كورىسۋ كۇنىنەن باستاۋ العان ناۋرىزناما مەيرامى قايىرىمدىلىق, مادەنيەت جانە ۇلتتىق سالت-ءداستۇر كۇندەرىمەن جالعاستى.
ورال قالاسىندا باتىس قازاقستان وبلىسىنىڭ اكىمى ناريمان تورەعاليەۆ مەملەكەت باسشىسىنىڭ اتىنان ءار سالادا قىزمەت ەتىپ جۇرگەن ازاماتتار, ەڭبەك ادامدارى, زيالى قاۋىم وكىلدەرى مەن قوعام بەلسەندىلەرىنە اۋىزاشار بەردى.
وسى كۇنى وبلىستىڭ ءار اۋدانىندا مەكتەپتەرگە «قازاقستان حالقىنا» قوعامدىق قورىنىڭ بيىل ۇزدىك ءارى بەلسەندى وقۋشىلارعا تاعايىنداعان سەرتيفيكاتى تاپسىرىلدى. ەلىمىز بويىنشا جوسپارلانعان 20 مىڭ جولدامانىڭ 829-ى باتىسقازاقستاندىق 5-8-سىنىپ وقۋشىلارىنا بۇيىرماق.
قاراتوبە اۋداندىق جاستارمەن جۇمىس جونىندەگى رەسۋرستىق ورتالىعى قايىرىمدىلىق كۇنى اياسىندا جالعىزباستى انالاردى مەرەكەمەن قۇتتىقتاپ, ءۇي-جايلارىنىڭ ماڭايىن قالىڭ قاردان تازارتىپ, ءۇيىن جيناستىرىپ بەردى. «كۇمىس القا» يەگەرى تاتتىگۇل باينيازوۆا بالالارعا «ناۋرىز قورجىن» تاراتتى. ال سىرىم اۋدانىنىڭ اكىمى جۇماگەلدى باتىرنيازوۆ اۋدان ورتالىعىنداعى بىرقاتار ارداگەرگە ارنايى بارىپ كورىسىپ, مەرەكەلىك سىيلىق تابىس ەتتى. بايتەرەك اۋدانىنداعى ارناۋلى الەۋمەتتىك قىزمەت كورسەتۋ ورتالىعى قارتتار ۇيىنە «جۇرەكتەن جۇرەككە» مەرەكەلىك كونتسەرتى ۇيىمداستىرىپ, دامگە تولى سەبەت سىيلادى. وسىنداي قايىرىمدىلىق شارالارى بارلىق اۋداندا ءوتتى.
ال وبلىستىق تاريحي-ولكەتانۋ مۋزەيى مەن وبلىستىق حالىق شىعارماشىلىعى ورتالىعى مادەنيەت جانە ۇلتتىق سالت-ءداستۇر كۇنىنە وراي «سالت ءداستۇرىم – قازىنام» اتتى ءىس-شارا مەن «بەسىككە سالۋ» ءراسىمىن وتكىزدى.
مادەني جيىنعا مۋزەي ارداگەرى, قازاقستان رەسپۋبليكاسىنا ەڭبەگى سىڭگەن قايراتكەرى سارا تاناباەۆا, تاريحشى عالىم ءالفيا بايبولسىنوۆا, «ارۋ انالار» ۆوكالدىق توبى, ستۋدەنتتەر, مادەنيەت جانە مۋزەي قىزمەتكەرلەرى قاتىستى.
ال ورال قالالىق كورمە زالىندا وتكەن «ۇرشىق پاتي» ءىس-شاراسىنا قازاقستان قولونەرشىلەر وداعىنىڭ مۇشەسى, قولونەر «Urshyk» رەسپۋبليكالىق قوعامدىق بىرلەستىگىنىڭ جەتەكشىسى بيبىگۇل كاردەنوۆا استانادان ارنايى كەلىپ, ورالدىقتارمەن تاجىريبە ءبولىستى. باسقوسۋدا ۇرشىق ءۇيىرۋدىڭ قىر-سىرىمەن قاتار, ورالدىق قولونەر شەبەرلەرى دە كيىز باسۋدان شەبەرلىك ساعاتىن ۇيىمداستىردى.
بيىل مەملەكەت باسشىسىنىڭ باستاماسىمەن ون كۇنگە سوزىلاتىن ناۋرىزناما دەكاداسىن حالىق ەرەكشە ىقىلاسپەن قابىل الىپ, ءار ءىس-شاراعا بەلسەنە قاتىسىپ ءجۇر.
باتىس قازاقستان وبلىسى