Nazarbayev University-دە پرەمەر-مينيستر ولجاس بەكتەنوۆتىڭ توراعالىعىمەن نازارباەۆ ۋنيۆەرسيتەتى, نازارباەۆ زياتكەرلىك مەكتەپتەرى جانە نازارباەۆ قورى جوعارى قامقورشىلىق كەڭەسىنىڭ وتىرىسى ءوتتى. كەڭەس مۇشەلەرى NU-دىڭ جوعارى فۋنكتسيونالدى زەرتحانالارىمەن جانە عالىمداردىڭ جاڭا ازىرلەمەلەرىمەن, اتاپ ايتقاندا, اقىلدى جۇيەلەر جانە جاساندى ينتەللەكت ينستيتۋتىمەن, يمپۋلستىك ۇدەتكىش زەرتحاناسىمەن, زاماناۋي نانوماتەريالدارمەن, گەنومدىق جانە دەربەستەندىرىلگەن مەديتسينامەن تانىستى.
جوعارى قامقورشىلىق كەڭەسىنىڭ توراعاسى ولجاس بەكتەنوۆ عىلىم مەن ءوندىرىستى ينتەگراتسيالاۋدىڭ, سونداي-اق قازاقستان عىلىمي قوعامداستىعىنىڭ عىلىمي ينفراقۇرىلىمعا قولجەتىمدىلىگىن كەڭەيتۋ جونىندەگى ناقتى مىندەتتەردى اتاپ كورسەتتى. NU-دىڭ ونەركاسىپتىك وندىرىستەرگە جاقىن ورنالاسقان وڭىرلىك جوعارى وقۋ ورىندارىمەن ءوزارا ءىس-قيمىل جاساۋ ماسەلەلەرىنە ەرەكشە نازار اۋداردى.
«ۋنيۆەرسيتەت عىلىمي جانە ءبىلىم بەرۋ رەسۋرستارىن دامىتۋدى كۇشەيتىپ, ءوز ازىرلەمەلەرىن كوممەرتسيالاندىرۋ ءۇشىن ونەركاسىپتىك كاسىپورىندارمەن ارىپتەستىكتى نىعايتۋعا ءتيىس. مۇنىڭ بارلىعى عىلىمنىڭ ەل ەكونوميكاسىنا قوساتىن ۇلەسىن ارتتىرۋعا ىقپال ەتەدى. زياتكەرلىك مەكتەپتەردىڭ الەۋەتىن وڭىرلەردەگى مەكتەپتەردى قولداۋ ءۇشىن بارىنشا پايدالانۋ كەرەك. مىندەتىمىز – بالالاردى ساپالى بىلىممەن قامتاماسىز ەتۋ. بۇعان قاجەتتى قولداۋ كورسەتىلەدى», دەدى و.بەكتەنوۆ.
قازىرگى ۋاقىتتا NU زەرتحانالارىنداعى زەرتتەۋشىلەر توبى جاساندى ينتەللەكتىنى دامىتۋ, جاسىل تەحنولوگيالاردى ەنگىزۋ ءۇشىن وپتوەلەكترونيكا سالاسىنداعى يننوۆاتسيالاردى زەرتتەۋ, كۇردەلى اۋرۋلاردى دياگنوستيكالاۋ جانە ەمدەۋ مۇمكىندىكتەرىن كەڭەيتۋ ماسەلەلەرىمەن اينالىسادى.
ء«بىز پرەپاراتتىڭ ءبىرىنشى جانە ەكىنشى فازالارىن باستاپقى زەرتتەۋدى اياقتادىق جانە جاقسى ناتيجەلەرگە قول جەتكىزدىك. ءبىز كلينيكالىق سىناقتاردى جۇرگىزۋدى جالعاستىرامىز, ونىڭ بارىسىندا ەمدەلۋ كەزىندە ماكسيمالدى اسەر الۋ ءۇشىن پرەپاراتتىڭ ەڭ جوعارى ءتوزىمدى دوزاسىنا شىعۋ كەرەك», دەدى ءوز كومانداسىنىڭ قاتەرلى ىسىككە قارسى ءتيىمدى ءدارى جاساۋى تۋرالى National Laboratory Astana (NLA) ديرەكتورى دوس سارباسوۆ.
ونكولوگيالىق پرەپاراتتى ازىرلەۋ – NLA-نىڭ جالعىز جوباسى ەمەس. 5 قۋاتتى ەلەكتروندى ميكروسكوپپەن جابدىقتالعان زەرتحانادا جاراتىلىستانۋ جانە ينجەنەرلىك سالالارداعى ستارتاپ ءۇشىن بىرلەسكەن زەرتتەۋلەر جۇرگىزەدى.
«زەرتحانامىزدا دامىتىپ جاتقان نەگىزگى باعىتتاردىڭ ءبىرى – رەفەرەنستى گەنومدى زەرتتەۋ. ياعني گەنومدىق نۇسقالاردىڭ رەفەرەنستى بازاسىن قۇرۋ ءۇشىن باسقا پوپۋلياتسيالاردان قانشالىقتى ەرەكشەلەنەتىنىمىزدى زەرتتەۋ», دەدى NU جانىنداعى NLA ءومىر تۋرالى عىلىمدار ورتالىعى ديرەكتورىنىڭ مىندەتىن اتقارۋشى اينۇر اقىلجانوۆا.
عالىمدار حالقىمىزدىڭ «گەنەتيكالىق بەينەسىن» جاسايدى. بۇل جۇمىس, مىسالى, اۋرۋلارعا بەيىمدىلىكتى انىقتاۋعا كومەكتەسەدى. ول بولاشاقتا ازاماتتاردىڭ دەنساۋلىعىن قورعاۋعا جانە وتاندىق مەديتسينانى دامىتۋعا ۇلەس قوسۋعا مۇمكىندىك بەرەدى.
NU اقىلدى جۇيەلەر جانە جاساندى ينتەللەكت ينستيتۋتىنىڭ عالىمدار توبى جوعارى قامقورشىلار كەڭەسىنىڭ مۇشەلەرىنە سۋدى تازارتۋ جانە سۋتەگى گەنەراتسياسى بويىنشا زەرتتەۋلەر جۇرگىزۋگە مۇمكىندىك بەرەتىن I-NURA ۇدەتكىشىن ۇسىندى.
سونىمەن قاتار بەركليدەگى لوۋرەنس ۇلتتىق زەرتحاناسىمەن (اقش) بىرلەسە جاسالعان ۇدەتكىش كورسەتىلدى. ول سۋدى تازارتۋ جانە سۋتەگى گەنەراتسياسى بويىنشا زەرتتەۋلەر جۇرگىزۋگە مۇمكىندىك بەرەدى.