پرەمەر-مينيستر ولجاس بەكتەنوۆتىڭ توراعالىعىمەن ينۆەستيتسيالىق احۋالدى جاقسارتۋ جونىندەگى كەڭەستىڭ وتىرىسى ءوتتى, وندا سالىق زاڭناماسىن جەتىلدىرۋ, باسەكەلەستىكتى دامىتۋ جانە سىبايلاس جەمقورلىققا قارسى كۇرەس جونىندەگى حالىقارالىق ستاندارتتاردى ەنگىزۋ ماسەلەلەرى تالقىلاندى.
قازاقستان ۇكىمەتى ەلدىڭ ينۆەستيتسيالىق تارتىمدىلىعىن ودان ءارى جاقسارتۋ ءۇشىن جۇيەلى جۇمىس جۇرگىزىپ كەلەدى. قازىرگى ۋاقىتتا جاڭا سالىق كودەكسى ازىرلەنۋدە, ونىڭ اياسىندا اكىمشىلەندىرۋدىڭ سەرۆيستىك مودەلى ەنگىزىلەدى. وسىلايشا, سالىق تولەۋشىگە تىركەۋدەن باستاپ, ونى ەسەپتەن شىعارۋعا دەيىن فيسكالدىق كومەك كورسەتىلەدى. ناتيجەسىندە, ەلدەگى سالىق ەسەپتىلىگى 30%-عا, سالىق بويىنشا تولەمدەر سانى 20%-عا قىسقارادى دەپ كۇتىلىپ وتىر. بۇل رەتتە بيزنەس ءۇشىن ىنتالاندىراتىن ءتيىمدى جەڭىلدىكتەر ساقتالادى.
قازاقستاندا باسەكەلەستىكتى قورعاۋ مەن دامىتۋدىڭ 2026 جىلعا دەيىنگى تۇجىرىمداماسى ىسكە اسىرىلۋدا, قۇجاتقا سايكەس مەملەكەتتىڭ ەكونوميكاداعى ۇلەسىن 2025 جىلعا قاراي 14%-عا دەيىن تومەندەتۋ كوزدەلگەن.
سونىمەن قاتار سىبايلاس جەمقورلىق تاۋەكەلدەرىمەن كۇرەس بويىنشا بەلسەندى جۇمىس جۇرگىزىلىپ كەلەدى. قازاقستان سىبايلاس جەمقورلىققا جانە كىرىستەردىڭ ءىزىن جاسىرۋعا قارسى ءىس-قيمىل سالاسىنداعى نەگىزگى حالىقارالىق كونۆەنتسيالارعا – سىبايلاس جەمقورلىققا قارسى كۇرەس جونىندەگى ىستانبۇل ءىس-قيمىل جوسپارىنا قوسىلىپ, سىبايلاس جەمقورلىققا قارسى ەلدەر توبىنا كىردى. جالپى حالىقارالىق ۇيىمدارمەن جانە شەتەلدىك سىبايلاس جەمقورلىققا قارسى ورگاندارمەن ءوزارا ۇيلەسىمدى ءىس-قيمىل جولعا قويىلعان.
بەينەكونفەرەنتسبايلانىس جۇيەسى بويىنشا وتىرىس بارىسىندا قازاقستانداعى امەريكالىق ساۋدا پالاتاسىنىڭ اتقارۋشى ديرەكتورى دوريس برەدبەري, كانادانىڭ قر-داعى توتەنشە جانە وكىلەتتى ەلشىسى الان حامسون, ەۋروپالىق وداقتىڭ ەلشىسى كەستۋتيس يانكاۋسكاس, ەىدۇ سىبايلاس جەمقورلىققا قارسى جەلىسىنىڭ ديرەكتورى ولگا ساۆران, سونداي-اق شەتەلدىك ينۆەستور-كومپانيالاردىڭ جانە مەملەكەتتىك ورگانداردىڭ باسشىلارى ءسوز سويلەدى.
وتىرىستى قورىتىندىلاي كەلە, ۇكىمەت باسشىسى بارلىق ايتىلعان ۇسىنىستى زەردەلەۋدى تاپسىردى. قولايلى ينۆەستيتسيالىق كليمات قازاقستاندا ەكونوميكانى ساپالى جاڭعىرتۋ بويىنشا رەفورمالاردى جۇرگىزۋدە ماڭىزدى ءرول اتقارادى. ادال باسەكەلەستىكتى كۇشەيتۋ, جەكەمەنشىكتى قورعاۋ جانە دەمونوپوليزاتسيالاۋ ماسەلەلەرى – ەرەكشە باقىلاۋدا.
«مەملەكەت باسشىسى ءاردايىم ەلدىڭ ينۆەستيتسيالىق احۋالىن جاقسارتۋ قاجەتتىگىنە ەرەكشە نازار اۋدارادى. ۇكىمەت ەلىمىزگە ادال جانە اشىق بيزنەس جۇرگىزۋگە كەلگەندەردىڭ بارلىعىنا سەنىمدى ينۆەستيتسيالىق سەرىكتەس بولۋعا دايىن. ءبىز ءوندىرىستى كەڭەيتۋگە, لوكاليزاتسيانى ۇلعايتۋعا, ەلىمىز ءۇشىن ماڭىزدى جاڭا جوبالاردى ىسكە اسىرۋعا قولداۋ كورسەتۋگە نيەتتىمىز», دەدى و.بەكتەنوۆ.