قوستاناي وبلىسىنىڭ اكىمى قۇمار اقساقالوۆ سۋ تاسقىنىنا قارسى ءىس-شارالار بويىنشا وبلىستىق شتابتىڭ وتىرىسىن وتكىزدى. باستى مىندەت - حالىقتى جانە اۋماقتاردى سۋ تاسقىنىنان قورعاۋ, بارلىق قىزمەتتەردىڭ ءىس-ارەكەتتەرىن ۇيلەستىرۋ.
وتىرىستا ءوڭىر اكىمدەرىنىڭ مەملەكەت باسشىسىنىڭ تاپسىرمالارىن ورىنداۋ جانە سۋ تاسقىنىنا قارسى ءىس-ارەكەتتەرىن كۇشەيتۋگە باعىتتالعان جۇمىستارى تۋرالى باياندامالارى تىڭدالدى. كەڭەس بارىسىندا قۇمار اقساقالوۆ اكىمدەر مەن كۇش قۇرىلىمدارىنا بىرقاتار ناقتى تاپسىرما بەردى.
«قازىرگى ۋاقىتتا سۋ جوعارعى توبىل جانە قاراتومار سۋ قويمالارىنىڭ ەرنەۋىنەن استى. بىرەر كۇننەن كەيىن قاراتومار سۋ قويماسى تاسۋى ىقتيمال. سەكۋندىنا 250 تەكشە مەتردەن استام سۋ جۇرگەن جاعدايدا تومەن جاتقان ەلدى مەكەندەردى سۋ باسۋ قاۋپى باسىم. اتاپ ايتقاندا, رۋدنىي قالاسىنا قاراستى پەرتسەۆ سەلوسى, ب. مايلين اۋدانىنىڭ يۋبيلەينىي كەنتى, قوستاناي قالاسىنداعى باقشا قوعامدارى جانە قوستاناي اۋدانىنىڭ توبىل وزەنىنە جاقىن اۋماقتاردىڭ شەتكى كوشەلەرىنە قاۋىپ ءتونىپ تۇر.
وسىعان بايلانىستى تۇرعىنداردى مۇلكىمەن, ءتورت ت ۇلىگىمەن ەۆاكۋاتسيالاۋ بويىنشا بارلىق قاجەتتى شارالاردى قابىلداۋدى تاپسىرامىن. بارلىق اۋدان جانە قالا اكىمدەرىنە بۇعان باسىمەن جاۋاپ بەرەتىنىن ەسكە سالامىن. سۋ تاسقىنىنا قارسى ءىس-شارالار كەشەندى تۇردە جۇزەگە اسىرىلۋى ءتيىس.
قازىرگى جاعدايعا دايار بولۋىمىز قاجەت. وڭتۇستىك وڭىرلەردەگىدەي ەمەس, ءبىزدىڭ بۇگىنگى جاعدايعا تولىقتاي دايارلاناتىن مەرزىمىمىز بولدى, ءالى دە 1-2 كۇن ۋاقىتىمىز بار. بىرەۋ مۇلكىن جوعالتسا, ءۇيىن نەمەسە كوممەرتسيالىق نىسانىن سۋ باسسا, جاۋاپتىلارعا قاتاڭ شارا قولدانىلاتىن بولادى», دەدى وبلىس اكىمى.
قوستاناي وبلىسى