قازاقستان مەن ارمەنيانىڭ ەكونوميكالىق ىنتىماقتاستىق جونىندەگى ۇكىمەتارالىق كوميسسياسىنىڭ 10-وتىرىسىندا ەكى ەل ۇكىمەت باسشىلارىنىڭ ورىنباسارلارى سەرىك جۇمانعارين مەن مگەر گريگوريان ءوزارا ءتيىمدى ىنتىماقتاستىقتى دامىتۋ ماسەلەلەرىن تالقىلادى.
ۆيتسە-پرەمەر سەرىك جۇمانعارين قۇتتىقتاۋ سوزىندە ەكى ەلدىڭ ءوزارا ءىس-قيمىلىنىڭ دوستىق سيپاتىنا جوعارى باعا بەردى. قىركۇيەك ايىندا قازاقستان مەن ارمەنيا اراسىنداعى دوستىق پەن ىنتىماقتاستىق تۋرالى شارتقا 25 جىل تولادى.
«وسى جىلدار ىشىندە ءبىزدىڭ ەلدەرىمىز مەملەكەتارالىق بايلانىستاردى ودان ءارى نىعايتۋدىڭ نەگىزىن قالادى. ەكىجاقتى جانە كوپجاقتى ءىس-شارالار اياسىندا كەلىسسوزدەر مەن كونسۋلتاتسيالار بەلسەندى تۇردە جۇرگىزىپ وتىر. ءبىز ەكىجاقتى تارتىپپەن دە, ەاەو اياسىنداعى ءوزارا ءىس-قيمىل فورماتىندا دا ەلدەرىمىزدىڭ نارىقتارىنا قول جەتكىزۋ بويىنشا ءوزارا ءىس-قيمىلدى كەڭەيتۋگە جانە نىعايتۋعا ءتيىسپىز. ۇكىمەتارالىق كوميسسيا – بەلگىلەنگەن ماقساتتارعا جەتۋدىڭ نەگىزگى تەتىكتەرىنىڭ ءبىرى», دەدى س.جۇمانعارين.
سونىمەن قاتار ارمەنيا ۆيتسە-پرەمەرى مگەر گريگوريان ۇكىمەتارالىق كوميسسيانىڭ ەكىجاقتى كۇن تارتىبىندەگى ماسەلەلەردى ىلگەرىلەتۋدەگى جانە جاڭا باعىتتاردى دامىتۋداعى شەشۋشى ءرولىن اتاپ ءوتتى.
قازاقستان تاراپى ەكى ەل اراسىنداعى ىنتىماقتاستىقتى كەڭەيتۋ اياسىندا 348,2 ملن دوللار سوماسىنا مەتاللۋرگيا, مۇناي حيمياسى, تاماق ونەركاسىبى سالاسىندا وڭدەلگەن 70 ەكسپورتتىق تاۋاردان تۇراتىن تىزبە قالىپتاستىرىپ, قاراۋعا جولدادى, ۇاك وتىرىسىندا پرەمەر-ءمينيستردىڭ ورىنباسارى «قورعاس» حشىو اياسىندا كووپەراتسيالىق جوبالار قۇرۋدى ۇسىندى.
«ارمەنيا كومپانيالارىن قىتاي نارىعىنا شىعۋ مۇمكىندىگىن اشاتىن «قورعاس» حشىو قىزمەتىنە بەلسەندى قاتىسۋعا شاقىرامىز. قازاقستاندا قولايلى ينۆەستيتسيالىق احۋال قالىپتاستى, شەتەلدىك ينۆەستيتسيالاردى ىنتالاندىرۋ ءۇشىن قاجەتتى قۇرالدار جاسالدى. جوبالارعا بارلىق كەزەڭدە كومەك كورسەتىلەدى», دەدى ۆيتسە-پرەمەر.
سونىمەن قاتار تاراپتار اۋىل شارۋاشىلىعى ونىمدەرىن قايتا وڭدەۋ سالاسىنداعى بىرلەسكەن جوبالاردى ىسكە اسىرۋ مۇمكىندىكتەرىن, مادەني جانە گۋمانيتارلىق باعىتتار بويىنشا ىنتىماقتاستىق پەرسپەكتيۆالارىن تالقىلادى.
انىقتاما: قازاقستان مەن ارمەنيا اراسىنداعى ساۋدا اينالىمى 2023 جىلدىڭ قورىتىندىسى بويىنشا 23%-عا ءوستى: 43,1 ملن دوللاردان 53,1 ملن دوللارعا دەيىن. ەكسپورت 18,9%-عا (28 ملن دوللاردان 33,4 ملن دوللارعا), يمپورت 31%-عا (15 ملن دوللاردان 19,7 ملن دوللارعا دەيىن). قازىرگى ۋاقىتتا قازاقستاندا ارمەنيانىڭ كاپيتالى بار 380-دەن استام كومپانيا جانە ەكونوميكانىڭ ءتۇرلى سەكتورىندا 72 بىرلەسكەن كومپانيا جۇمىس ىستەيدى.