ۇلىستىڭ ۇلى كۇنىن قوستاناي قالاسىنىڭ تۇرعىندارى دا ەرەكشە قۋانىشپەن توي-دۋمانداتىپ قارسى الدى. قالانىڭ ورتالىعىندا وتىزعا تارتا وتاۋ تىگىلىپ, مەرەكەلىك كونتسەرت, ۇلتتىق سپورت سايىستارى, قولونەر تۋىندىلارى مەن ۇلتتىق تاعامدار فەستيۆالى ءوتتى.
ورتالىققا جينالعان جۇرت مەرەكە الاڭىنداعى ۇلكەن ساحنادا ونەر كورسەتكەن ءوڭىر ونەرپازدارىنىڭ كونتسەرتىن تاماشالادى. ايماق باسشىسى دا وبلىس تۇرعىندارىن وسى ساحنادان قۇتتىقتاپ, كوپشىلىككە جۇرەكجاردى جىلى لەبىزىن ارنادى. «بارشاڭىزدى جاڭارۋ مەن جاسامپازدىقتىڭ باستاۋى, ىرىس پەن بەرەكەنىڭ ارقاۋى – ناۋرىز مەيرامىمەن قۇتتىقتايمىن. تاريحى تەرەڭدە جاتقان بۇل عاجايىپ مەرەكە جاڭا ءومىردىڭ باستاۋى سانالادى. بۇل – داستارقانعا اق تولاتىن, ەلىمىزگە باق قوناتىن, بەرەكەمىز شالقيتىن كۇن. بيىل بۇكىل ەل بولىپ ۇلىستىڭ ۇلى كۇنىن جاڭاشا, ەرەكشە سيپاتتا اتاپ ءوتىپ جاتىرمىز. ناۋرىز ەلىمىزدەگى جاڭارۋ مەن جاڭعىرۋدىڭ باستى نىشانىنا اينالىپ وتىر. بەرەكەمىز ارتىپ, قۋانىش-شاتتىعىمىز ورتايماسىن, اعايىن!», دەدى اكىم.
ودان كەيىن مەرەكەلىك الاڭنان قىدىر اتا باستاعان تاريح كەرۋەنى ءجۇرىپ ءوتتى. تايقازان كوتەرگەن نايزالى جىگىتتەر, تازى جەتەكتەگەن سەرىلەر, كۇبى ءپىسىپ, ماي شايقاعان, تەكەمەت توقىپ, كيىزگە ويۋ-ورنەك سالىپ جاتقان قىز-كەلىنشەكتەر, ءان سالىپ, كۇي اۋەلەتكەن دۋمانشىل جاستار, اسىق اتقان بالالار, تەكەتىرەسكەن بالۋاندار, قازاقتىڭ تۇرمىستىق قولونەر بۇيىمدارىن ۇستاعان ارۋ بويجەتكەندەر ىعى-جىعى الاڭدى كونەنىڭ كولەڭكەسىندە قالعان تۇرمىس پەن مادەنيەت تاريحىنان سىر شەرتكەن كوركەم كورىنىستەرگە تولتىرىپ بىرىنەن كەيىن ءبىرى ءتىزىلىپ ءوتىپ جاتتى.
مەرەكە اياسىندا وتكەن «وتاۋلار فەستيۆالى» دە ناۋرىز تويىنىڭ مەرەكەلىك مازمۇنىن اشىپ, شىرايىن كىرگىزە تۇسكەندەي. جاعالاي ورنالاسقان كيىز ۇيلەردىڭ ءىشى قۇددى ءبىر مۋزەي ءتارىزدى, ءسان-سالتاناتى بىرىنەن ءبىرى وتەدى. مىسالى, «بولشەۆيچكا» تىگىن فابريكاسى اۋدانى 80 شارشى مەتر بولاتىن 16 قانات كيىز ءۇي تىگىپتى.
«بۇل كيىز ءۇيدى قىرعىزستاننان ارنايى تاپسىرىس بەرىپ الدىردىق. الدىمەن ەلىمىزدەگى شەبەرحانالاردى ارالاپ كوردىك, ودان كەيىن بىشكەككە ۇشىپ باردىق. بىزگە كورشى ەلدىڭ شەبەرلەرى ۇسىنعان كيىز ۇنادى. كيىز ءۇيدى ءۇش كۇن بويى تىكتىك», دەيدى تىگىن فابريكاسى ديرەكتورىنىڭ ورىنباسارى اناتولي چۋيكو.
ال «Allur» اۆتوكولىك قۇراستىرۋ زاۋىتى تۇرعىزعان كيىز ءۇيدىڭ كەرەگەسىنە LED-ەكران ءىلىنىپتى. ۇلكەن ەكراننان كيىز ءۇي جابدىقتارى مەن ماشينا جاساۋ زاۋىتىنداعى ءوندىرىس بارىسىن تاماشالاۋعا بولادى. ء«بىز وتكەن تاريح پەن قازىرگى ءومىرىمىزدى بايلانىستىرعىمىز كەلدى. كيىز ءۇي – كوشپەلى قازاق تۇرمىسىنىڭ, ال ءبىزدىڭ اۆتوكولىكتەر بۇگىنگى قوزعالىستىڭ نىشانى. سوندىقتان ءبىزدىڭ وتاۋعا باس سۇققان مەيماندار LED-ەكران ارقىلى كيىز ءۇي جابدىقتارىن عانا قىزىقتاپ قويماي, زاۋىتقا ۆيرتۋالدى ساياحات جاساپ, ءوندىرىس الاڭدارىنداعى تەحنولوگيالىق ۇدەرىستەرمەن, ءىرى جوبالارمەن تانىسا الادى», دەيدى زاۋىت وكىلدەرى.
مەرەكە بارىسىندا بالۋاندار بەلدەسۋى, اۋدارىسپاق, جىلىك شاعۋ, قوي كوتەرۋ, قولكۇرەس, اسىق, جامبى اتۋ ءتارىزدى ۇلتتىق سپورت تۇرلەرى بويىنشا جارىستار ءوتتى. اسىرەسە جەرگىلىكتى ەتنومادەني بىرلەستىكتەردىڭ اتىنان ون شاقتى اسپاز قاتىسقان «پالاۋلار الەمى» اتتى بايقاۋدى قىزىقتاعان جۇرت قاراسى كوپ بولدى. بايقاۋ شارتى بويىنشا اسپازدىڭ شەبەرلىگى پالاۋدىڭ تەز پىسۋىنە, سونداي-اق تاعامنىڭ تابەت وياتار حوش ءيىسى مەن دامدىلىگىنە قاراي باعالاندى.
قوستاناي وبلىسى