اقىسىز قىزمەت كورسەتەتىن دارىگەرلەر

وسىنداي تاڭعالارلىق جاڭا­لىقتى ەستىپ, اقجەلەڭدى ابزال جاندارمەن تانىسۋعا اسىقتىق. بۇگىندە قاتارى 12-گە جەتكەن توپ مۇشەلەرىنىڭ ءبارى دە اقتوبەدەگى مارات وسپانوۆ اتىنداعى باتىس قازاقستان مەديتسينا ۋنيۆەر­سيتەتىن بىتىرگەن وندىردەي جاس جىگىتتەر ەكەن.

– ءبارىمىز وسى ءوڭىردىڭ تۋماسىمىز. ءارتۇرلى ماماندىقتا قاتارلاس وقىدىق. كەيىنگى 4–5 جىلدا ەڭبەككە ارالاسىپ, ءتۇرلى مەكەمەدە قىزمەت ەتىپ ءجۇرمىز. ءوزارا كەزدەسىپ تۇراتىنبىز. بىل­تىر قىركۇيەك ايىندا «جالا­قى الىپ جاساپ جۇرگەن قىزمە­تىمىزدەن بولەك, حالىققا ءبىر پايدامىزدى تيگىزسەك قايتەدى؟» دەگەن وي تۋدى. ءسويتىپ, بىردەن ىسكە كىرىستىك. ول ءۇشىن ەشكىمنەن كومەك, دەمەۋشىلىك سۇراعان دا جوقپىز. ماق­ساتىمىز الىس اۋىلعا, شالعاي تۇكپىرگە بارىپ, ءبىر كۇن تەگىن دا­­­­­رىگەرلىك-دياگنوستيكالىق قىز­­­­مەت كورسەتۋ, ساپالى مامان كەڭە­­سىن بەرۋ بولدى. ەڭ اۋەلى ءوز كو­لىگىمىزبەن تەرەكتى اۋدانىنا قا­راس­تى اڭقاتى اۋىلىنا تارتىپ كەتتىك, – دەيدى ورال قالاسىنداعى وبلىستىق كوپبەيىندى اۋرۋحانادا قىزمەت ەتەتىن مامان ەركەبۇلان ماعزوموۆ.

جىگىتتەر بۇل باستامالارىنىڭ زاڭعا سايكەس بولۋىن دا ويلاستىرىپتى. قوعامدىق بىرلەستىك سەكىلدى ۇيىم قۇرۋ كەرەك شىعار دەپ, اۋەلى تىركەۋ ورىندارىنا بارعان. ولار دەنساۋلىق ساقتاۋ باسقارماسىنا جولداپتى. «مىناۋ جاقسى يدەيا ەكەن, بىزدەن قارسىلىق جوق, بىراق الدىمەن مەديتسينالىق جانە فارماتسەۆتيكالىق باقى­لاۋ كوميتەتىنىڭ وبلىستىق دە­پارتامەنتىنىڭ الدىنان وتىڭ­دەر» دەيدى باسقارماداعىلار. بۇ­رىن مۇندايدى كورمەگەن دەپارتامەنت نە ايتارىن بىلمەگەن.

ء«بىز ەشكىمدى ەمدەمەيمىز, ەم-دوم شاراسىن جۇرگىزبەي­مىز. ماقساتىمىز – الىس اۋىلدا تۇراتىن, قالاعا, كاسىبي بىلىك­تى ماماندارعا قارالۋعا مۇم­كىن­دىگى بولا بەرمەيتىن جاندار­عا جولىعىپ, كونسۋلتاتيۆتى دياگنوستيكالىق باعىتتا جار­دەم بەرگىمىز كەلەدى. وعان ءبىر تيىن دا اقى المايمىز. شىن جۇرەگىمىزدەن شىققان شىنايى نيەتىمىز – حالىققا پايدامىزدى تيگىزۋ», دەپ سەندىرگەن جاس جىگىتتەر نار تاۋەكەل دەپ ىسكە كىرىسىپتى.

العاشقى ساپار اڭقاتى اۋى­لىنان باستالدى دەدىك قوي. اق نيەتپەن كەلگەن دارىگەرلەردى اۋىل حالقى قۇشاق جايا قارسى الدى. اۋىلداعى امبۋلاتوريا ەسىگىن ايقارا اشىپ, بارىنشا قولداۋ كورسەتكەن. 60-قا جۋىق اۋىل تۇرعىنى كەلىپ قارالىپ, كاسىبي كەڭەس الىپ ۇلگەرگەن.

– جالپى, وسىنداي يدەيانى الماتى قالاسىندا تاجىريبە جە­تىلدىرىپ جۇرگەن كەزىمدە كورگەن ەدىم. ءوزىمنىڭ ماماندىعىم – نەيروحيرۋرگ, ۇستازىم مىڭجىلقى سايلاۋ ۇلىنىڭ قاراۋىندا قىزمەت ەتتىم. سول كەزدەرى الماتىلىق دارىگەرلەر, اراسىندا «بولاشاق» باعدارلاماسىمەن شەتەلدە ءبىلىم الىپ قايتقان مىقتى ماماندار دا بار, الىس اۋىلدارعا بارىپ, اعارتۋشىلىق دارىستەر وتكىزەدى ەكەن. ولاردىڭ وسى ءىسى اۋىل ادامدارىنا, اسىرەسە وقۋشىلارعا ەرەكشە قۋانىش, موتيۆاتسيا سىيلايتىنىن كورىپ, قىزىقتىم, – دەيدى دوسحان تالعات ۇلى اڭگىمەگە ارالاسىپ.

باستاما قولعا الىنعالى بەرى دارىگەر جىگىتتەر باتىس قازاقستان وبلىسىنىڭ شالعاي جاتقان 4 اۋى­لىنا – تەرەكتى اۋدانىنداعى اڭقاتى مەن شاعاتاي, اقجايىق اۋدانىنداعى ەسەنساي مەن قا­راۋىلتوبە اۋىلدارىنا بارىپ ۇلگەردى. بۇل اۋىلداردىڭ ءبارى دە جايىقتىڭ سول جاعىندا جاتقان, وبلىس ورتالىعىنان الىس, توماعا-تۇيىق ەلدى مەكەندەر.

– اۋىلىمىزعا كىلەڭ جاس­­­­­­تار­­دان قۇرالعان مەديتسي­نا­لىق توپ كەل­گەندە ەرەكشە قۋان­دىق. جاس بولسا دا ارقايسىسى ءوز سالا­سىنىڭ مىقتى مامانى ەكەن. امبۋلاتوريا عيماراتىندا ناۋ­قاستاردى وتە جاقسى قابىلداپ, اۋرۋدى ەمدەۋ, الدىن الۋ, ساقتا­نۋ جولدارىن جەتە ءتۇسىندىرىپ بەردى. جەرگىلىكتى تۇرعىنداردىڭ العىسىندا شەك جوق, – دەيدى شاعاتاي اۋىلىنىڭ اكىمى رۇستەم مۇتيەۆ.

– اۋىل تۇرعىندارى دارى­گەرگە دەر كەزىندە قارالا بەر­مەي­دى. اۋرۋحاناعا كوبىنە وتە اۋىر جاعدايدا ءتۇسىپ جاتادى. سوندىقتان ءبىز حالىقپەن كەزدەسكەندە اڭگىمەمىزدى اعارتۋ دا­رىس­تەرىنەن باستايمىز. مىسالى, قازىر ءجيى كەزدەسەتىن قان تامىرلارى اۋرۋلارى كۇندەلىكتى مايلى تاماق جەۋدەن باستالادى. جۇيەلى تۇردە دەنە شىنىقتىرۋدىڭ پايداسىن بىلسە دە قولعا المايتىندار كوپ. ءبىزدىڭ دوسحان تالعات ۇلى كوبىنە ينسۋلتپەن اينالىساتىن بولعان سوڭ, قان تامىرلارى اۋرۋلارى تۋرالى شاعىن, بىراق اسەرلى اڭگىمەسىن كورنەكى قۇرالدارمەن كورسەتىپ ايتىپ بەرەدى. تەراپەۆت ادىلبەك ارتەريالدى گيپەرتەنزيانىڭ شىعۋ سەبەپتەرىن كورسەتەدى, – دەيدى تۇرار مارات ۇلى. تۇراردىڭ ءوزى دە وبلىستىق كارديولوگيا ور­تالىعىندا قىزمەت ەتكەن سوڭ, جۇ­رەك-قان تامىرلارى اۋرۋ­لارى­نىڭ سىرىن جاقسى بىلەدى.

وسى كەزگە دەيىن 4 اۋىلعا بارعان اق نيەتتى دارىگەرلەر 200-گە جۋىق ناۋقاسقا دياگنوستيكالىق, اقپاراتتىق كومەك كورسەتىپتى. سونىڭ ىشىندە حالىقتىڭ ەڭ ءجيى جۇگىنگەن مامانى – كارديولوگ پەن تەراپەۆت. اسىرەسە جۇرەك-قان تامىرلارى اۋرۋى اۋىلدا باسىم ەكەنى بايقالعان. سونداي-اق ەندوكرينولوگيا, قانت ديابەتى, ۋرولوگيا, لور باعىتىنداعى ماماندارعا دا مۇقتاجدىق بار.

ء«بىز اۋىلدارعا بۇدان دا ءجيى شىعار ەدىك. بىراق ءبارىمىز ءبىر ۋاقىتتا جۇمىستان بوساي قويۋى­مىز قيىن», دەيدى ەركە­بۇلان. ونىڭ ۇستىنە كوكوزەك كەزەڭدە الىس ساپارعا شىعۋ دا وڭاي ەمەس. ەشقايدان دەمەۋشى كۇتپەي, تەك ءوز كۇشىنە سەنگەن, جولعا دا ءوز كو­لىگىمەن شىعاتىن دارىگەر جىگىت­تەردىڭ بولاشاق جوس­پارى كوپ.

«Aq Niet» اتتى ەرىكتى ۇيىمعا كوڭىل قالاۋىمەن قوسىلعان, قىم-قۋىت تىرلىگى اراسىنان ۋاقىت تا­ۋىپ, حالىقتىڭ العىسىن الىپ جۇر­گەن جاستاردى جەكە-جەكە تانىس­تىرىپ كەتەيىك. ولار: تەراپەۆت ادىلبەك عالىمجانوۆ (Uniserv كلينيكاسى), نەيروحيرۋرگ دوسحان قۇجات (ورال قالالىق كوپسالالى اۋرۋحاناسى), ۋرولوگ-اندرولوگ ەركەبۇلان ماعزوموۆ (وبلىستىق كوپبەيىندى اۋرۋحانا), كارديولوگ تۇرار مۇراتوۆ (وبلىستىق كارديولوگيا ورتالىعى), كارديولوگ ءادىلحان قۇرمالاەۆ (وبلىستىق كارديولوگيا ورتالىعى), حيرۋرگ ماناس امانگەلديەۆ, (وبلىستىق كوپبەيىندى اۋرۋحانا), نەۆروپاتولوگ ماناس ءتادجينوۆ (كوپسالالى قالالىق اۋرۋحانا), پسيحياتر-ناركولوگ نۇربەك حالەلوۆ (وبلىستىق پسيحياترلىق ورتالىق), حيرۋرگ تاۋباي بايجەكەنوۆ (قالالىق كوپبەيىندى اۋرۋحانا), ەندوكرينولوگ مەرەي قابدوللين (№1 قالالىق ەمحانا), تەراپەۆت قانات جارىقباسوۆ (Uniserv كلينيكاسى), لور-دارىگەر دياس كامكيەۆ (وبلىستىق كوپبەيىندى اۋرۋحانا).

جوعارىدا اتالعان جىگىتتەردىڭ جاسى دا شامالاس. ون شاقتى جىلدان, ستۋدەنتتىك كەزدەن بەرى ءبىرىن-ءبىرى جاقسى تانيدى. كوبى شاڭىراق كوتەرگەن, ءبىر-بىرىمەن وتباسى بولىپ ارالاسىپ تۇرادى. تابىسى شاشەتەكتەن, ۋاقىتى كول-كوسىر بولماسا دا ىزگى باستاماعا, ساۋاپتى ىسكە ءبىر كىسىدەي جۇمىلا كىرىسكەن جاس دارىگەرلەردىڭ بۇل قادامى شىنىمەن دە اسا قۇپ­تارلىق, جۇرەككە جىلۋ سىيلايتىن ءىس. مىنە, بۇيىرسا جاز شىعىپ كەلەدى. «Aq Niet» ەرىكتى دارىگەرلەر توبىنىڭ ىزگى ءىسى تۋرالى ەستىپ, ولاردى شاقىرىپ جات­قان اۋىلدار دا بار ەكەن. «مەن بىتكەن ويپاڭ جەرگە الاسا اعاش, ەمەسپىن جەمىسى كوپ تاماشا اعاش. قالعانشا جارتى جاڭقام مەن سەنىكى – پايدالان شارۋاڭا جاراسا, الاش! – دەپ وتكەن الاش ارىستارىنىڭ ىزىنە تۇسكەن ازامات­تارعا اق جول تىلەيمىز.

باتىس قازاقستان وبلىسى