باعالى قاعازدارعا ينۆەستيتسيالاۋ.
اتالعان الاياقتىقتىڭ قۇرباندارى ماتەريالدىق جاعىنان جاعدايى جاقسى ازاماتتار بولىپ سانالادى, ولار قوسىمشا تابىس ىزدەپ, ينۆەستيتسيا سالۋعا بولاتىن جوبالارعا كەزىگەدى. الايدا وزدەرىنىڭ جيناقتارى مەن تابىسىن جالعان بانك شوتتارىنا اۋدارادى.
5) What's App مەسسەندجەرىنىڭ ەسەپتىك جازباسىنا زاڭسىز كىرۋ.
مۇنداي جاعدايدا الاياقتار جالعان سىلتەمە ارقىلى ءبىر ادامنىڭ جەكە دەرەكتەرىن ۇرلاپ الىپ, سول ادامنىڭ تانىستارىنا جالعان حابارلاما جولدايدى. حابارلامادا, ارينە, اقشا سۇرالادى. تانىسىنا كومەكتەسپەكشى بولعان ادامدار ءوز قاراجاتىن جالعان بانك شوتتارىنا اۋدارادى.
«قۇرمەتتى قالا تۇرعىندارى مەن قوناقتارى, ادەتتە, ۇتىس ويىنى جانە بالالارعا داۋىس بەرۋ تۇرىندە تارالاتىن كۇماندى سىلتەمەلەردى باسپاۋ كەرەكتىگىن ەسكەرتەمىز. قورىتىندىلاي كەلە, تاعى ءبىر رەت اتاپ وتكىم كەلەدى, ونلاين پلاتفورمالاردا تاۋارلار مەن قىزمەتتەردى ساتىپ العاندا مۇقيات جانە ساق بولىڭىز, جەكە جانە بانكتىك اقپاراتتىڭ قۇپيالىلىعىن ساقتاڭىز, مۇمكىندىگىنشە ەكى فاكتورلى اۋتەنتيفيكاتسيانى قوسىڭىز, بەلگىسىز بىرەۋلەرگە قاراجات اۋدارماڭىز, ءار وپەراتسيانى تەكسەرىپ وتىرىڭىز», دەپ ەسكەرتتى جاسلان جاقاي.