ايتىپ كەلمەيتىن اپاتتار مەن ءتۇرلى جول-كولىك وقيعالارى وزىق تەحنولوگيالارمەن جابدىقتالعان مەديتسينالىق ورتالىقتاردىڭ قاجەتتىلىگىن ارتتىرىپ وتىر. وسى ورايدا الماتىداعى №4 قالالىق كلينيكالىق اۋرۋحانا بازاسىندا وڭىرلىك تراۆماتولوگيا جانە ورتوپەديا ورتالىعىن قۇرۋ جوسپارلاندى.
الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە, جاڭا ورتالىق اۋىر جاراقات العان ناۋقاستارعا شۇعىل كومەكتەن باستاپ, وڭالتۋ كەزەڭىنە دەيىنگى بارلىق ساتىدا مامانداندىرىلعان قىزمەت كورسەتەدى. باستامانى جۇزەگە اسىرۋعا مەگاپوليستەگى جەتەكشى مەكەمەلەردىڭ ءبىرى – №4 كلينيكالىق اۋرۋحانانىڭ تاڭدالۋى تەگىن ەمەس. مۇندا جىلىنا 19 مىڭداي پاتسيەنت ەم قابىلداپ, 12 مىڭعا جۋىق وپەراتسيا جاسالادى. ماسەلەن, 2025 جىلى ءىرى بۋىنداردى ەندوپروتەزدەۋگە قاتىستى 2 250 وپەراتسيا ءساتتى وتكەن. قازىردىڭ وزىندە جاڭا ورتالىقتى قۇرۋعا دايىندىق رەتىندە اۋرۋحانانىڭ قابىلداۋ ءبولىمى تولىقتاي قايتا جاڭعىرتىلدى.
مۇنداي ورتالىقتىڭ اشىلۋى ەلدىڭ وڭتۇستىك وڭىرىندەگى تراۆماتولوگيالىق قىزمەتتى ۇيلەستىرۋدى كۇشەيتىپ, مامانداردىڭ بىلىكتىلىگىن ارتتىرۋعا, عىلىمي زەرتتەۋ باعىتتارىن دامىتۋعا جول اشادى. بۇل ماڭىزدى جوبانى دەنساۋلىق ساقتاۋ مينيسترلىگى, قالا اكىمدىگى, اكادەميك ن.باتپەنوۆ اتىنداعى ۇلتتىق عىلىمي تراۆماتولوگيا جانە ورتوپەديا ورتالىعى تولىقتاي قولداپ وتىر.
ورتالىقتى اشۋعا دايىندىق اياسىندا اۋرۋحانا بازاسىندا ر.ۆرەدەن اتىنداعى تراۆماتولوگيا جانە ورتوپەديا ۇلتتىق مەديتسينالىق زەرتتەۋ ورتالىعى (رەسەي) ماماندارىنىڭ قاتىسۋىمەن شەبەرلىك سىنىپتارى مەن عىلىمي-تاجىريبەلىك كونفەرەنتسيا ءوتتى. باسقوسۋ ناتيجەسىندە ەكىجاقتى ىنتىماقتاستىق تۋرالى مەموراندۋمعا قول قويىلىپ, زاماناۋي مەديتسينالىق تەحنولوگيالاردى بىرلەسە ەنگىزۋ كوزدەلدى.
– اۋرۋحانامىز ءداستۇرلى تۇردە تراۆماتولوگيا سالاسىنا ماماندانعان. ينفراقۇرىلىمدى دامىتىپ, ەمدەۋدىڭ جاڭا تاسىلدەرىن ەنگىزۋ ارقىلى بۇل باعىتتى ودان ءارى كۇشەيتىپ كەلەمىز. ورتالىقتىڭ قۇرىلۋى جەتەكشى ماماندارمەن ءوزارا ءتيىمدى ءىس-قيمىلدى كەڭەيتۋگە مۇمكىندىك بەرەدى, – دەدى №4 قالالىق كلينيكالىق اۋرۋحانانىڭ ديرەكتورى ءبىرجان دوسمايىلوۆ.
حالىقارالىق ساراپشىلار دا جوبانىڭ وزەكتىلىگىن جوعارى باعالاپ وتىر. ر.ۆرەدەن اتىنداعى ورتالىقتىڭ ديرەكتورى راشيد تيحيلوۆ: «وڭىرلىك ورتالىق قۇرۋ – دەر كەزىندە قولعا الىنعان ماڭىزدى قادام. قازىرگى تراۆماتولوگيا ۇزدىكسىز تاجىريبە الماسۋ مەن جاڭا تەحنولوگيالاردى ەنگىزۋدى تالاپ ەتەدى. الماتىدا بۇل ءۇشىن بارلىق جاعداي جاسالعان», دەپ اتاپ ءوتتى.
الماتى