وڭىردە ەرىگەن قار سۋى سالدارىنان بوگەتتەر مەن ەلدى مەكەندەردى سۋ باسقانى ءمالىم. قىزىل سۋ جۇرگەن اياگوز, اقسۋات اۋداندارىنىڭ تۇرعىندارى ارنايى ەۆاكۋاتسيالاۋ پۋنكتەرىنە ورنالاستىرىلعان ەدى. بۇگىن اۋدان حالقى ۇيلەرىنە ورالدى. جارما جانە اياگوز اۋدانىنداعى سۋ باسقان اۋىلدارعا وبلىس اكىمى نۇرلان ۇرانحاەۆ ارنايى باردى, دەپ حابارلايدى Egemen.kz اباي وبلىسى اكىمدىگىنىڭ ءباسپاسوز قىزمەتىنە سىلتەمە جاساپ.
ءوڭىر باسشىسى جارما جانە اياگوز اۋداندارىندا سۋ تاسقىنىنا قارسى جۇرگىزىلىپ جاتقان ءىس-شارالارمەن تانىستى. قازىرگى ۋاقىتتا جاو مەن وبلىستىڭ تجد ماماندارى تاراپىنان ەرىگەن سۋدى بۇرۋعا بارلىق شارالار قابىلداندى. قازىرگى ۋاقىتتا سۋ دەڭگەيى تومەندەدى.
سونىمەن قاتار اياگوز قالاسىندا وبلىس اكىمى اپپاراتتىق كەڭەس وتكىزىپ, جاۋاپتى ورگاندار مەن بولىمدەرگە بىرقاتار ءتيىستى تاپسىرما بەردى.
ەسكە سالايىق, 28 ناۋرىزدا تارباعاتاي اۋدانىنىڭ اياگوز وزەنىندە سۋ دەڭگەيى 365 سم-گە دەيىن كوتەرىلىپ, سەمەي قالاسىنان كومەك كورسەتۋ ءۇشىن وبلىستىق تجد كۇشتەرى مەن قۇرالدارى جىبەرىلدى. تۇرعىن ۇيلەردى سۋ باسۋدىڭ الدىن الۋعا, سونداي-اق حالىقتى ەۆاكۋاتسيالاۋعا اياگوز قالاسىنىڭ ارنايى كۇشتەرى مەن قۇرالدارى جۇمىلدىرىلدى.
كەشە ەۆاكۋاتسيالانعان اقسۋات اۋدانىنداعى ۋاڭ اۋىلى تۇرعىندارى دا ۇيلەرىنە ورالدى. ولار بوعاس وزەنىندەگى سۋ دەڭگەيىنىڭ كوتەرىلۋىنە بايلانىستى قاۋىپسىز جەرگە جەتكىزىلگەن بولاتىن.
قازىرگى ۋاقىتتا اۋداندارداعى احۋال تۇراقتى.