وڭىرلەردە سۋ تاسقىنىنا قارسى ءىس-شارالار بەلسەندى جالعاسىپ جاتىر

11 وڭىردە اكىمدىكتەر مەن تجد وكىلدەرىنىڭ كەزەكشىلىگى ۇيىمداستىرىلدى. سۋ ايدىندارى مەن سۋ تاسقىنى جاعدايىنا مونيتورينگ جۇرگىزۋ بويىنشا جۇمىستار جالعاسىپ جاتىر. جەدەل جەلى تەلەفونى ىسكە قوسىلدى: تجم 8 717 2 70 41 14, اقتوبە وبلىسى تجد 8 713 2 54 86 57, باتىس قازاقستان وبلىسى تجد  8 711 2 55 40 88.

ەرىگەن قار سۋىمەن كۇرەسۋ ءۇشىن اقتوبە جانە قوستاناي وبلىستارىنا ماڭعىستاۋ, قىزىلوردا وبلىستارى مەن 52859, 20982 اسكەري بولىمدەرىنەن 220-عا جۋىق جەكە قۇرام مەن 25-تەن استام تەحنيكادان قوسىمشا كۇشتەر مەن قۇرالدار جىبەرىلدى.

اۆاريالىق-قۇتقارۋ جۇمىستارىنا بارلىعى 1,5 مىڭعا جۋىق ادام, 500-دەن استام تەحنيكا, 200-گە جۋىق بىرلىك سۋ ايداۋ جانە ءجۇزۋ قۇرالى جۇمىلدىرىلدى.

تجم مەن اكىمدىكتەردىڭ جۇمىلدىرىلعان كۇشتەرى مەن قۇرالدارى 320 مىڭنان استام تەكشە مەتر سۋ الىنىپ, ينەرتتى ماتەريالدار سالىنعان 7 مىڭنان استام قاپ توسەلگەن. ەڭ قاۋىپتى ۋچاسكەلەردە نىعايتۋ جۇمىستارى جۇرگىزىلىپ جاتىر. 

اقتوبە وبلىسىنداعى شۇبارقۇدىق اۋىلىندا سۋ باسقان 5 جەكە تۇرعىن ۇيدەن, 34 اۋلا اۋماعىنان سۋدى شىعارۋ جۇمىستارى جالعاسىپ جاتىر. جالپى وبلىس بويىنشا سۋ باسقان ۇيلەر مەن اۋلا اۋماقتارىنان 51 مىڭنان استام تەكشە مەتر ەرىگەن قار سۋى الىنىپ, ينەرتتى ماتەريالدار سالىنعان 7,9  مىڭنان استام قاپ توسەلدى. 543 تەكشە مەتر قار شىعارىلعان. 

قوستاناي وبلىسىنىڭ قوستاناي, ارقالىق قالالارىندا, امانگەلدى جانە جانگەلدى اۋداندارىندا ەرىگەن قار سۋىن الۋ جۇمىستارى جۇرگىزىلىپ جاتىر. ارقالىق قالاسىندا 20 اۋلا اۋماعى, ونىڭ ىشىندە 12 جەكە تۇرعىن ءۇي سۋ استىندا قالدى. ۇزدىكسىز جۇرگىزىلگەن سۋ الۋ جۇمىستارىنىڭ ناتيجەسىندە ارقالىق قالاسىنىڭ تۇرعىن ۇيلەرىنەن سۋ تولىعىمەن شىعارىلدى. بارلىعى 6848 تەكشە مەتر سۋ الىندى. ەلدى مەكەندەردى سۋ باسۋ قاۋپى جوق. قازىرگى ۋاقىتتا جاعداي تۇراقتى.

سۋ تاسقىنىنا قارسى ءىس-شارالار جالعاسىپ جاتىر.