اقمولا وبلىسىنىڭ تسەلينوگراد اۋدانىنا قاراستى قوياندى اۋىلىنداعى ۇيلەرىن سۋ العان تۇرعىندار توتەنشە جاعداي جاريالاۋدى تالاپ ەتىپ, نارازىلىعىن ءبىلدىردى. سەبەبى جاعداي ۋشىعىپ, ءبىراز تۇرعىن ءۇي مەن اۋلالاردى سۋ باسىپ قالعان. جاعدايدى كوزبەن كورىپ, جاۋاپتى مەكەمەلەردىڭ ءۋاجىن تىڭداپ كوردىك.
اۋىل تۇرعىندارىنىڭ قاي-قايسىسىنان سۇراساڭ دا: «قىستا قارعا, كوكتەم مەن جازدا لاي-باتپاققا باتامىز», دەيدى. ءسويتىپ, كەشە جەرگىلىكتى تۇرعىندار سۋ باسۋعا قارسى ءىس-شارا قولدانۋعا جەرگىلىكتى بيلىكتىڭ نازارىن اۋدارۋ ماقساتىندا جولعا جينالعان. نارازى تۇرعىندارمەن تسەلينوگراد اۋدانىنىڭ اكىمى باقىتبەك وسپانبەكوۆ جانە اقمولا وبلىستىق تجد باسشىسى قانات دوسپاەۆ كەزدەسىپ, جاعدايدى تۇراقتاندىرۋعا كىرىسكەن.
«ساعات 22.00-دە بارلىق جول اشىلىپ, تۇرعىندار ۇيلەرىنە تارادى. قازىرگى ۋاقىتتا قوياندى اۋىلىندا سۋ تاسقىنىنا قارسى كۇشەيتىلگەن ءىس-شارالار جۇرگىزىلىپ جاتىر. شامامەن 150 مىڭ تەكشە مەتر قار تاسىمالداندى. سونداي-اق قوياندى اۋىلىندا 9,5 مىڭ مەتر ارىق پەن كانال, 46 سۋ وتكىزۋ قۇبىرى تازارتىلدى, 35 مىڭ تەكشە مەتردەن استام قار سۋى شىعارىلدى», دەيدى اۋدان اكىمى.
ال اۋىل تۇرعىندارى قوياندى اۋىلىن سۋ العانى تەك بيىل عانا ەمەس ەكەنىن ايتادى. ولاردىڭ ايتۋىنا قاراعاندا, مۇنداي كەلەڭسىزدىكتى تۇبەگەيلى جويماسا, جىلدا وسىلاي زار قاقساپ وتىراتىن كورىنەدى.
«جالپى اۋىلدىڭ قۇرىلىس جوسپارى عىلىمي جوبالانباعان. بەيبەرەكەت سالىنعان ۇيلەردەن قارعىن سۋ اعىپ وتە الماي, ۇيلەردى سۋ باسىپ جاتىر. بۇرىنعى سۋاعارلارعا دا ءۇي سالىنىپ, ارىقتاردىڭ جولى بوگەلگەن. بۇعان قوسا اۋىل اراسىنا اسفالت جول سالعاندا سۋاعار قالدىرماعان, ياعني كوتەرىڭكى سالىنعان جولدىڭ كوبىندە كوپىر جوق. ال قىستا قار شىعارۋ جۇمىسى دا دۇرىس بولمادى. جولدى اشىپ قويعاننان باسقا ءونىمدى جۇمىس اتقارىلعان جوق. ەرىگەن قار سۋىنىڭ قايدان كەلىپ, قايدا كەتەتىنى جونىندە تەكسەرۋ جۇرگىزىلىپ, دايىندىق جاسالۋ كەرەك قوي», دەيدى اۋىل تۇرعىنى قۇرمەتبەك بەرگەنوۆ.
قوياندى اۋىلىنىڭ اكىمى باقىتحان سولتانباي دا بۇل ءۋاجدى جوققا شىعارمايدى. ونىڭ ايتۋىنشا, قار سۋىنىڭ باسۋىنا ەڭ ءبىرىنشى قارجىنىڭ جەتىسپەۋشىلىگى بولسا, ەكىنشى اۋىل قۇرىلىسى دۇرىس جوسپارلانباعان.
«2004 جىلى قوياندى اۋىلىندا 58 ءۇي بولسا, 2024 جىلعا دەيىن 5 مىڭعا جاقىندادى. اۋىلدىڭ ىشكى جولى – 180 شاقىرىم. ونىڭ 30 شاقىرىمى – اسفالت. 108 كوشە بار. اۋىلدا سۋ جينالاتىن توعان بار. ول جەكە كاسىپكەرگە تيەسىلى. ءبىراز سۋ سوعان جينالادى. بۇعان قوسا سۋ تاسقىنىنىڭ الدىن الۋعا ارنالعان ارىقتار قازىلعان. الايدا اۋىل ءاۋ باستا ينفراقۇرىلىمسىز سالىنعان. مىسالى, ءبىرىنشى ءۇي سالىنعان (تاعانى تالاپقا ساي ەمەس), ودان كەيىن جول تۇسكەن. جول ۇيلەردەن بيىك تۇر. ماسەلەنىڭ ۋشىعۋىنا وسىنداي نارسەلەر سەبەپ بولىپ وتىر. قىستا قار شىعارۋعا 55 ملن تەڭگە ءبولىندى. بىراق اۋىلدىڭ بۇكىل قارىن قىس بويى شىعارىپ وتىرۋعا بۇل قاراجات جەتكىلىكسىز. بۇعان ەڭ كەمى جارتى ملرد قارجى كەرەك. مۇنىمەن ماسەلەنى تۇبەگەيلى شەشۋگە بولادى. 55 ملن قارجىنىڭ كۇشىمەن جۇمىستار جۇرگىزىلدى. 38 مىڭ تەكشە مەتر قار شىعارىلدى. اتقارىلعان جۇمىستاردى اۋدان باسشىلىعىنا بايانداپ وتىردىق. قىسقاشا ايتقاندا, قوياندىنىڭ مارتەبەسى – اۋىل, وعان بولىنەتىن قارجى دا اۋىلدىق دەڭگەيدە. ال شىن مانىندە بۇل اۋىل – كەيبىر اۋدانداردان دا ءىرى ەلدى مەكەن», دەيدى اۋىل اكىمى.
قوياندى اۋىلىندا سۋ سورۋ جۇمىستارى جالعاسىپ جاتقانى بايقالادى. قازىرگى كەزدە جاعداي ءبىرشاما تۇراقتانعان. اقمولا وبلىسى تجد ءباسپاسوز قىزمەتىنىڭ مالىمەتىنشە, سۋ تاسقىنىنا قارسى جۇمىستارعا اقمولا وبلىسى مەن استانا قالاسى تجد جانە جەرگىلىكتى اتقارۋشى ورگانداردىڭ كۇشتەرى مەن تەحنيكاسى تارتىلعان.
«27 ناۋرىز كۇنگى ساعات 06.00 جاعداي بويىنشا قوياندى اۋىلىندا 80 مىڭ تەكشە مەتر ەرىگەن قار سۋى سورعىزىلدى. بۇعان اقمولا وبلىسى مەن استانا قالاسى تجد جانە جەرگىلىكتى اتقارۋشى ورگانداردان 76 ادام, 17 تەحنيكا جانە 18 موتوپومپا تارتىلدى. قازىرگى كەزدە جاعداي قالىپتى», دەدى اقمولا وبلىسى تجد باستىعى ق.دوسپاەۆ.