استانا قالاسىنىڭ اكىمى جەڭىس قاسىمبەك Instagram پاراقشاسىندا قالاداعى جولداردى جوندەۋ جۇمىسى قالاي جۇرگىزىلەتىنى تۋرالى ءمالىم ەتتى, دەپ حابارلايدى Egemen.kz.
«قىس مەزگىلىنەن كەيىن ناشار جوندەلگەن جولداردىڭ كەمشىن تۇستارى كورىنە باستادى.
جاۋاپتى باسقارما جول جۇمىسشىلارمەن بىرگە جوندەلەتىن كوشەلەردىڭ ۇزاققا شىداۋىن قامتاماسىز ەتۋى كەرەك. جۇمىس ءمىنسىز, لايىقتى كۇيدە جانە سىن كوتەرەتىن دەڭگەيدە ورىندالۋى كەرەك. ەلوردانى ارالاۋ بارىسىندا قالانىڭ بارلىق اۋدانىنا بارىپ, بيىلعا ارنالعان جوسپارلارىن بەلگىلەدىك. بيىل جول جوندەۋ جۇمىسى ەرتەرەك باستالادى. ۇزىندىعى 60 كم بولاتىن 50-دەن استام كوشەنى جوندەۋدى جوسپارلاپ وتىرمىز. سول سياقتى 20-دان استام ءىرى نىسان بار. ولاردىڭ ءبىر بولىگىن بيىل اياقتايمىز, تاعى ءبىر بولىگىنىڭ (كوشەلەر, جول ايرىقتارى, كوپىرلەر جانە ت.ب.) قۇرىلىسىن بيىل باستايمىز.
سونداي-اق تروتۋارلاردى, الەۋمەتتىك نىساندارعا كىرەبەرىس جولداردى, ايالداما قالتارىستارىن, پاندۋستاردى جانە ت.ب. جابدىقتاۋدى جوسپارلاپ وتىرمىز.
ەڭ الدىمەن كولىك كوپ جۇرەتىن, جاڭا الەۋمەتتىك نىساندار (كىرمە جولدار) بار ورىنداردا, سونىمەن قاتار ەلدى مەكەندەردە جولدار جوندەلىپ, سالىنادى. قۇرىلىس جۇمىسى قارقىندى ءجۇرىپ جاتقان اۋداندارعا توقتالار بولسام, وندا ينجەنەرلىك ينفراقۇرىلىم مەن تۇرعىن ۇيلەردىڭ قۇرىلىسى اياقتالعاننان كەيىن عانا جولدار سالىنادى; وعان دەيىن جاۋاپتى باسقارما ۋاقىتشا توسەممەن قامتاماسىز ەتۋى كەرەك. سونداي-اق قازىر كوممۋنالدىق قىزمەتتەر سۋ تاسقىنىنا قارسى بەلسەندى جۇمىس جۇرگىزىپ جاتىر: قار شىعارۋ, كوللەكتورلاردى, ناۋا-ارىق جەلىسىن, باقىلاۋ جانە جاڭبىر قابىلداۋ قۇدىقتارىن تازالاۋ جانە ت.ب.,» دەيدى جەڭىس قاسىمبەك.