رەسەيدىڭ ماسكەۋ قالاسىندا ورنالاسقان «كروكۋس سيتي حولل» كونتسەرت زالىندا بولعان لاڭكەستىككە قاتىسى بار سەگىزىنشى كۇدىكتى ۇستالدى, دەپ حابارلايدى Egemen.kz.
كۇدىككە ىلىنگەن قىرعىزستان ازاماتى الىشەر قاسىموۆ لاڭكەستەردىڭ جوسپارىنان بەيحابار بولعانىن ايتىپ وتىر. تەرگەۋ مالىمەتتەرىنە قاراعاندا, ول ۇستالعان كۇدىكتىلەرگە پاتەردى جالعا بەرگەن. قاسىموۆتىڭ سوزىنشە, ول «اۆيتو» قوسىمشاسىنىڭ قىزمەتى ارقىلى عانا ولارمەن بايلانىستا بولعان.
ەسكە سالا كەتەيىك, كەشە ماسكەۋدىڭ باسمانسكي سوتىنا تاعى ءۇش كۇدىكتى جەتكىزىلگەن ەدى. ولاردىڭ ءبىرى ديلوۆار يسمولوۆ تەرروريستەرگە دەلدال رەتىندە كومەكتەستى دەگەن ايىپپەن ۇستالدى. سونداي-اق ول ۇستالعاندار مىنگەن «رەنو» كولىگىنىڭ تۇپكى يەسى بولىپ شىقتى.
وعان قوسا ديلوۆاردىڭ 62 جاستاعى اكەسى يسرويل يسمويلوۆ پەن ونىڭ 33 جاستاعى اعاسى امينچون سالوموۆ قاماۋعا الىندى. ولار تاعىلعان ايىپپەن كەلىسپەي وتىر.
تەرگەۋشىلەردىڭ نۇسقاسى بويىنشا, ديلوۆار مەن امينچون 24 ناۋرىزدا قاماۋعا الىنعان شامسيددين ءفاريدۋنيدى قىلمىستىق توپقا تارتقان.
ەسكە سالايىق, 22 ناۋرىزدا ماسكەۋدەگى «كروكۋس سيتي حولل» كونتسەرت زالىندا تەراكت بولدى. بەلگىسىز بىرەۋلەر كۇزەتشىلەرگە, كەيىن فويەدەگى كورەرمەندەرگە وق جاۋدىرعان. قازا تاپقاندار سانى جۇزدەن استى.