الماتى وبلىسى مەن قىتاي حالىق رەسپۋبليكاسىنىڭ ەكونوميكالىق ارىپتەستىگى جاقسى ناتيجە كورسەتىپ كەلەدى. ەلدەر اراسىنداعى تاۋار اينالىمىنىڭ ارتۋى, بىرلەسكەن ترانزيتتىك جوبالاردى جۇزەگە اسىرۋى, ينۆەستيتسيالىق ءتۇرلى كەلىسىمدەرگە قول جەتكىزۋ – تاراپتار اراسىنداعى بايلانىستاردى بەكەمدەپ, جاڭا دەڭگەيگە كوتەردى. 2023 جىلدىڭ قورىتىندىسى بويىنشا ەكى ەل اراسىنداعى تاۋار اينالىمى 1,1 ملرد دوللار بولدى. بۇل تۋرالى الماتى وبلىسىنىڭ اكىمى مارات سۇلتانعازيەۆ شىڭجاڭ-ۇيعىر اۆتونوميالىق اۋدانىنان (شۇار) كەلگەن دەلەگاتسيامەن رەسمي كەزدەسۋدە مالىمدەدى.
ءوڭىر باسشىسى وبلىستا ەكونوميكالىق بايلانىستاردى جاڭعىرتۋ جانە نىعايتۋ باعىتىندا جۇرگىزىلىپ جاتقان جۇمىستاردىڭ بەلسەندى ەكەنىن اتاپ ءوتتى.
«كوممەرتسيالىق اينالىمدى ودان ءارى ارتتىرۋ ماقساتىندا «قالجات قۇرعاق پورتى» دەپ اتالاتىن حالىقارالىق تسيفرلى كولىكتىك-لوگيستيكا حابىن ەنگىزۋ جوسپارلانىپ وتىر. لوگيستيكا مەن ساۋدا سالاسىنداعى بيزنەستى دامىتۋعا ارنالعان زاماناۋي الاڭ سالۋ جوباسىنا جەرگىلىكتى ينۆەستورلار دا قىزىعۋشىلىق تانىتىپ ۇلگەردى. بۇل جوبا قىتايدان جۇك تاسىمالداۋدى ۇلعايتىپ, كولىكتىك جانە اۋىستىرىپ تيەۋ قىزمەتىن اتقاراتىن ماڭىزدى الاڭ بولماق», دەدى وبلىس اكىمى مارات سۇلتانعازيەۆ.
سونداي-اق ول وڭىردەگى حالىقارالىق قاتىناستاردى دامىتۋداعى ەلەۋلى پروگرەستى اتاپ ءوتتى. ايتۋىنشا, تابىس ەكونوميكانىڭ ءتۇرلى سالاسىندا ينۆەستيتسيالىق جوبالاردى ىسكە اسىرۋمەن بايلانىستى.
«بىرلەسكەن ينۆەستيتسيالىق جوبالاردى ىسكە اسىرۋ ەكونوميكالىق وسۋگە عانا ەمەس, شەتەلدىك ارىپتەستەرمەن بايلانىستى نىعايتۋعا دا ىقپال ەتەدى. وسىنىڭ ارقاسىندا ءبىزدىڭ ءوڭىرىمىز ءارتۇرلى ەلدىڭ ينۆەستورلارى مەن كاسىپكەرلەرى ءۇشىن بارعان سايىن تارتىمدى بولا تۇسۋدە, بۇل جالپى وركەندەۋ مەن دامۋعا ىقپال ەتەدى», دەپ اتاپ ءوتتى ءوڭىر باسشىسى.
شىڭجاڭ-ۇيعىر اۆتونومياسى حالىق ۇكىمەتىنىڭ توراعاسى ەركين تۋنياز قازاقستان مەن شۇار اراسىنداعى ساۋدا, ونەركاسىپ, كولىك, لوگيستيكا, اۋىل شارۋاشىلىعى جانە تۋريزم سياقتى ءتۇرلى سالاداعى تابىستى ىنتىماقتاستىققا ەرەكشە توقتالدى. بىرلەسكەن ينۆەستيتسيالىق جوبالاردى جۇزەگە اسىرۋ بويىنشا الماتى وبلىسى مەن شۇار ىنتىماقتاستىعىنىڭ بولاشاعىنا زور سەنىم ءبىلدىردى.
«الماتى وبلىسى – قازاقستاننىڭ نەگىزگى كولىك جولدارىنىڭ قيىلىسىندا ورنالاسقان ءىرى ولكەسى. لوگيستيكا مەن ساۋدانىڭ قارقىندى دامۋىنا ىقپال ەتەتىن ستراتەگيالىق ورتالىق. الماتى قالاسى مەن قىتاي شەكاراسىنىڭ جاقىن ورنالاسۋى بۇل ايماقتىڭ ماڭىزدى كولىك تورابى عانا ەمەس, سونىمەن قاتار جۇك جانە جولاۋشى تاسىمالىن ۇلعايتۋداعى قۋاتتى كاتاليزاتورى ەكەنىن كورسەتەدى. بۇل وڭىرلەر اراسىنداعى ءتيىمدى بايلانىستى قامتاماسىز ەتىپ, ايماقتىق دەڭگەيدە دە, ۇلتتىق دەڭگەيدە دە ەكونوميكالىق دامۋعا سەپتىگىن تيگىزەدى», دەدى ەركين تۋنياز.
كەزدەسۋ سوڭىندا ەركين تۋنياز ەكونوميكانىڭ ءتۇرلى سالاسىنداعى ەكىجاقتى ىنتىماقتاستىقتىڭ نىعايا تۇسەتىنىن, سونداي-اق بۇرىن قول جەتكىزىلگەن كەلىسىمدەردىڭ جۇزەگە اساتىنىن ايرىقشا اتادى.
الماتى وبلىسى