پرەزيدەنت اكىمشىلىگى ۇلتتىق قۇرىلتايدىڭ ءۇشىنشى وتىرىسىنان كەيىن ۇكىمەتپەن بىرلەسىپ, مەملەكەت باسشىسىنىڭ باستامالارىن ءتيىمدى جۇزەگە اسىرۋ جولدارىن پىسىقتادى. بۇل جونىندە مەملەكەتتىك كەڭەسشى ەرلان قارين Telegram-داعى پاراقشاسىندا جازدى.
ەرلان قاريننىڭ مالىمدەۋىنشە, مەملەكەت باسشىسىنىڭ باستامالارىن ءتيىمدى جۇزەگە اسىرۋ جولدارىن پىسىقتاۋ ناتيجەسىندە پرەزيدەنت تاپسىرمالارىن ورىنداۋعا ارنالعان جوسپار قابىلدانعان.
«قۇجاتتىڭ كولەمى اۋقىمدى, 40 تارماقتان تۇرادى. وندا ءتۇرلى ءىس-شارالار كوزدەلگەن. جوسپارعا سايكەس 10 زاڭ (ەسىرتكى وندىرگەنى ءۇشىن جاۋاپكەرشىلىكتى قاتاڭداتۋ, لۋدومانياعا قارسى كۇرەسۋ, تاريحي نىسانداردى قورعاۋ, ارحەولوگيا سالاسى, ونوماستيكاعا قاتىستى جۇمىس, مەملەكەتتىك ناگرادالار تۋرالى جانە باسقالارى) ازىرلەنىپ قابىلدانادى. سونداي-اق زاڭسىز ويىن بيزنەسىنە جانە لۋدومانياعا قارسى كۇرەستىڭ 2024-2026 جىلدارعا ارنالعان كەشەندى جوسپارى جانە باسقا دا باعدارلامالىق قۇجاتتار قابىلدانباق. ءبىر سوزبەن ايتساق, پرەزيدەنتتىڭ اتىراۋدا كوتەرگەن باستامالارى قۇزىرلى مەملەكەتتىك ورگانداردىڭ ۇزاق مەرزىمگە ارنالعان جۇمىسىنا ارقاۋ بولىپ وتىر», دەپ جازدى مەملەكەتتىك كەڭەسشى.