سۋ تاسقىنى كەزەڭى باستالعاننان بەرى تۇركىستان, اقتوبە, قوستاناي, باتىس قازاقستان, ۇلىتاۋ, اباي, اقمولا وبلىستارىندا 4 694 ادام, ونىڭ ىشىندە 1 682 بالا قۇتقارىلدى. بۇل رەتتە اۋە كەمەلەرىمەن 447 ادام, ونىڭ ىشىندە 180 بالا ەۆاكۋاتسيالاندى. بۇل تۋرالى توتەنشە جاعداي مينيسترلىگىنىڭ ءباسپاسوز قىزمەتى جاريالادى, دەپ حابارلايدى Egemen.kz.
تجم جانە اكىمدىكتەردىڭ كۇشىمەن 2,3 ملن م3 استام ەرىگەن سۋ الىنعان, 162 مىڭنان استام قاپشىق جانە 31 587 توننا ينەرتتى ماتەريال توسەلگەن.
اۆاريالىق-قۇتقارۋ جۇمىستارىنا 6349 ادام, 2192 بىرلىك تەحنيكا, 689 بىرلىك سۋ ايداۋ قۇرالى جانە 55 بىرلىك ءجۇزۋ قۇرالى, تجم, قورعانىس مينيسترلىگى, ءىىم, ۇقك, ۇۇ, جەرگىلىكتى اتقارۋشى ورگانداردىڭ 12 اۋە كەمەسى جۇمىلدىرىلعان.
«جەدەل جەلى» تەلەفوندارىنا 392 قوڭىراۋ كەلىپ ءتۇستى, ەلىمىزدىڭ 12 وڭىرىندە رەسپۋبليكالىق جانە وبلىستىق جەدەل شتابتار جۇمىس ىستەيدى.
ەلىمىزدىڭ 7 وڭىرىندە 435 جەكە تۇرعىن ءۇي مەن 329 اۋلا اۋماعى, سونداي-اق اقتوبە وبلىسىندا 75 ساياجاي ءۇيى مەن 9 عيمارات, كوپقاباتتى تۇرعىن ۇيلەردىڭ 12 اۋلاسى, اقمولا وبلىسىندا بالاباقشا مەن تج اۋرۋحاناسى سۋ استىندا قالىپ وتىر.
18 اۆتوجولدى سۋ شايىپ كەتكەن, ونىڭ ىشىندە 4 كوپىر جانە 14 جول توسەمى بار. 26 ەلدى مەكەندە كولىك قاتىناسى جوق.