پرەمەر-ءمينيستردىڭ ورىنباسارى تامارا ءدۇيسەنوۆانىڭ توراعالىعىمەن وتكەن كەڭەستە بالالاردىڭ جازعى دەمالىسىن ۇيىمداستىرۋ ماسەلەلەرى قاراستىرىلدى.
جيىنعا ءتيىستى مەملەكەتتىك ورگانداردىڭ وكىلدەرى قاتىستى. اتالعان باعىتتا اتقارىلىپ جاتقان شارالار تۋرالى وقۋ-اعارتۋ ءمينيسترىنىڭ ورىنباسارى ەدىل وسپان باياندادى.
بيىلعى ماۋسىمدا مەكتەپ جاسىنداعى بالالاردىڭ 85%-ىن جازعى بەلسەندى دەمالىس شارالارىمەن قامتۋ كوزدەلىپ وتىر. ايتا كەتەيىك, الەۋمەتتىك جاعىنان از قامتىلعان وتباسىلاردان شىققان بالالار ءۇشىن لاگەرلەرگە تەگىن جولدامالار قاراستىرىلادى.
دايىندىق شارالارىن ءۇيلەستىرۋ ءۇشىن رەسپۋبليكالىق جانە وڭىرلىك دەڭگەيدە شتابتار قۇرىلعان. ونىڭ قۇرامىنا مەملەكەتتىك ورگانداردان بولەك, سالالىق بىرلەستىكتەر تە ەنگەن.
مينيسترلىك لاگەر تۇرلەرىنە (جىل بويى قىزمەت كورسەتەتىن, ەلدى مەكەن سىرتىنداعى, مەكتەپ جانىنداعى, ت.ب.) بايلانىستى بىرىڭعاي تالاپتار بەكىتتى.
«الدىن الا مالىمەت بويىنشا ەلىمىزدە وقۋشىلار ءۇشىن 10,5 مىڭنان اسا لاگەر جۇمىسى ۇيىمداستىرىلماق. ول جەردە دەمالىستان بولەك, تانىمدىق باعدارلامالار دا قاراستىرىلادى. قازىر ءبىز لاگەرلەر جۇمىسىنا جاۋاپتى ورگاندار ءۇشىن ۇيىمداستىرۋ تەتىكتەرى قاراستىرىلعان جادىنامالاردى ازىرلەدىك. ودان بولەك دەمالىس ورنىنداعى قاۋىپسىزدىك شارالارى تۋرالى سەمينارلار وتكىزىپ, ناۋقاننىڭ بارلىق ءتۇرىن قامتيتىن ادىستەمەلىك قۇرالداردى ازىرلەۋدى قولعا الدىق», دەدى ەدىل وسپان.
تامارا دۇيسەنوۆا دەمالىس ورىندارىندا سانيتارلىق تالاپتاردىڭ قاتاڭ ساقتالۋى قاجەتتىگىنە ءمان بەردى. بۇل رەتتە دەنساۋلىق ساقتاۋ مينيسترلىگىنە لاگەرلەردىڭ سايكەستىگىن ءجىتى تەكسەرۋدى تاپسىردى.
«بالالاردىڭ قاۋىپسىزدىگى باستى نازاردا بولۋعا ءتيىس. بۇل رەتتە سانيتارلىق-ەپيدەميولوگيالىق قىزمەت, توتەنشە جاعدايلار, ىشكى ىستەر مينيسترلىكتەرى ءبىرلەسە جۇمىس اتقارعانى ءجون. بالالارمەن جۇمىس ىستەيتىندەر ارنايى دايىندىقتان وتۋگە ءتيىس. قۇقىق قورعاۋ ورگاندارى لاگەردە قىزمەت كورسەتەتىن تۇلعالاردى الدىن الا تەكسەرۋى كەرەك. ءبىر سوزبەن ايتقاندا, بالالاردى دەمالىسقا جىبەرگەن اتا-انالار ولاردىڭ قاۋىپسىز جەردە جۇرگەنىنە سەنىمدى بولۋى قاجەت. بۇعان سالعىرت قاراۋعا بولمايدى», دەپ ەسكەرتتى ۆيتسە-پرەمەر.
بالالاردىڭ جازعى دەمالىسىن ۇيىمداستىرۋ شارالارى ءبىرنەشە كەزەڭگە ءبولىنىپ, ءتيىستى مەرزىمدەر بەكىتىلدى. تامارا ءدۇيسەنوۆا مۇددەلى مەملەكەتتىك ورگاندارعا دايىندىق جۇمىستارىنىڭ ۋاقتىلى ءارى ساپالى ءوتكىزىلۋىن قاتاڭ باقىلاۋدى جۇكتەدى.