ناۋرىزناما ونكۇندىگى اياسىندا سەنات توراعاسى ماۋلەن اشىمباەۆ باستاعان ءبىر توپ دەپۋتات ەلورداداعى مۇگەدەكتىگى بار بالالارعا ارنالعان وڭالتۋ ورتالىعىنىڭ قىزمەتكەرلەرىمەن جانە ەمدەلۋشىلەرىمەن كەزدەستى.
ماۋلەن اشىمباەۆ ءوز سوزىندە اتالعان ورتالىقتىڭ بىرنەشە جىلدان بەرى ەرەكشە قاجەتتىلىكتەرى بار بالالاردى دامىتۋ جانە ينكليۋزيۆتى قوعام قالىپتاستىرۋ جولىندا بەلسەندى جۇمىس ىستەپ كەلە جاتقانىنا نازار اۋداردى. سونداي-اق پالاتا سپيكەرى بۇل ماسەلەگە مەملەكەت باسشىسى ۇنەمى باسا ءمان بەرىپ وتىرعانىن اتاپ ءوتتى. ەل پرەزيدەنتىنىڭ تاپسىرماسىمەن قازاقستاندا مۇمكىندىگى شەكتەۋلى ازاماتتاردى قولداۋ جانە كەدەرگىسىز ورتا قۇرۋ باعىتىندا اۋقىمدى جۇمىس اتقارىلىپ, بەرىك ينستيتۋتسيونالدىق نەگىز قالىپتاسىپ كەلەدى.
«قازىرگى تاڭدا ەلىمىزدە مۇمكىندىگى شەكتەۋلى جاندارعا قولداۋ كورسەتۋ, ولاردى الەۋمەتتىك قورعاۋ باعىتىندا كەشەندى جۇمىس جۇرگىزىلىپ كەلەدى. كەدەرگىسىز, ينكليۋزيۆتى ورتا قالىپتاستىرۋ – مەملەكەتىمىزدىڭ الدىندا تۇرعان ماڭىزدى مىندەتتەردىڭ ءبىرى. پرەزيدەنت قاسىم-جومارت توقاەۆتىڭ تاپسىرماسىمەن ەلىمىزدە ەرەكشە قاجەتتىلىكتەرى بار ەرەسەكتەر مەن بالالاردىڭ ورتاعا بەيىمدەلۋىنە, ولاردىڭ ساپالى ءبىلىم مەن مەديتسينالىق قىزمەت الۋىنا, سپورتپەن شۇعىلدانۋىنا جانە جۇمىسپەن قامتىلۋىنا قاجەتتى جاعداي جاسالىپ جاتىر. سونداي-اق پارلامەنت سەناتى دا مۇگەدەكتىگى بار ازاماتتاردىڭ قۇقىقتارىن قورعاۋدى كۇشەيتۋ جانە تۇرمىس ساپاسىن جاقسارتۋ سالاسىندا ءتيىستى شارالار قابىلداپ كەلەدى», دەگەن ماۋلەن اشىمباەۆ پالاتا جانىنان مۇمكىندىگى شەكتەۋلى جاندارعا قولداۋ كورسەتۋ ماقساتىمەن قۇرىلعان ينكليۋزيا جونىندەگى كەڭەستىڭ قىزمەتىنە توقتالىپ ءوتتى.
كەزدەسۋ بارىسىندا سەناتورلار ەستۋ, سويلەۋ, كورۋ, اۋتيزم سپەكترى جانە باسقا دا اۋىتقۋلارى بار بالالاردى وقىتۋدىڭ ارنايى جوبالارىمەن جانە مامانداندىرىلعان ادىستەمەسىمەن تانىستى. وسى رەتتە ورتالىقتا ينتەراكتيۆتى بولمەلەر, ارنايى ازىرلەنگەن دامىتۋشى جابدىقتارى بار سەنسورلىق-ديناميكالىق زالدار جۇمىس ىستەيتىنىن اتاپ وتكەن ءجون.
ورتالىق باسشىلىعىنىڭ ايتۋىنشا, قازىرگى تاڭدا بۇل جەردىڭ ەسەبىندە 200 بالا جانە پسيحونەۆرولوگيالىق پاتولوگياسى بار 42 ەرەسەك ادام بار. مەكەمەنىڭ نەگىزگى مىندەتتەرىنىڭ ءبىرى – بەلسەندى ومىرلىك پوزيتسيا مەن بالالاردىڭ وزىنە-ءوزى كومەكتەسۋ داعدىلارىن قالىپتاستىرۋ جانە ولاردىڭ جان-جاقتى دامۋىنا ىقپال ەتۋ. وسىعان بايلانىستى ەستۋ قابىلەتى بۇزىلعان 20-عا جۋىق ادام, ودان بولەك, مۇمكىندىگى شەكتەۋلى بالا تاربيەلەپ وتىرعان اتا-انالاردىڭ وزدەرى ورتالىقتا اسپاز, تاربيەشىنىڭ كومەكشىسى بولىپ ەڭبەك ەتەدى. بۇل الەۋمەتتىك بەيىمدەلۋ مەن دامۋ ءۇشىن قولايلى اتموسفەرا قالىپتاستىرۋعا ىقپال ەتەدى.
ورتالىقتىڭ ۇجىمىن جانە تاربيەلەنۋشىلەرىن ناۋرىز مەيرامىمەن قۇتتىقتاعان ماۋلەن اشىمباەۆ مەملەكەت باسشىسىنىڭ باستاماسىمەن بيىل اتالعان مەرەكە ناۋرىزناما-2024 تۇجىرىمداماسى اياسىندا جاڭا فورماتتا اتالىپ ءوتىپ جاتقانىن ايتتى. مۇنداي قادام ۇلتتىق بىرەگەيلىكتى نىعايتۋدى كوزدەيدى. كورىسۋ كۇنىنەن باستالعان ناۋرىزنامانىڭ ءار كۇنىنىڭ اتاۋى مەن ءمان-ماعىناسى بار. سوعان سايكەس بۇگىن, ياعني 19 ناۋرىز – جاڭارۋ كۇنى ەكەنى بەلگىلى. بۇل تابيعاتتىڭ جاڭارۋىمەن قاتار تۇتاس قازاقستاندىق قوعامنىڭ جاڭعىرۋىن دا بىلدىرەتىن مانگە يە.