ۇكىمەت باسشىسى ولجاس بەكتەنوۆ سۋ تاسقىنى كەزىندە ەگىز ءسابي بوسانعان قالامقاس قوڭىرقاەۆاعا كومەك كورسەتكەن ىرعىز اۋدانى نۇرا اۋىلىنداعى دارىگەرلىك امبۋلاتوريا قىزمەتكەرلەرىنە العىس ءبىلدىردى. ولار – نۇرا دارىگەرلىك امبۋلاتورياسىنىڭ جالپى تاجىريبەلىك دارىگەرى – ساۋيا ساتاەۆا, مەيىربيكەلەر – ايجان الحانوۆا مەن ايارۋ مولشىلىق, دەپ حابارلايدى Egemen.kz.
31 ناۋرىز كۇنى اۋدان ورتالىعىنان 90 شاقىرىم قاشىقتىقتا ورنالاسقان نۇرا اۋىلىنا تاسقىن سۋدىڭ كەلىپ قالعانى تۋرالى حابارلاما تۇسكەندە, اۋىل جۇرتى ابىگەرگە ءتۇستى. بۇل ۋاقىتتا ىرعىز بەن نۇرا اراسىنداعى تاسجولدى سۋ شايىپ, قاتىناس ۇزىلگەندىكتەن, اۋدانداعى اكۋشەر-گينەكولوگ دارىگەرلەردىڭ نۇراعا جەتۋى مۇمكىن بولمادى.
امبۋلاتوريا قىزمەتكەرلەرى تاجىريبەلى دارىگەر ساۋيا ساتاەۆانىڭ باسشىلىعىمەن انانى امان-ەسەن بوساندىردى.
ىلە-شالا نۇرالىقتاردى ەۆاكۋاتسيالاۋعا كەلگەن قورعانىس مينيسترلىگىنە قاراستى اقتوبەدەگى ت.بيگەلدينوۆ اتىنداعى اسكەري اۋە كۇشتەرى ينستيتۋتىنىڭ تىكۇشاعى اناسى مەن سابيلەردى اۋداندىق اۋرۋحاناعا جەتكىزدى.
ىرعىز اۋداندىق اۋرۋحاناسىنىڭ اكۋشەر-گينەكولوگى كامشات سارسەنعاليەۆانىڭ ايتۋىنشا, قازىر ەگىزدەر مەن اناسىنىڭ جاعدايى جاقسى. نارەستەلەردىڭ ەكەۋى دە قىز بالا, بىرەۋىنىڭ سالماعى – 2800 گ, ەكىنشىسىنىڭ سالماعى – 3050 گ.
ولار اۋداندىق اۋرۋحانادا تاسقىن سۋدىڭ بەتى قايتقانشا ەم الادى. كوپبالالى انا قالامقاس قوڭىرقاەۆانىڭ بۇل بەسىنشى, التىنشى سابيلەرى.